قازاقستان رەسپۋبليكاسى پرەزيدەنتتىگىنە كانديدات, «تابيعات» ەكولوگيالىق وداعىنىڭ توراعاسى مەلس حامزا ۇلى ەلەۋسىزوۆتىڭ جاقىندا وزىمەن بۇرىن قىزمەتتەس بولعان الماتى بىرىككەن اۆياوتريادىنىڭ بورتسەرىكتەرىمەن كەزدەسۋى وتە ءبىر جىلى شىرايلى جاعدايدا ءوتىپ, وعان قاتىسقاندارعا دا ۇمىتىلماستاي اسەر قالدىردى.
قاراپ تۇرساڭىز, وعان دا قىرىق جىلدان استام ۋاقىت وتكەن ەكەن. تالاي ادامنىڭ جادىنان دا شىعىپ كەتەتىن ۋاقىت قوي. بۇل مەكتەپ بىتىرگەن سوڭ ونىڭ اسكەرگە بارىپ, وندا ەكى جىل قىزمەت ەتكەننەن كەيىن, 20 جاسىندا العاش رەت ەڭبەككە ارالاسۋى ەدى.
بورتسەرىك. قازاق بالالارى بارا قويمايتىن جۇمىس. جاستايىنان الدەبىر جاڭالىققا جاقىن جۇرەتىن مەلستىڭ رومانتيكاسىنان دا تۋعان شىعار. جەردە ەمەس, كوكتە ءجۇرۋ – جاستىقتىڭ ارمانى. الماتى بىرىككەن اۆياوتريادىندا سول جۇمىستى ءۇش جىل اتقاردى. جاقسى اتقاردى. وعان جۇرت كۋا. ونى قىرىق جىل وتكەن سوڭ دا ۇمىتپاپتى.
– تۋ-154 ۇشاعىندا قىزمەت ىستەدىك. وڭكەي قىزداردىڭ اراسىنداعى جالعىز جىگىت مەلس حامزا ۇلى وسىنداعى اۋىرلاۋ جۇمىستى اتقاراتىن. سول ءۇشىن ونى بارلىعىمىز جاقسى كوردىك, سىيلادىق, – دەپ ەسكە الادى ليۋدميلا رەزنيچەنكو. – سونان سوڭ ول بۇكىل بىرىككەن اۆياوترياد جاستارىنا جەتەكشىلىك ەتتى. جالىنداعان جاس جىگىت ءبىزدىڭ ءبارىمىزدىڭ ەسىمىزدە قالدى.
مىنە, ارادا قىرىق جىل وتكەن سوڭ ءۇش جىل بىرگە قىزمەت ەتكەن ارىپتەستەرىممەن كەزدەسكەندە, پرەزيدەنتتىكتەن ءۇمىتكەردىڭ ولاردىڭ اۋزىنان ءوزى جايلى تالاي جىلى لەبىزدەردى ەستۋى, ارينە, قۋانىشتى ءارى تەبىرەنتپەي قويمايدى.
قىرىق جىل وتكەن سوڭ ۇمىتپاۋ دا ءبىراز جايدى اڭعارتادى. كەيبىرەۋلەردىڭ تەز ۇمىتىلاتىنى دا بار. ال ىسىمەن, مىنەزىمەن كوزگە تۇسكەن ازاماتتى جۇرت ۇمىتپايدى ەكەن. ۇمىتپاعانى ءوز الدىنا, سول سۇلۋ بيكەشتەر – بورتسەرىك قىز-كەلىنشەكتەر ونىڭ كەيىنگى ءومىرىن دە قاداعالاپ وتىرىپتى.
– ءبىز سەنى بىلەمىز, سايلاۋ كۇنى ساعان داۋىس بەرەمىز,– دەستى ولار جاستىق كەزدەگى دوستارىن ورتاعا الىپ.
ءوزىنىڭ قىرىق جىلعى ەڭبەك جولىندا مەلس حامزا ۇلى ءبىراز جەردە ەڭبەك ەتتى. سوندا ءبىر جەردە كوپ تۇراقتاماعان با دەگەن دە وي كەلۋى مۇمكىن-اۋ. استە دە ولاي ەمەس. ول – زاتىندا جانى جاڭالىققا قۇمار ادام. كوپ ءنارسەنى كورگىسى كەلەدى, بىلگىسى كەلەدى. از ۋاقىت جۇمىس ىستەگەن جەرىندە دە وسىناۋ اڭقىلداعان اقكوڭىل ادام جۇرتتىڭ ەسىندە قالاتىنى بار. بۇگىن بارساڭ دا بىرگە جۇمىس ىستەگەندەر ول جايىندا جىلى ەستەلىكتەردى الدىڭا توسادى.
جيىرما بەستىڭ قىلشىلداعان جاسىندا ول ەكى جىل الماتى قالاسىنىڭ وكتيابر اۋدانىندا جەدەل كومسومول وتريادىنىڭ كومانديرى بولدى. سونان سوڭ بەس جىلداي الماتى تەمىر جولىنىڭ بايلانىس ديستانتسياسىندا جۇمىس ىستەدى. ەكى جىلداي «زەرگەر» بىرلەستىگى باس ديرەكتورىنىڭ ورىنباسارى قىزمەتىن اتقاردى. «گازگيپروۆودحوز» ينستيتۋتىندا ديرەكتوردىڭ ورىنباسارى بولىپ بەس جىل جۇمىس ىستەگەندە دە سول مەكەمەدە ونىڭ قالدىرعان ءىزى سايراپ جاتىر. ونداعى ادامدار وسى ءبىر ءسوزى مەن ءىسى قاتار جۇرەتىن ازامات جايىندا جىر ايتقانداي اڭگىمە ايتادى.
ودان كەيىنگى جيىرما جىلدان اسا ۋاقىت تۋعان تابيعاتتىڭ جاناشىرى قىزمەتىنە ارنالعان. 1989 جىلدىڭ سوڭىندا ول قازاقستان اسسوتسياتسيالارى مەن كاسىپورىندارى ەكولوگيالىق وداعىنىڭ توراعاسىنا تاعايىندالسا, بۇگىنگە دەيىن سول ورىندا. ونى بۇل ورىننان اۋىستىرۋعا بولمايتىنداي كورىنەدى. جۇرت ونى «رەسپۋبليكانىڭ باس ەكولوگى», «حالىق ەكولوگى» اتايدى. سول تابيعات ءۇشىن تالايمەن تالاسادى, تالايمەن ايتىسادى. كەيدە مۇنىڭ بىرەۋلەرگە جاقپايتىنى دا بار. ال ەكولوگ ەلەۋسىزوۆ مۇنىڭ تۋعان تابيعاتقا جاعاتىنىن بىلەدى. بىلەدى دە العان بەتىنەن قايتپايدى.
قوعامدىق ءىسىن ايتپاساڭ, مەلس حامزا ۇلىنىڭ كەلبەتى جۇتاڭ تارتار ەدى. قازاقستان دەموكراتيالىق كۇشتەرى فورۋمىنىڭ تەڭ توراعاسى, ۇكىمەت جانىنداعى ءتۋريزمدى دامىتۋ كەڭەسىنىڭ مۇشەسى, پارلامەنت ءماجىلىسى قوعامدىق پالاتاسىنىڭ مۇشەسى, پرەمەر-ءمينيستردىڭ شتاتتان تىس كەڭەسشىسى. 2005 جىلى دا ءوز كانديداتۋراسىن ەل پرەزيدەنتتىگىنە ۇسىنعان...
سونىڭ بارىنە قالاي ۇلگەرەدى دەيسىڭ.
جاقسى ىستەردە ونىڭ ءىزى سايراپ جاتىر.
ماماديار جاقىپ.
الماتى.