تۇندە 2 مىڭنان استام پاۆلودارلىق جارىقسىز قالدى. الدىمەن تۇرعىندار وبلىس ورتالىعىنداعى قوسالقى ستانتسيالاردىڭ ىستەن شىققانىنا شاعىمدانعان. سالدارىنان پاۆلودار قالاسىنىڭ لوموۆ, كۋتۋزوۆ, كاتاەۆ, امانگەلدى, تەپلوۆ جانە گاگارين كوشەلەرىنىڭ 2301 تۇرعىنى مەن 79 زاڭدى تۇلعا جارىقسىز قالدى, قازىرگى تاڭدا اپات ورىندارىندا كاسىپورىننىڭ 3 بريگاداسى, ەلەكتروتەحنيكالىق زەرتحانا ماماندارى جۇمىس ىستەپ جاتىر, دەپ حابارلايدى Bnews.kz.
«پاۆلودارەنەرگو» اق قوعاممەن بايلانىس ءبولىمىنىڭ مالىمەتىنشە, «قالانىڭ ورتالىق» قوسالقى ستانتسياسىندا اپات بولعان.
«21 قاراشادا تۇنگى ساعات 22.04-تە «ورتالىق قالالىق» قوسالقى ستانتسياسى ىستەن شىقتى. سالدارىنان, پاۆلودار قالاسىنىڭ وڭتۇستىك بولىگىنە ەلەكتر ەنەرگياسى بەرىلگەن جوق. «پرەك» اق بريگادالارى ەكى ساعات بويى اپات سالدارىن جويۋ جۇمىسىن اتقاردى. جوندەۋ جۇمىستارى بارىسىندا №443 قوسالقى ستانتسياسىنا قوسىلعان قۋاتى 10 كۆت كابەلدىڭ زاقىمدانعانى انىقتالدى. بۇل قوسالقى ستانتسيا اتالعان كاسىپورىنعا تيەسىلى بولماعاندىقتان, جوندەۋ جۇمىستارىنان باس تارتتى. سوندىقتان, ءدال قازىر تاعى 7 نىسان جارىقسىز وتىر. ولاردىڭ قاتارىندا ءورت ءبولىمى, بالاباقشا مەن تۇرعىن ۇيلەر بار», – دەيدى «پالۆودارەنەرگو» اق قوعاممەن بايلانىس ءبولىمىنىڭ مامانى ولەسيا ەمەليانوۆا.
ايتا كەتەيىك, تۇرعىنداردى جارىقپەن قامتۋ ماقساتىندا «پرەك» اق جوندەۋ جۇمىستارىن ءوز موينىنا الدى. قازىرگى تاڭدا اپات ورىندارىندا كاسىپورىننىڭ 3 بريگاداسى, ەلەكتروتەحنيكالىق زەرتحانا ماماندارى جۇمىس ىستەپ جاتىر.