سايلاۋ وتەر كۇن جاقىنداعان سايىن ۇمىتكەرلەردىڭ قاي-قايسىسى دا سايلاۋشىلارمەن اراداعى بايلانىستارىن ۇدەتە تۇسۋدە.
ناۋرىزدىڭ 28-ىنەن باستاپ, «قازاقستاننىڭ پاتريوتتار پارتياسى» قوعامدىق بىرلەستىگى ۇسىنعان عاني قاسىموۆتى قولداۋشىلار استانا قالاسىندا ءۇمىتكەردىڭ تۇعىرنامالىق باعدارلاماسى مەن بەينەسى بار پلاكاتتاردى كوشەلەردىڭ كورنەكى جەرلەرىنە ىلە باستادى.
وندا ۇمىتكەردىڭ الەۋمەتتىك باعدارلامالارعا وزگەرىستەر ەنگىزۋىنە باسىمدىقتار بەرىلگەن. ۇمىتكەر مۇگەدەكتىككە بايلانىستى ايلىق جاردەماقى مەن مەملەكەتتىك جاردەماقىنى, زەينەتاقى مولشەرىن ۇلعايتۋدى كوزدەيدى. تۇرمىسى تومەن جانداردى تەگىن مەديتسينالىق كومەكپەن, ال جاستاردى تىم قىمبات ەمەس ساپالى تۇرعىن ۇيلەرمەن قامتاماسىز ەتۋدى ءوز تۇعىرناماسىندا كورسەتكەن. «ءبىز وسى ۇمىتكەر ۇسىنعان وزگەرىستەردى جاقتاپ داۋىستارىمىزدى بەرمەكپىز», دەيدى عاني قاسىموۆتىڭ سايلاۋالدى شتابىنداعىلار.
بۇگىنگە دەيىن قاسىموۆتى قولداۋشىلار كوپتەگەن اكتسيالار وتكىزىپ ۇلگەردى. ولاردىڭ ىشىندە كوررۋپتسياعا قارسى, ازاماتتاردىڭ قۇقىقتارىن قورعاۋ, ارداگەرلەرمەن كەزدەسۋلەر, قالا كوشەلەرىندە تۇرعىندارمەن اڭگىمەلەردىڭ ءوتۋى ۇمىتكەر باعدارلاماسىمەن حالىقتى تانىستىرۋعا جول اشتى.
انار تولەۋحانقىزى.