ليۆيا باسشىسى مۋامار كاددافي الەمدىك قوعامداستىققا ءوز ەلىندەگى اسكەري وپەراتسيانى توقتاتۋدى تالاپ ەتىپ قايىرىلدى. حالىقارالىق كواليتسياعا قاتىسۋشى ەلدەر باسشىلارىنا جولداعان حاتىندا ول كواليتسيا ءاسكەرلەرىنىڭ ءىس-قيمىلىن «تاعىلىق شابۋىل» دەپ اتادى.
كەشە لوندوندا ليۆياداعى جاعدايعا ارنالعان سامميت بولىپ ءوتتى. وعان 7 اراب مەملەكەتىن قوسقاندا 35 ەل قاتىستى. جينالعاندارعا ۇندەۋىندە م.كاددافي ناتو-نىڭ اۆياسوققىلارىن ەكىنشى دۇنيەجۇزىلىك سوعىس كەزىندەگى ادولف گيتلەردىڭ ءىس-ارەكەتتەرىمەن سالىستىردى. بۇرناعى كۇنى كاددافي كۇشتەرى قارۋلى وپپوزيتسيانىڭ العا ۇمتىلىسىنا سيرت قالاسىنىڭ ماڭايىندا توسقاۋىل قويدى.
ساياسي جولمەن شەشۋگە شاقىردى
گەرمانيا سىرتقى ىستەر ءمينيسترى – ۆيتسە-كانتسلەر گيدو ۆەستەرۆەللە ليۆياداعى جانجالدى ساياسي جولمەن شەشكەن ءجون دەگەن پىكىر ءبىلدىردى. ۆەستەرۆەللەنىڭ سوزىنە قاراعاندا, ليۆيا ماسەلەسىن تەك اسكەري تاسىلمەن شەشۋ مۇمكىن ەمەس.
ول فرانتسيا پرەزيدەنتى نيكوليا ساركوزيدىڭ ايتقاندارىن سىن تەزىنە الدى. ن.ساركوزي اراب مەملەكەتتەرىنىڭ باسشىلارىنا ەل تۇرعىندارىنا قارسى رەپرەسسيالىق ارەكەتتەر ورىن العان جاعدايدا حالىقارالىق قوعامداستىق پەن ەۋروپا ليۆياداعى سياقتى ارەكەتكە كوشۋى ىقتيمال دەگەن تۇرعىدا ەسكەرتۋ-سىماق جاساعان بولاتىن. گەرمانيا ءسىم-ءى باسشىسىنىڭ پىكىرىنشە, بۇل – وتە قاۋىپتى ۇستانىم.
امەريكا حالقىنا ۇندەۋمەن شىقتى
اقش پرەزيدەنتى باراك وباما ەل حالقىنا تەلەۇندەۋمەن شىقتى. وندا ول قۇراما شتاتتاردىڭ ليۆياداعى اسكەري وپەراتسياعا قاتىسۋداعى ماقساتىن تۇسىندىرۋگە تىرىستى. ونىڭ ءسوزىنە قاراعاندا, قالىپتاسقان جاعدايدا اقش-تىڭ ليۆياداعى وپەراتسياعا قاتىسۋدان باس تارتۋى ساتقىندىق بولىپ شىعار ەدى.
«كەيبىر ەلدەر وزگە مەملەكەتتەردە بولىپ جاتقان ز ۇلىمدىقتارعا كوز جۇمىپ قاراۋى مۇمكىن. الايدا امەريكا قۇراما شتاتتارى ونداي مەملەكەتتەر ساناتىنان ەمەس, – دەپ ءمالىمدەدى اقش پرەزيدەنتى. – حالىقارالىق كواليتسيانىڭ ليۆياداعى ءىس-قيمىلى بۇكىل ءوڭىر تۇراقتىلىعىنا قاۋىپ توندىرگەن قىرقىسقا توسقاۋىل قويدى». سونداي-اق ول م.كاددافيدىڭ قارۋعا جۇگىنۋىن قاتە قادام بولدى دەپ ەسەپتەيتىنىن كولدەنەڭ تارتتى.
سيريا پرەزيدەنتى ۇكىمەت اۋىستىرماق
سيريا پرەزيدەنتى باشار اساد تاياۋداعى تاۋلىكتەر ىشىندە ەلدىڭ ءىس باسىنداعى ۇكىمەتىن وتستاۆكاعا كەتىرۋ تۋرالى شەشىم قابىلدادى. ال جاڭا كابينەت ەسكىسى كەتىسىمەن ءبىر تاۋلىك ىشىندە قايتا جاساقتالماق. بۇل جاڭالىق سيريادا ونشاقتى كۇننەن بەرى جالعاسىپ جاتقان ءتارتىپسىزدىكتەر بارىسىندا جاريا ەتىلدى.
ساياسي جۇيەنى دەموكراتيالاندىرۋ تۋرالى ۇران كوتەرگەندەردىڭ نارازىلىق اكتسيالارى داراا قالاسىندا باستاۋ السا, بۇل ۇدەرىس كوپ كەشىكپەي ەل استاناسى – داماسكىنى قوسا العاندا باسقا قالالارعا دا تاراعان بولاتىن. پوليتسيامەن قاقتىعىس كەزىندە ونداعان ادام كوز جۇمسا, جۇزدەگەنى جارالانعان ەدى. وسىدان سوڭ-اق بيلىك جەدەل تۇردە ساياسي جانە ەكونوميكالىق رەفورمالار جاسايتىنىن حابارلاعان بولاتىن.
شەكاراداعى سەلونى بولىسە الماۋدا
ابحازيا رەسەي ۇسىنعان شەكارانى دەليميتاتسيالاۋ جانە دەماركاتسيالاۋ نۇسقاسىنا قارسى شىقتى. ءسۋحۋميدى رەسەي جوباسىنداعى ايبگا سەلوسىنىڭ ابحازدىق بولىگىنىڭ رەسەي اۋماعىنا جاتقىزىلعانى قاناعاتتاندىرماي وتىر. بۇل جونىندە ابحازيا پارلامەنتىنىڭ ۆيتسە-سپيكەرى يرينا اگربا مالىمدەدى.
ابحازيا ۋاقىت اعىنىمەن كوپتەن بەرى تەك اۋماعى جاعىنان تارىلىپ كەلەدى. سوندىقتان جەر ماسەلەسى ابحاز قوعامى ءۇشىن وتە ۇلكەن جان اۋىرتارلىق ماسەلە بولىپ تابىلادى. ءبىزدىڭ سەنىمىمىز بەن دوستىق قاتىناسىمىزدى سىناققا سالۋعا بولمايدى, دەپ مالىمدەدى اتالعان پروبلەماعا بايلانىستى ۆيتسە-سپيكەر. ابحاز حالقى شەكارانىڭ كراسنودار ولكەسىمەن شەكتەسەتىن بۇرىنعى كۇيىندە قالعانىن قالايدى.
شەتەلدىك تەلەحابارلارعا شەكتەۋ قويماق
قىرعىزستان پارلامەنتىندە شەتەل تەلەارنالارىنىڭ حابارلارىن كورسەتۋگە شەكتەۋ ەنگىزۋ تۋرالى ۇسىنىس ايتىلدى. بۇل شەكتەۋ, اسىرەسە, ەلدەگى سايلاۋ كەزەڭىندە ەرەكشە نازاردا بولۋى ءتيىس, دەيدى پارلامەنتتەگى وپپوزيتسيالىق دەپۋتات, «اتا-مەكەن» پارتياسىنىڭ كوسەمى ءومىربەك تەكەباەۆ.
ونىڭ ايتۋىنشا, قىرعىزستانداعى سايلاۋ ۋاقىتىندا شەتەل باعدارلامالارىن تىكەلەي ەفيردەن كورسەتۋ مۇلدەم توقتاتىلۋى ءتيىس. كەي جاعدايلاردا تەك جازۋ ارقىلى ترانسلياتسيالاۋعا بولادى. ەگەر شەتەلدىك تەلەباعدارلامادا سايلاۋعا قاتىسۋشىلاردىڭ نەمەسە ەل باسشىلىعى وكىلدەرىنىڭ ار-نامىسىنا تيەتىن ءمالىمەتتەر كەزدەسەتىن بولسا, وندا باعدارلامالار ەكرانعا مۇلدەم جىبەرىلمەۋى ءتيىس.
جاساقتار بازاسىنا اۆياسوققى بەرىلدى
رەسەي اسكەري-اۋە كۇشتەرى ينگۋشەتياداعى قارۋلى جاساقتار بازاسىنا دالدەنگەن اۆياسوققىلار جاسادى. اۆياشابۋىل ناتيجەسىندە 17 جاساقتىڭ كوزى جويىلعان. ۇلتتىق انتيتەررورلىق كوميتەت (ۇاك) اقپاراتىنا قاراعاندا, بازادا تەررورشى-جانكەشتىلەر دايىندىقتان وتەدى ەكەن.
ۇاك وكىلدەرىنىڭ سوزدەرىنشە, بازادا دايىندالعاندار سولتۇستىك وسەتيا مەن ينگۋشەتيا اۆتونوميالارىنىڭ اۋماقتارىندا لاڭكەستىك جاساۋدى جوسپارلاسا كەرەك. بىراق ولاردىڭ ارەكەتتەرى جۇزەگە اسپاي قالعان. ال قارۋلى جاساقتار بازاسىنىڭ ناقتى قاي جەردە ورنالاسقانى تۋرالى ناقتى دەرەك جوق. تەك وپەراتسيا بارىسىندا فەدەرالدى قاۋىپسىزدىك قىزمەتىنىڭ ەكى قىزمەتكەرى مەن ءبىر ميليتسيونەر دە كوز جۇمعان.
قىسقا قايىرىپ ايتقاندا:
گەرمانيا كانتسلەرى انگەلا مەركەلدىڭ پارتياسى بادەن-ۆيۋرتەمبەرگە جانە رەينلاند-پفالتسە جەرلەرىندە بولعان سايلاۋلاردا جەڭىلىس تاپتى. ءسويتىپ, گفر حريستيان-دەموكراتيالىق وداعى ۇكىمەت جاساقتاۋ مۇمكىندىگىنەن ايىرىلدى. بيلىك باسىندا 58 جىل بولعان حدو ەندى وپپوزيتسياعا كەتۋگە ءماجبۇر بولىپ وتىر.
گفر-ءدىڭ بۇرىنعى كانتسلەرى گەلمۋت كول گەرمانياداعى اتوم ەنەرگەتيكاسىن قورعاپ پىكىر ءبىلدىردى. ونىڭ ايتۋىنشا, بۇگىنگى تاڭدا اەس-تەرگە بالاما تابۋ مۇمكىن ەمەس. تەك ولاردىڭ قاۋىپسىزدىگىنە باسا ءمان بەرىلۋى كەرەك.
يەمەننىڭ دجاار قالاسى ماڭىنداعى قارۋ-جاراق زاۋىتىندا بولعان جارىلىس پەن ءورت سالدارىنان قازا تاپقاندار سانى 150 ادامعا جەتتى. 80 ادام ءتۇرلى دەڭگەيدە دەنە جاراقاتىن الدى. كەيبىر دەرەك كوزدەرى اتالعان قالانى «ءال-كايدا» جاساقتارى باسىپ الدى دەگەن حابار تاراتىپ وتىر.
ينتەرنەت ماتەريالدارى نەگىزىندە ازىرلەندى.