قازاقستان رەسپۋبليكاسىنىڭ سايلاۋ زاڭناماسىنا سايكەس 28 ناۋرىزدا ساعات 24.00-دە 3 ساۋىرگە تاعايىندالعان كەزەكتەن تىس پرەزيدەنتتىك سايلاۋعا باقىلاۋ جۇرگىزەتىن شەت مەملەكەتتەر مەن حالىقارالىق ۇيىمداردان بايقاۋشىلاردى اككرەديتتەۋ اياقتالدى. وسىعان بايلانىستى 28 ناۋرىزدا ساعات 21.00-دە ورتالىق سايلاۋ كوميسسياسىنىڭ وتىرىسى ءوتىپ, وندا سىرتقى ىستەر مينيسترلىگىنىڭ ۇسىنىمى بويىنشا تاعى 9 بايقاۋشىنى اككرەديتتەۋ تۋرالى قاۋلى قابىلداندى. ءسويتىپ, كەزەكتەن تىس پرەزيدەنتتىك سايلاۋعا اككرەديتتەلگەن حالىقارالىق بايقاۋشىلاردىڭ جالپى سانى 1059 ادامعا جەتتى. ورتالىق سايلاۋ كوميسسياسىنىڭ مۇشەسى تاتيانا وحلوپكوۆانىڭ حاباردار ەتۋىنشە, سايلاۋدى ەقىۇ-دياقب ميسسياسىنان – 357, تمد ميسسياسىنان – 426, شىۇ ميسسياسىنان – 13, تۇركى تىلدەس مەملەكەتتەردىڭ پارلامەنتتىك اسسامبلەياسىنان – 7, يسلام كونفەرەنتسياسى ۇيىمىنان – 5, ەقىۇ پارلامەنتتىك اسسامبلەياسىنان – 80, ەۋروپا كەڭەسى پارلامەنتتىك اسسامبلەياسىنان – 8 جانە الەمنىڭ 25 ەلىنەن 163 بايقاۋشى باقىلايتىن بولادى. سونىمەن قاتار, بۇگىندە ەلىمىزدىڭ سىرتقى ىستەر مينيسترلىگى جانىندا شەتەلدىك بۇقارالىق اقپارات قۇرالدارىنىڭ 90 وكىلى تۇراقتى جانە ۋاقىتشا تىركەلىپ وتىر. ءاليسۇلتان قۇلانباي. استانا.