تىرشىلىكتە كوبىنە ادامعا قىزمەتتەگى, وزگەلەرمەن قارىم-قاتىناستاعى مىنەز-قۇلقىنا بايلانىستى باعا بەرىلىپ جاتادى. ارينە, ول ەڭبەك كىتاپشاسىن جازىلمايدى. ءبىراق, حالىق بەرگەن ءادىل باعا رەتىندە قايدا بارما سوڭىڭنان «ىلەسىپ», قالماي بىرگە جۇرەدى.
ۇلكەندەردەن «مىنەزى كەدىر-بۇدىر ەكەن» دەگەندى ءجيى ەستيتىن ەدىك. سول كەزدە ونىڭ استارىنا كىم ۇڭىلگەن. كەمشىلىكتى بەتكە ايتىپ, ار-نامىسىن جوعارى ۇستايتىن, تاقۋا جانداردىڭ ورتاسىنا سىيلى بولاتىنىن سودان بەرى ءبىلىپ تە, كوز جەتكىزىپ تە كەلەمىز. بۇل – ءومىر مەكتەبىنەن العان ءتالىم. سودان بولار, مۇمكىندىگىنشە جاقسىلىققا جاقىن بولۋعا تىرىساسىڭ.
جالپى, ادام بالاسى وكىنبەيتىندەي ءومىر سۇرسە, قانە. ال, كوبىنە سول ارنادان اسىپ جاتاتىندىقتان سان سوعىپ, «اتتەگەن-اي» دەيسىڭ. حالقىمىزدىڭ «جاقسىلىق قىلساڭ وزىڭە, جاماندىق قىلساڭ وزىڭە, اسپانعا قاراي وق اتساڭ, قايتىپ تيەر كوزىڭە» دەگەن ءتامسىلى ەسكە تۇسەدى وسىندايدا. سوندا ءبىزدىڭ جاقسىلىقتان الشاق كەتەتىنىمىز نەلىكتەن, دەگەن سۇراق كوكەيدە كولدەنەڭ تۇرادى.
نەلىكتەن... ويتكەنى, اتا-بابامىز «جاماندىقتا – تەك جوق, جاۋىزدىقتا – شەك جوق» دەگەن. ادام ءوز مىنەز-قۇلقىنا باقىلاۋ جاساپ, كەلەڭسىزدىككە توسقاۋىل قويسا عوي. كەرىسىنشە ەركىنە, سەزىمىنە يە بولماي, ورتاسىن سىيلاماۋى وپىق جەگىزەدى. وعان ورىنسىز ماقتانۋ, ءوتىرىك ءسويلەۋ, تاكاپپارلىق, تاعىسىن تاعى كەلەڭسىزدىكتەردى قوسىڭىز. وسى مىنەزدەن پەندەنىڭ ءوزى عانا ەمەس, وزگەلەر دە جاپا شەگەدى. ەڭ نەگىزگىسى – ءوسكەلەڭ ۇرپاققا «ونەگە» بولاتىندىعى.
جاستاردىڭ اعا بۋىنعا ەلىكتەيتىنى زاڭدىلىق. اسىرەسە, ۇلكەندى-ۇساقتى مەكەمە تىزگىنىن ۇستاعانداردىڭ بويىنان جاقسى قاسيەت, ادامعا دەگەن ىزگى نيەت ىزدەيتىن جۇرت وعان ەرەكشە سەزىمتالدىقپەن قارايتىنىن جاسىرمايمىز. ىزگىلىگىنە العىسىن ءۇيىپ-توگەدى, ال جانى جارالانسا, قاراداي تۇڭىلەدى.
جاقسىلىق پەن جاماندىق – ەگىز دەگەندى ءجيى ايتامىز. دەسەك تە وعان كوبىنە ءوزىمىز جول بەرەتىنىمىز بار. ومىردە بەتپە-بەت كەلىپ, جاقسىمەن جانىمىز نۇرلانسا, جاماندىقتان ەڭسە تۇسەدى. ءتىپتى, ونىڭ ۇلكەن-كىشىسى بولمايتىنىن دا ايتقان پارىز. ءبىر اۋىز ءسوز – بيىككە دە كوتەرەدى, قۇزعا دا قۇلاتادى دەمەي مە ءان جولدارىندا.
كۇندەلىكتى ايالدامادا, قوعامدىق كولىكتە, قىزمەتتە, تاعىسىن-تاعى جايلاردا ءبىر-ءبىرىنىڭ جانىن جابىرقاتاتىن ساتتەردىڭ سيرەك بولعانىن كىم قالاماسىن. تۇپ-تۇنىق كوڭىلىڭدى جايسىز تولقىن ۇرسا, ءوزىڭدى سابىرعا شاقىرۋىڭا تۋرا كەلەدى. جاقسىلىققا جاقىن, جاماندىقتان الىس بولساق, مىنا ءومىردىڭ نۇرلى كۇنى كوپ بولاتىنى ءوزىمىزدەن ەكەنىن ۇمىتپايىق, اعايىن.
كۇمىسجان بايجان.
الماتى وبلىسى.