سونىمەن, 3 ءساۋىر كۇنى قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋى وتەدى. كوپشىلىك بولعان سوڭ قاۋىمداسىپ, باسىمىز قوسىلا قالعان ورتادا, جەر-جەردە ايتىلا قالار اڭگىمەنىڭ العاشقى ارقاۋى – وسى سايلاۋ جايلى جانە ءتۇسىپ جاتقان ۇمىتكەرلەر تۋرالى. دەربەس ويلاپ, كوركەم تولعايتىن زامانداستارىمىزدىڭ اراسىندا ۇمىتكەرلەردىڭ سايلاۋالدى باعدارلامالارىن كەڭىنەن تالقىلاپ, قىزۋ پىكىرتالاسقا اينالدىرىپ جۇرگەنىمىز دە جاسىرىن ەمەس.
قىرى مەن سىرى, قۇپياسى مول دۇنيەنىڭ سيقىرىنا قانىعىپ, الەمدىك دەڭگەيدەگى عىلىم مەن ءبىلىمنىڭ جاڭالىقتارىنا بوي ۇرىپ, ىزدەنىسكە ۇمتىلىس ءبىلدىرىپ, تامىرىنا قان جۇگىرىپ جاتقان ءوندىرىس وشاقتارى مەن تۇرالاپ قالعان كاسىپورىنداردىڭ, اۋىل مەن استانانىڭ, قالا مەن دالانىڭ جاعدايى, باسقا دا شەشۋىن تاپپاي, شەشىمىن كۇتىپ جاتقان كوپتەگەن پروبلەمالاردىڭ ءتوڭىرەگىندە ءسوز قوزعايتىن قاتارلاستارىمنىڭ اۋزىنان كوشەلى وي, ورنىقتى پىكىر قىلاڭ بەرىپ جاتسا, قۋانا قولداۋعا تىرىساتىنىمىز تاعى انىق.
دەگەنمەن, سانانىڭ تاۋەلسىزدىگى قوعام تاۋەلسىزدىگىمەن ءولشەنبەيدى. مەنى قىنجىلتاتىنى, ىشىمىزدە سوڭعى جىلدارى «تاستاق جولعا بەت بۇرىپ الىپ», ءومىردىڭ ىرقىنا مويىنسۇنا باستاعان, موينىمىز ۇزىلگەنشە باس شۇلعىپ ۇيرەنگەن «موماقان» قالپىمىزدى بۇزباي, ءار ءنارسەگە ءالى دە تاۋەلسىز كوزبەن قاراي المايتىن سوقىر سەنىمدىلەردىڭ ءىشىنارا كەزدەسەتىندىگى.
ۋاقىت جىلجىعان سايىن قوعام دا دامي تۇسەدى. كەشەگى بيىگىڭنىڭ ەرتەڭگى كۇنى الاسارىپ قالۋى تابيعي زاڭدىلىق. وسىنى تەرەڭنەن ءتۇسىنىپ, ۇياتىمەن ۇعىنا بەرمەيتىندەر الداعى بولاتىن سايلاۋدى سول دوداعا ءتۇسۋشىلەردىڭ تەك بيلىك پەن باسقارۋعا قول جەتكىزۋدەگى قۇرال-سايمانى عانا دەپ باعالايدى. دەموكراتيا جەلەۋىمەن قىسىر اڭگىمە, جەل ءسوزدى كەۋلەتۋگە قۇمارلار «بىزگە كىم بولسا, ول بولسىن, ايتەۋىر ەلىمىز تىنىش, جۇرتىمىز امان بولسا بولدى» نەمەسە «بىزگە ءبارىبىر, باستىقتار كىمگە داۋىس بەر دەيدى, سوعان بەرەمىز», دەگەن سياقتى ءدۇدامال دايەكتەرمەن باسقانىڭ باسىن قاتىرماقشى.
«دوسىڭنان قورىقپا, ازار بولسا ساتىپ كەتەر, جاۋىڭنان قورىقپا, ازار بولسا اتىپ كەتەر, قورىقساڭ نەمقۇرايدىلىقتان قورىق – ول ساتىپ تا, اتىپ تا كەتەدى». اينالايىن اعايىن-اۋ, ءوزىمىزدىڭ سايلاۋشى رەتىندەگى ەڭ جوعارى قۇندىلىعىمىز – قۇقىمىزدى سامارقاۋ, مارعاۋ, بويكۇيەز نەمقۇرايدىلىققا قۇربان ەتكەندى قوياتىن كەز جەتكەن جوق پا؟ سوڭعى ەكى ءجۇز جەتپىس جىلدىق جىلناماسىندا ۇرپاققا ۇلگى قىلار ىزگىلىگىن ۇمىتىپ, ەلدىگىمەن قوشتاسقان, بوداندا بولىپ, بوساعادا قالعان, بەرگى جەتپىس بەس جىلدا «جارقىن بولاشاق» دەگەن جاساندى جىلتىر ساعىمعا الدانىپ, جانىن دا, مالىن دا, ءتىلىن دە, ءدىنىن دە جوعالتا جازداعان, سان مارتە قولدان جاسالعان قىرعىنعا ۇشىراپ, سان ءمارتە تابيعي تۇردە قاتارىن قايتا تولىقتىرعان, بۇگىندە تۇعىرىن نىق قاداپ, تۋىن ءتۇزۋ تىگىپ وتىرعان مەملەكەت مۇشەسىنىڭ ايتار ويى ما وسى؟
شۇكىر, كورىنگەننەن كوزتۇرتكى كورىپ, كورىنگەننىڭ تابانىندا قالىپ, تابا بولعان ەلىمىز ەگەمەن بولدى. ەڭسەمىز تىك, باسىمىز بيىك, قازاقستانىمىز بۇرىنعى وداقتىڭ بۇعاۋ-قامىتىن ىسىرىپ تاستاپ, الەمدىك قاتىناستارعا شىقتى. باسقا دۇنيە, اسىرەسە, ارىپتەس مەملەكەتتەرگە تالعامپازدىقپەن قارايتىن ءتاكاپپار باتىس پەن ازۋلى اقش سەكىلدى ايبارلى دەرجاۆالار دۇنيە ءجۇزىنىڭ كارتاسىندا قازاقستان دەگەن ەل بارىن ءبىلدى. عالامدىق كەڭىستىك مويىندادى. مويىنداپ قانا قويماي, ساناساتىن مەملەكەتكە اينالدىق. الەم مۇحيتىندا قازاق كەمەسى دەربەس جانە ەركىن ءجۇزىپ كەلەدى دەپ ەمىن-ەركىن ماقتانىش ەتە الاتىن شاققا جەتتىك. ەل ەكونوميكاسى دا العا قاراي قارىشتاپ دامىپ كەلەدى. ساياسي رەفورمالار بەلسەندى ءجۇرگىزىلە باستادى. قازاقستاندا قالىپتاسقان ۇلتارالىق كەلىسىم مەن دىنارالىق تۇسىنىستىك – بىزدەگى ەڭ ۇلكەن جەتىستىك. ەندەشە, پرەزيدەنتتىك سايلاۋ ناۋقانىن ەستىلىكپەن اتقارۋ بارىمىزگە سىن بولۋى كەرەك.
ال الداعى سايلاۋدا كىم جەڭىسكە جەتىپ, كىمنىڭ سەنىمگە يە بولاتىنىن ۋاقىت كورسەتە جاتار. ەڭ باستىسى – الدا بولاتىن سايلاۋ ەرتەڭىمىزدى تاڭداۋ ەكەنىنە ماڭىزدى ءمان بەرۋگە ءتيىسپىز.
قورىتا ايتقاندا, كونستيتۋتسيامىزعا سۇيەنىپ, سىن ساعاتتا سايلاۋعا تۇسكەن ءۇمىتكەرلەردىڭ بارلىعىنا قۇرمەتپەن قاراي بىلەيىك, ارداقتى ازاماتتار. وتانداستارىمنىڭ ءبارىن سايلاۋعا ۇيىمشىلدىقپەن قاتىسىپ, سانالى تۇردە داۋىس بەرۋگە شاقىرامىن.
ءۇمىت بيتەنوۆا, ۇلبيكە اقىن اتىنداعى اۋداندىق مادەنيەت ورتالىعىنىڭ قىزمەتكەرى.
جامبىل وبلىسى, قاراتاۋ قالاسى.