ەلىمىزدە «قازاقستاندا جاسالعان» برەندىن باسقارۋ اگەنتتىگى قۇرىلدى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسىنىڭ پرەزيدەنتى ريمما تاجىباەۆا ءمالىم ەتتى, دەپ حابارلايدى قازاقپارات.
جاڭا اگەنتتىكتىڭ اياسىندا «ەكسپو-2017» كورمەسىنە ارناپ, «حالىق ماركاسى» 100 ۇلتتىق برەندتى قۇرۋ جوباسى جۇزەگە اسىرىلادى. اتالمىش جوباعا تانىمال ارتىستەر, سپورتشىلار مەن دەپۋتاتتار دا قاتىسپاق. جاڭا 100 ۇلتتىق برەند تاماق ونەركاسىبى, جيھاز, ءۇي قاجەتتىلىكتەرى, كيىم-كەشەك جانە اياق كيىم سالالارىندا پايدا بولادى دەپ كۇتىلۋدە. ولاردىڭ بارلىعى استاناداعى «ەكسپو» حالىقارالىق كورمەسىندە ۇسىنىلادى. «اگەنتتىكتى قۇرۋ مەنىڭ ءوزىمنىڭ باستامام. ەشقانداي مەملەكەتتىك ورگان وعان قارجى سالىپ وتىرعان جوق. مەن بۇنىڭ الدىندا «ەكسپو» الاڭىندا جۇمىس جاسادىم جانە مۇنداي شارالاردىڭ ەل ءۇشىن قانداي پايدا اكەلەتىنىن بىلەمىن. مەن ەكسپو-دان كەتىپ, ءوزىمنىڭ جوبامدى اشتىم. ەكى جىل بۇرىن قولعا الىنعان بۇل جوبا قازىر ءساتتى جۇزەگە اسىرىلۋدا. العاش قادامىمدى باستاعاندا مەندە تەك يدەيا عانا بار بولاتىن. جەكە قاراجاتتارىم بولعان جوق. قازىر ەكى جىلدىڭ ىشىندە قازاقستاندىق برەندتەردى ۇيىمداستىرۋ ارقىلى ولاردى دامىتىپ قانا قويماي, قارجىلىق تۇرعىدا دا جەتىستىكتەرگە جەتتىم», - دەيدى فەدەراتسيا پرەزيدەنتى.