اقتوبە وبلىسىندا ەل تاۋەلسىزدىگىنىڭ 25 جىلدىعىن كەڭىنەن مەرەكەلەۋ اياسىندا اۋقىمدى شارالار وتكىزىلۋدە.
وسى شارالاردا قازاقستاننىڭ ەگەمەندىك العان جىلدارداعى جەتىستىكتەرى مولىنان قامتىلۋدا. «نۇروتان» پارتياسى وبلىستىق فيليالىندا وسىنداي ماڭىزدى تاريحي وقيعالارعا, ەل ومىرىندەگى ەلەۋلى ساتتەرگە ارنالعان « ۇلى دالا ەلى -تاۋەلسىزدىكتىڭ 25 نەگىزى» اتتى 25 تاقىرىپتىق كۇننىڭ سالتاناتتى اشىلۋى ءوتتى. اتالمىش شاراعا سوعىس جانە ەڭبەك ارداگەرلەرى, قالانىڭ قۇرمەتتى ازاماتتارى, مەملەكەتتىك مەكەمەلەردىڭ, قوعامدىق ۇيىمداردىڭ, كاسىپورىندار مەن كاسىپكەرلىك, شىعارماشىلىق قوعامداستىق وكىلدەرى, سپورتشىلار مەن جاستار قاتىستى. -بيىل قازاقستان رەسپۋبليكاسىنىڭ 25 جىلدىعىن اتاپ وتپەكپىز. وسى كەزەڭدە ءبىز كوپ نارسەگە قول جەتكىزدىك. ەڭ باستىسى, كوپۇلتتى قازاقستان حالقى بەيبىت ءومىر كەشۋدە. ءارتۇرلى ەكونوميكالىق, ساياسي داعدارىستارعا قاراماستان حالقىمىزدىڭ داۋلەتتىلىگى ارتىپ, تۇرمىسى جاقسارىپ كەلەدى. وسىنىڭ بارلىعى مەملەكەت باسشىسى نۇرسۇلتان نازارباەۆتىڭ جۇرگىزىپ وتىرعان سارابدال ساياساتىنىڭ ارقاسى دەۋ ورىندى بولماق. وسى ساتتەن باستاپ ءوڭىردىڭ بارلىق ەلدى مەكەندەرىن قامتيتىن 25 جۇلدىزدى كۇن باستاۋ الدى. جىل باسىنان بەرى تاۋەلسىزدىكتىڭ 25 جىلدىعى اياسىندا 4 مىڭنان استام شارا ۇيىمداستىرىلدى. ءبىزدىڭ باستى مىندەتىمىز – ءار ادامعا, سونىڭ ىشىندە كومەكككە مۇقتاج جاندارعا مەملەكەتتىڭ قولداۋىن سەزدىرۋ. سول كەزدە عانا ءبىز ءبىر وتباسى, ءبىر مەملەكەت ەكەنىمىزدى كورسەتەمىز,-دەي كەلىپ بەردىبەك ساپارباەۆ جيىنعا قاتىسۋشىلاردى تاۋەلسىزدىك مەرەيتويىمەن قۇتتىقتادى.
بۇدان كەيىن زالعا م.بوكەنباەۆ اتىنداعى اقتوبە زاڭ ينستيتۋتىنىڭ كۋرسانتتارى مەملەكەتتىك ەلتاڭبا مەن تۋدى اكەلدى. جيىنعا قاتىسۋشىلار ورىندارىنان تىك تۇرىپ, ەسترادالىق-ۇرلەمەلى اسپاپتار وركەسترىنىڭ سۇيەمەلدەۋىمەن ەلىمىزدىڭ ءانۇرانىن ورىندادى. مەرەكەلىك باعدارلاما «25 جۇلدىزدى كۇن» كومپوزيتسياسىمەن باستالىپ, «ۇلتتىق مەملەكەتتىك رامىزدەر», «يادرولىق قارۋسىز الەم», «ۇلتتىق ۆاليۋتا», «مەملەكەتتىك ءتىل», «وتباسىلىق قۇندىلىقتار», «عىلىم مەن جاڭا تەحنولوگيالار», «سپورت جەتىستىكتەرى» جانە باسقا تاقىرىپتىق قويىلىمدارمەن جالعاستى. باعدارلامانىڭ «وتباسىلىق قۇندىلىقتار» تاقىرىپتىق بولىگىندە «مەرەيلى وتباسى» ۇلتتىق بايقاۋىنىڭ جەڭىمپازدارى - نۇسقاباەۆتار اۋلەتى ساحنا تورىنە كوتەرىلدى. جۇبايىمەن 72 جىل وتاسىپ, 10 بالا ءوسىرىپ, تاربيەلەگەن, ولاردان 31 نەمەرە مەن 22 شوبەرە ءسۇيىپ وتىرعان ابدوللا نۇسقاباەۆ اقساقال جينالعاندارعا ءوزىنىڭ ىزگى تىلەگىن جەتكىزىپ, اق باتاسىن ارنادى. بالالار ۇيىنەن 11 بالا اسىراپ العان ءومىرحان جانە امانگۇل جەتەسوۆتەر بالالارىمەن بىرگە ونەر كورسەتتى. جالپى جۇلدىزدى كۇندەر وتەتىن 21 قاراشا مەن 15 جەلتوقسان اراسىندا تەك اقتوبە قالاسىندا عانا 200-دەن اسا اۋقىمدى مادەني-كوپشىلىك, الەۋمەتتىك-ماڭىزدى شارالار ۇيىمداستىرىلادى, 37 وندىرىستىك جانە الەۋمەتتىك نىساندار پايدالانۋعا بەرىلەدى دەپ كۇتىلۋدە. مەرەيتويلىق سالتاناتقا ارنالعان شارالار بارلىق اۋدانداردا دا وتكىزىلەدى. شارا سوڭىندا «نۇروتان» پارتياسى وبلىستىق فيليالى عيماراتى الدىندا جاستار مەن بالالار كوك اسپانعا 25 مىڭ شاردى اۋەلەتە ۇشىردى.
ساتىبالدى ءساۋىرباي,
«ەگەمەن قازاقستان».
سۋرەتتەردى تۇسىرگەن حايرەدەن راۋشانوۆ اقتوبە.