قورعانىس مينيسترلىگىندە زاپاستاعى گەنەرالدار مەن وفيتسەرلەردىڭ باستاماسىمەن «قازاقستان رەسپۋبليكاسى قارۋلى كۇشتەرى ارداگەرلەرى» قوعامدىق بىرلەستىگىنىڭ قۇرىلتاي جيىنى ءوتتى. وعان قورعانىس ءمينيسترى ادىلبەك جاقسىبەكوۆ پەن پارلامەنت سەناتىنىڭ دەپۋتاتى مۇحتار التىنباەۆ قاتىستى.
بۇل بىرلەستىك بولاشاقتا رەسپۋبليكالىق مارتەبەگە يە بولىپ, ونى قۇرۋعا ەلىمىزدىڭ بارلىق وبلىستارى مەن استانا, الماتى قالالارىنان دەلەگاتتار قاتىسپاق. جيىندا قوعامدىق ءبىرلەستىكتىڭ توراعاسى بولىپ حالىق قاھارمانى, گەنەرال-لەيتەنانت باقىتجان ەرتاەۆ سايلاندى.
باقىتجان ەرتاەۆ ۇيىمدى قۇرۋداعى نەگىزگى ماقسات قارۋلى كۇشتەردىڭ ارداگەرلەرى مەن ولاردىڭ وتباسى مۇشەلەرىنىڭ ءمۇددەسى مەن قۇقىعىن قورعاۋ بولىپ تابىلاتىنىنا توقتالدى. سونداي-اق, ۇرپاقتار ساباقتاستىعىن قالىپتاستىرىپ, وفيتسەرلىك كورپۋستىڭ كاسىبي دايىندىعىن ارتتىرۋدا ءتول اسكەرىمىزگە ءجاردەمدەسۋ, اعا بۋىننىڭ جاۋىنگەرلىك داستۇرلەرىن جالعاستىرىپ, جاستاردى اسكەري-پاتريوتتىق رۋحتا تاربيەلەۋ, دەدى.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ وكىلى.