قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىنا بايلانىستى رەسپۋبليكامىزدىڭ شەتەلدىك مەكەمەلەرى جانىنان قۇرىلعان سايلاۋ ۋچاسكەلەرىنىڭ ءبىرى قازاقستاننىڭ رەسەيدەگى ەلشىلىگىنىڭ رەزيدەنتسياسىندا ورنالاسقان. ماسكەۋدەگى بۇل №143 سايلاۋ ۋچاسكەسىندە ديپلوماتتار, ەلىمىزدىڭ تمد, ەۋرازەق, ۇقشۇ, كەدەن وداعى كوميسسياسى جۇيەسىندەگى وكىلدەرى, قازاقستاندىق ۇيىمدار مەن كومپانيالاردىڭ ماسكەۋدەگى وكىلدىكتەرىنىڭ قىزمەتكەرلەرى, ولاردىڭ وتباسى مۇشەلەرى, جوعارى وقۋ ورىندارىندا ءبىلىم الىپ جۇرگەن ستۋدەنتتەر مەن اسكەري كۋرسانتتار, وزگە دە قازاقستاندىق ازاماتتار داۋىس بەرەدى.
داۋىس بەرۋگە ارنالعان ءۇي-جاي تالاپقا ساي جابدىقتالعان. ءبىر تاقتاعا پرەزيدەنتتىككە كانديداتتاردىڭ فوتوسۋرەتى مەن ولار تۋرالى اقپارات ىلىنگەن. ورتالىق سايلاۋ كوميسسياسى بەلگىلەگەن قۇجاتتار جيىنتىعى, ۋچاسكەلىك سايلاۋ كوميسسياسىنىڭ قۇرامى ارناۋلى تاقتاعا ورنالاسقان. سايلاۋ كوميسسياسىنىڭ دەربەس بولمەسى بار, وندا كوميسسيا مۇشەلەرىنىڭ كۇن سايىنعى كەزەكشىلىگى ۇيىمداستىرىلعان. داۋىس بەرۋ ۋاقىتى مەن ورنى رەسەيلىك باق-تار ارقىلى سايلاۋشىلار نازارىنا جەتكىزىلدى.
شەتەلدىك مەكەمەلەردىڭ جانىندا قۇرىلعان سايلاۋ ۋچاسكەلەرى بويىنشا بەلگىلەنگەن تالاپقا سايكەس سايلاۋشىلار ءتىزىمىن تانىستىرۋعا بەرۋ ءۇشىن كوميسسيا مۇشەلەرى سايلاۋشىلار ءتىزىمىن ناقتىلاپ, پىسىقتاۋ ۇستىندە. سايلاۋشىلار اراسىنان بيىل تۇڭعىش رەت داۋىس بەرەتىن جاستار انىقتالۋدا. سايلاۋ كوميسسياسى وسى جاس سايلاۋشىلاردىڭ العاش رەت پايدالانعالى تۇرعان مەملەكەت باسشىسىن سايلاۋ قۇقىعىن ەستە قالدىرۋىنا قاتىستى ءىس-شارالاردى دا ويلاستىرۋدا.
بيىلعى پرەزيدەنتتىك سايلاۋ – حالىقتىڭ ءوز تاڭداۋى. مۇنى قازاقستاننان تىس جەردە تۇرىپ جاتقان ەل ازاماتتارى دا تەرەڭ سەزىنۋدە. سوعان وراي 3 ءساۋىر كۇنى اركىم ءوز جۇرەك قالاۋىمەن تاڭداعان كانديداتىن جاقتاپ داۋىس بەرۋگە دايىندالۋدا.
سەرىكقالي بايمەنشە, «ەگەمەن قازاقستان» – ماسكەۋدەن.
رەسەي فەدەراتسياسى.