ءدال قازىر بۇكىل ەلىمىز اسا ءبىر جاۋاپتى بەلەستىڭ الدىندا تۇر. ول بەلەستەن ءبىز الداعى جەكسەنبىدە – 3 ساۋىردە وتەمىز. قالاي وتەمىز؟ بىلايشا قاراعاندا, ءبارى دە ايقىن سياقتى. قازاقستاننىڭ قازىرگى الەمدىك قوعامداستىقتاعى الار ورنى قوماقتى ەكەنى بەلگىلى. مەملەكەتىمىزدىڭ جىل اسقان سايىن ابىرويى ارتىپ, حالقىمىزدىڭ ءال-اۋقاتى جاقسارا تۇسكەنىن ءبارىمىز كورىپ وتىرمىز. ەل امان, جۇرت تىنىش. جۇمىر جەردىڭ و جاق, بۇ جاعىنان جەتىپ جاتقان جامانات جان ءتۇرشىكتىرەدى. قۇدايعا شۇكىر, سونىڭ بارىنەن حالقىمىز امان تۇر. مۇنىڭ ءوزى تاۋەلسىزدىكتىڭ 20 جىلىندا جۇرگىزىلگەن جۇيەلى جۇمىستىڭ جەمىسى. مەنىڭ ويىم كۇنى ەرتەڭگى پرەزيدەنتتىك سايلاۋعا بايلانىستى ولاي دەپ, بۇلاي دەپ پىكىر ايتۋ ەمەس, ۇگىت جۇرگىزۋ ەمەس. مەنىڭ ويىم وتانداستارىمىزدىڭ وسى سايلاۋداعى بەلسەندىلىگىنە بايلانىستى.
ءبىز ءبىرازدى كورگەن, انا قوعامدا دا, مىنا قوعامدا دا قىزمەت اتقارعان بۋىننىڭ وكىلىمىز. مەن ءوزىم قالا اكىمى بولىپ تا جۇمىس ىستەدىم. قولدان كەلگەنىنشە ەلگە ەڭبەك ەتتىك. سول كەشەگى كەڭەستىك كەزەڭدە سايلاۋعا قاتىسۋداعى بەلسەندىلىك بولەكشە بولاتىن. قولدان جاسالسا دا, ۇيىمداستىرىلسا دا سايلاۋ ەل ءومىرىندەگى ەلەۋلى وقيعاعا اينالاتىن. ارينە, ول كەزدەگى ساياسي جۇيە باسقا, يدەولوگيا باسقا. «كوممۋنيستەر مەن پارتيادا جوقتاردىڭ مىزعىماس بلوگىنىڭ» بار ەكەنىن الەمگە پاش ەتۋ ءۇشىن كوممۋنيستىك بيلىك سايلاۋعا ادامداردى تۇگەلگە جۋىق قاتىستىرماي تىنبايتىن. ءارتۇرلى سەبەپتەرمەن سايلاۋ ۋچاسكەسىنە بارۋدى كەشىكتىرىپ جاتقانداردىڭ ۇيىنە جەتىپ, الدىعا سالىپ ايداعانداي ەتىپ الىپ كەلەتىندەرى دە بولاتىن.
دەموكراتيا جەلى ەسىپ, قايتا قۇرۋ دەگەن كەزەڭ كەلگەلى بەرى ادامداردىڭ ساناسىندا ءبارىن دە ءوزى شەشەتىن پسيحولوگيا ورنىعا ءتۇستى. مۇنىڭ جاقسى جاعى كوپ. سونىمەن بىرگە كەمشىن تۇستارى دا بار. تالاي ادام وسىنى بەتپەردە ەتىپ, ءوزىنىڭ سامارقاۋلىعىن, قوعام ۇستىنە بەيعام قارايتىنىن كولەگەيلەۋگە بەيىم بولىپ بارا جاتقانداي. مۇنى ءبىز كەي-كەيدە ازاماتتارىمىزدىڭ ءوزىنىڭ كونستيتۋتسيالىق قۇقىن – مىنا مەملەكەتتىڭ ماڭىزدى ءماسەلەلەرىن شەشەتىن ءىرى ءىس-شارالارعا قاتىسۋ, مىسالى, سايلاۋلاردا داۋىس بەرۋ مۇمكىندىگىن پايدالانباي قالا بەرەتىنىن دە بايقايمىز. ال شىن مانىندە ازاماتتىڭ ازاماتتىعى, قوعام ىستەرىنە ارالاسۋ بەلسەندىلىگى, ەڭ الدىمەن وسى سايلاۋ قۇقىن پايدالانۋىنان كورىنەدى عوي.
بۇگىندە قازاقستان بۇكىل الەمنىڭ نازارىندا تۇر. كۇنى كەشە ەۋروپاداعى قاۋىپسىزدىك پەن ىنتىماقتاستىق ۇيىمىنا ءتوراعالىق ەتكەن, ونىڭ ون ءبىر جىلدان بەرى شاقىرىلماي كەلە جاتقان ءسامميتىن ابىرويمەن ءوتكىزگەن, ەندى از ۋاقىتتان كەيىن بۇكىل مۇسىلمان الەمىنىڭ تىزگىنۇستارى بولعالى وتىرعان ەلىمىزدەگى دەموكراتيانىڭ دەڭگەيى ازاماتتاردىڭ سول ەل تاعدىرىن شەشەتىن ماڭىزدى ءىس-شاراعا قاندايلىق بەلسەندىلىكپەن قاتىساتىنىنان دا كورىنەدى. مەنىڭ داۋىسىم نە وزگەرتە قويادى دەيسىڭ, باسقالار بارادى عوي, سولار داۋىسىن بەرەدى عوي, ماسەلە دۇرىس شەشىلەدى عوي دەپ نەمقۇرايدىلىققا سالىنار بولساق, ءوزىمىزدىڭ قولىمىزعا ءتيىپ تۇرعان ءمۇمكىندىكتەن ەنجارلىعىمىز ءۇشىن عانا ايىرىلار بولساق, مۇنىڭ ءوزى ەلدىگىمىزگە ءبىر سىن. ەل ىسىنە ارالاسۋ, مەملەكەت بولاشاعىنىڭ تاعدىرىن شەشۋ, سوعان ىقپال جاساۋ ءبىزدىڭ بارىمىزگە تاۋەلسىزدىك بەرىپ تۇرعان سىيدىڭ ءبىرى. سەن ەلىڭدى الداعى بەس جىلدا كىم باسقاراتىنىنا قاتىستى ءوز پىكىرىڭدى ءبىلدىرىپ قانا قويمايسىڭ, ەرتەڭگى سايلاۋدا جۇلدىزى جانعالى تۇرعان كانديداتتىڭ جەڭىسكە جەتەر پايىزىن دا ايقىنداۋعا اسەر ەتەسىڭ. وسىنى سەزىنۋدىڭ ءوزى جۇرەك تولقىتارلىق جاي ەمەس پە؟
بۇگىنگى تاڭدا ءوزىمىز ارالاسىپ-قۇرالاسىپ جۇرگەن ورتانىڭ ادامدارى ايتىپ جاتقان سوزدەر دە, بۇقارالىق اقپارات قۇرالدارىنداعى پىكىرلەر دە قازاقستاندىقتار 3 ساۋىردە بۇكىلحالىقتىق سايلاۋعا بەلسەندىلىكپەن قاتىسارىنا سەندىرەدى. سونىڭ وزىندە دە ەل حالقىنىڭ سايلاۋعا قاتىسۋ دەڭگەيى بارىنشا جوعارى بولعانى ەلىمىزدىڭ مەرەيى ەكەنىن ەسكەرسەك دەيمىن. ويىمدى قورىتا كەلىپ, ايتارىم مىناۋ: قازاقستان – ءوز وتانىمىز, ءوز وتانىمىزدىڭ تىزگىنىن الداعى بەس جىلعا كىمنىڭ قولىنا سەنىپ تاپسىراتىنىمىزدى ءبىز ءوزىمىز شەشەمىز. ءارقايسىمىز شەشەمىز. وسى ءمۇمكىندىكتى پايدالانىپ قالايىق.
سايلاۋدا داۋىس بەرۋ – ءبىزدىڭ ازاماتتىق پارىزىمىز.
مۇرات ەرگەشباەۆ, قىزىلوردا وبلىستىق قارجى باسقارماسىنىڭ باستىعى.