كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى ق.ساۋداباەۆ اقش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى بويىنشا كومەكشىسى ر.بلەيكتى قابىلدادى, دەپ حابارلادى ءسىم-ءنىڭ ءباسپاسوز قىزمەتى.
تاراپتار قازاقستان مەن اقش حالىقتارىنىڭ ءال-اۋقاتىن ارتتىرۋ مەن ءوزارا ءتيىمدى ارىپتەستىكتى دامىتۋ, قاۋىپسىزدىك, بەيبىتشىلىكتى نىعايتۋعا باعىتتالعان جانە ورتاق قۇندىلىقتار مەن مۇددەلەرگە نەگىزدەلگەن ەكى ەلدىڭ ستراتەگيالىق ارىپتەستىگىنىڭ قارقىندى دامۋ سيپاتىنا كوڭىلدەرى تولاتىندىقتارىن ءبىلدىردى.
2010 جىلى ءساۋىر ايىنداعى پرەزيدەنت نۇرسۇلتان نازارباەۆتىڭ اقش-قا ساپارى جانە ونىڭ اقش پرەزيدەنتى باراك وبامامەن جۇرگىزگەن كەلىسسوزدەرى, سونداي-اق اقش مەملەكەتتىك حاتشىسى حيللاري كلينتوننىڭ استاناداعى ەقىۇ سامميتىنە قاتىسۋى اتالعان ارىپتەستىككە ماڭىزدى سەرپىن بەرگەندىگى اتاپ ءوتىلدى.
وسى رەتتە قازاقستان سىرتقى ساياسات ۆەدومستۆوسىنىڭ باسشىسى قۇراما شتاتتاردىڭ 2010 جىلى قازاقستاننىڭ ەقىۇ-عا توراعالىعى تۇسىندا كورسەتكەن دايەكتى جانە بەرىك قولداۋلارىنا العىسىن بىلدىرە وتىرىپ, وسىناۋ مارتەبەلى لاۋازىمداعى قازاقستاننىڭ تابىستارى اقش-پەن قوسا, ەقىۇ-نىڭ بارلىق 56 مۇشە مەملەكەتتەرىنىڭ جاردەمى ارقاسىندا مۇمكىن بولعاندىعىن جەتكىزدى.
اڭگىمەلەسۋشى تاراپتار پىكىرىنشە, ناتيجەسىندە استانا دەكلاراتسياسىنا قول جەتكىزىلگەن قازاقستاننىڭ ەقىۇ-عا جەمىستى ءتوراعالىعى ۆانكۋۆەردەن ۆلاديۆوستوكقا دەيىنگى ايماقتاعى قاۋىپسىزدىك پەن ىنتىماقتاستىقتىڭ نىعايۋىنا سەپتىگىن تيگىزىپ قانا قويماي, قازاقستاننىڭ ءىشىندەگى دەموكراتيالىق دامۋ ۇدەرىستەرىن قارقىنداتتى. حالىقارالىق تالاپتارعا ساي ءوتكىزۋگە بارلىق جاعداي جاسالعان 3 ساۋىردە وتەتىن كەزەكتەن تىس پرەزيدەنتتىك سايلاۋ دەموكراتيالىق دامۋ جولىنداعى جاڭا ماڭىزدى قادام بولىپ تابىلادى.
وتاندىق ءسىم باسشىسىنىڭ ويىنشا, قازاقستان – اقش جىل سايىنعى ساياسي كەڭەستەرىنىڭ وتكىزىلۋى جاقسى داستۇرگە اينالۋدا, قازاقستان تاۋەلسىزدىگىنىڭ 20 جىلدىعى مەن ەكى ەل اراسىنداعى ديپلوماتيالىق قاتىناستاردىڭ 20 جىلدىعى اياسىندا بۇل كەڭەستىڭ كۇن ءتارتىبى ايماقتىق ينتەگراتسيا, قازاقستاننىڭ يكۇ-عا توراعالىعى مەن ونىڭ شىعىس-باتىس ۇنقاتىسۋىن ورنىقتىرۋداعى ورنى, ايماقتىق بىرلەستىكتەردىڭ دامۋ تۇسىنداعى ىنتىماقتاستىق, عالامدىق ازىق-ت ۇلىك قاۋىپسىزدىگى, عىلىمي-تەحنيكالىق ىنتىماقتاستىق سەكىلدى جاڭا ءوزارا تارتىمدى باعىتتارمەن تولىقتى.
تاراپتار ورتالىق ازياداعى ماسەلەلەردى قاراستىرا وتىرىپ, اۋعانستان مەن قىرعىزستانداعى اعىمداعى جاعدايلار جونىندە دە پىكىر الماستى.