ادام دۇنيەگە كەلگەندە باياندى عۇمىر, تاعىلىمدى ءومىر كەشسەم دەپ تالپىناتىنى بار. ءومىر جولىنىڭ بيىگىنە كوتەرىلىپ, اسۋىنا دا شىعۋعا ۇمتىلادى. وسى عۇمىرنامادا باعى اسىپ, باقىتى تاسىعان دارەجەگە جەتسەم دەيتىن تىلەكتە دە جۇرەدى. سونداي جاننىڭ ءبىرى – جامبىل احمەتبەكوۆ.
قاراپايىم وتباسىندا ءومىر ەسىگىن اشىپ, ەسەيگەن ول كوپ بالالى شاڭىراقتا ءتالىم-تاربيە الدى. شىبىقتى ات قىپ مىنگەن بالعىن بالالىق شاعى دا كەشەگىدەي كوز الدىندا. بەسىكتەن بەلى شىقپاي جاتىپ, اۋىلدا قارا جۇمىس ىستەدى. ونى ەرتە ەسەيتكەن دە وسى قىرى ەدى.
ون بەس جاسىندا تەمىر تۇلپار – تراكتوردى تىزگىندەسە, ەڭبەگى جانىپ, جيىرمادان ەندى اسقاندا قىزىلساي اۋىلدىق وكرۋگىنىڭ دەپۋتاتى بولىپ سايلاندى.
قازاقتا «بولار بالا جاسىنان», دەپ تە تەگىن ايتىلماسا كەرەك-ءتى. وسىلاي جاستايىنان ەلدىڭ اۋزىنا ىلىگىپ, جەكە باسىنان گورى قوعامدىق مۇددەنى جوعارى قويا ءبىلدى. حالقىنىڭ قامقورىنا دا اينالىپ, تالاي ادامنىڭ العىسىن ارقالادى. قولىنان كەلگەن كومەگىن دە اياپ كورگەن ەمەس. قاشاندا باسقاعا قولۇشىن بەرۋگە دايار تۇردى.
وسى جىلدار ىشىندە ەكى جوعارى ءبىلىم الىپ, ءوزىنىڭ بىلىمگە دەگەن قۇلشىنىسىن ارتتىردى. ءۇلكەنگە ىزگى, كىشىگە ۇلگى بولارلىق قىرلارى دا ونى ەرەكشەلەپ تۇراتىن.
كەيىن ەلى ءۇشىن ەڭبەگىمەن كورىنە بىلگەن ول كوممۋنيستىك حالىقتىق پارتياعا مۇشە بولۋدى قالادى. حالىق سەنىم ارتىپ, كانديدات ەتىپ ۇسىنعانىنىڭ استارىندا دا وسى جايلار جاتقانى انىق.
ول بيلىك باسىندا بولۋ قانشالىقتى جاۋاپكەرشىلىك جۇگىن جۇكتەيتىنىن ايقىن تۇسىنگەنىمەن, وعان ارتقان ءۇمىتتى اقتاماۋعا قاقىسى جوق دەپ شەشتى. ءتۇرلى دەڭگەيدەگى پارتيا جانە كەڭەس قىزمەتىن اتقارا ءجۇرىپ, ورتالىقتىڭ وكتەم ساياساتىنىڭ ىعىمەن كەتە بەرمەي, ەل مۇددەسىن, بولاشاق قامىن دا ءبىر ءسات ەستەن شىعارعان جوق. جامبىل اۋجان ۇلى پارتيا حاتشىسى بولىپ قىزمەت اتقارعان كەزدىڭ وزىندە-اق ءوزىنىڭ ۇلكەن مادەنيەتتىلىگىمەن, ءيمانجۇزدى ىزەتتىلىگىمەن تانىلىپ, حالىق ءداستۇرىن جاقسى بىلەتىن, وي ءورىسى بيىك, تاعىلىمى تەرەڭ جان ەكەنىن تالاي مارتە دالەلدەدى. ونىڭ ەل پرەزيدەنتتىگىنە لايىقتى كانديدات ەكەندىگىنە پارتيالاستارى تاراپىنان ەش كۇمان كەلتىرمەيتىنى جان-جاقتى قولداۋلارى ارقىلى دا انىق كورىنەدى.
مۇحامەدجان ىسقاقوۆ.
اقمولا وبلىسى.