بالالارعا دا قامقور

پرەزيدەنتتىكتەن ۇمىتكەر عاني قاسىموۆ تالعارعا بارىپ, اقساقالدىڭ اق باتاسىن الدى بۇرناعى كۇنى الماتى ىرگەسىندەگى تالعارعا جولى تۇسكەن عاني قاسىموۆتى ءوز جاقتاستارى «ايسەم ي كو» جشس جەكەمەنشىك قۇرىلىس كومپانياسى كەڭسەجايىنىڭ الدىندا كىلەم توسەپ, ءان-كۇيمەن دۋمانداتا قارسى الدى. ناق وسى جەردە پاتريوتتار پارتياسى سايلاۋالدى ناۋقانىنىڭ الماتى وبلىستىق شتابى ورنالاسقان. اتالمىش كاسىپورىندا بۇگىنگى تاڭدا 150-گە جۋىق ادام جۇمىس­پەن قامتىلعان. كەزىندە وسى كوم­پا­نيانىڭ اياعىنان تىك تۇرىپ كەتۋىنە بۇرىنعى اسكەري, ىسكەر باس­شى سەرىك ايتقوجيننىڭ جانكەش­تى­لىگىنە قوسا, عاني ەسەنگەل­دى­ ۇلى­نىڭ قولداۋى دا سەپتىگىن تيگىزگەن. سودان دا بولار, ۇجىم تۇگەلدەي دەر­لىك پرەزيدەنتتىك سايلاۋعا پات­ريوتتار پارتياسى قوسقان ءۇمىت­كەر­دىڭ تىلەكشىلەرى ەكەنىن ايتىپ وتىر. وسى ارادا بولعان پرەزيدەنتتىكتەن ۇمىتكەرمەن كەزدەسۋگە قا­زاقستان زاعيپتار قوعامى تال­عار­داعى وندىرىستىك كاسىپورنىنىڭ جۇمىسشىلارى, «پوكولەنيە» قو­عامدىق بىرلەستىگىنە مۇشە زەينەتكەرلەر, سونداي-اق سلاۆياندار­دىڭ ەتنومادەني بىرلەستىگى مەن تال­عارلىق جاستار وكىلدەرى قا­تىستى. «ءسىزدى كورمەگەلى دە كوپ جىل­دىڭ ءجۇزى بولىپتى-اۋ», دەپ ءبىر ەگدە ايەلدەر عاني ەسەنگەلدى­ ۇلىمەن ەمەن-جارقىن امانداسىپ جاتىر. – تالعاردىڭ ەلى مەن جەرى مە­نىڭ جانىما جاقىن. بالالىق شا­عىم دا ۇزىناعاش, دەگەرەس سياق­تى وسى وڭىرگە جاقىن جەرلەردە ءوتتى. تالعار بۇرىن مىڭعىرتىپ مال وسىرگەن, ماۋەسى ىرعالعان قۇت-بەرەكەنىڭ ورداسى ەدى. سول جاق­سىلىقتاردى قايتادان جاڭ­عىر­تۋ كەرەك. بۇدان 11 جىل بۇ­رىن پرەزيدەنتتىك سايلاۋعا ءتۇس­كە­نىمدە تالعاردا بولعانمىن, – دەپ ءسوز باستاعان ۇمىتكەرگە ءار تۇس­تان: «ءبىز سوندا سىزگە داۋىس بەرگەنبىز», دەگەن ۇندەر ەستىلدى. ع.قاسىموۆ ءوزىنىڭ سايلاۋالدى باعدارلاماسىنىڭ ما­ڭىزدى تۇس­تارىنا توقتالدى. حا­لىقپەن كەزدەسە ءجۇرىپ, ءوز تۇر­مىسىنا تو­لىقتاي رازى ادامدى كورمەگەنىن ايتتى. «مىسالى, مىنا بۇگىنگى كوزدەرى كورمەيتىن زاعيپ ادامدار مەكەمەسى جالپىعا بىردەي نەگىزدە سالىق تولەيدى, كوم­مۋنالدىق تولەمدەر بوي­ىن­شا ەشبىر جەڭىل­دىك المايدى, بۇل كۇندە جۇمىس­تارى توقتاپ تۇر, كۇنكورىستىك از عانا وندىرىستەرىن كەڭەيتۋگە مۇمكىندىكتەرى جوق. ال سونى ءبىز­دىڭ بيلىك كورمە­گەن­سي­دى, شىن نيەتتەرىمەن جانى اشىپ, كومەك­تەسپەيدى», دەدى كانديدات. وسىلاي دەي كەلە, ۇمىتكەر داۋىس بەرگەندە ءبىز وسىنداي كەمشىلىك­تەردىڭ جويى­لۋىن قا­پەر­دە ۇس­تاۋعا, ەلدىڭ جانە ءوزى­مىز­دىڭ ەرتەڭگى بولاشا­عىمىزدى تاڭدايتىنى­مىز­دى ۇمىت­پاۋعا شاقىردى. كەزدەسۋدە ءبىراز جايلاردىڭ باسى شالىندى, تالعار كوشە­لەرى­نىڭ جايسىزدىعى, اۋداندا سەگىز جىلدان بەرى 6 مىڭ وتبا­سى­نىڭ جەر تەلىمى كەزەگىندە تۇر­عان­دىعى, اۋىلدى كوتەرۋ قاجەتتىگى, ايەلدەردى زەينەتكەرلىككە 55 جاستان باستاپ شىعارۋ كەرەكتىگى, باسقا دا وزەكتى پروبلەمالار ايتىلدى. بۇدان سوڭ پرەزيدەنتتىكتەن ۇمىتكەر وسىنداعى «نۇر» وتبا­سىلىق بالالار ۇيىنە باردى. بۇل بالالار ءۇيى ارداگەر پەداگوگ تۇياق ەسقوجينانىڭ باستاۋىمەن 1998 جىلى اشىلسا, سودان بەرى عاني ەسەنگەلدى ۇلى «جەتىم كورسەڭ جەبەي ءجۇر» دەگەن اتا سالتىنا با­عىپ, وسىناۋ قايىرىمدىلىق نەگىزىندەگى مەكەمەگە قاداري-حا­لىنشە قولۇشىن بەرۋدەن تانعان ەمەس. قازىرگى حان سارايىنداي ەڭسەلى عيماراتقا يە بولۋىنا دا, ونىڭ ماڭايىن كوركەيتۋ-ابات­تاندىرۋ جۇمىستارىنا دا, باسقا تۇسكەن باسقا قيىنشىلىق جاع­دايلاردا دا عانەكەڭنىڭ ىزگىلىكتى كومەگىن 110 بالانىڭ اناسى تۇياق قاسكەنقىزى كورۋدەي-اق كورگەن. بالالاردىڭ ۇلكەن جۇرەكتى قام­قور دوسى وسى جولى دا قۇرقول كەلمەپتى. اتاۋلى سىيلىعى – «كاراوكە» مۋزىكالىق بەينەتاسپا اپپاراتۋراسى. عاني ەسەن­گەل­دى ۇلىمەن وسى كەزدەسۋ دە بالالار ءۇشىن ءماز-مەيرام قۋانىشتى مەرەكەگە اينالىپ جۇرە بەردى. تۇياق انا الامان بايگەگە شاپقان ازا­مات­قا ناۋرىز بەيىلدى راحمەتىن ايتىپ, اق جول تىلەدى. بالا­لار­دىڭ ءان شىرقاتىپ, قۇيقىلجىتا بي بيلەپ قويعان ادەمى كونتسەرتىنەن كەيىن جايىلعان اق داس­تار­قان ۇستىندە «نۇر» بالالار ءۇيىنىڭ اتاسى ءانۋار بايسارين اقساقال عاني ىنىسىنە اق نيەتىمەن شۇبىرتىپ اق باتاسىن بەردى. قورعانبەك امانجول. الماتى وبلىسى. ------------------------------ سۋرەتتەردى تۇسىرگەن بەرسىنبەك سارسەنوۆ.