فۋتبولدان ەلىمىزدىڭ باس جاتتىقتىرۋشىسى تالعات بايسۋفينوۆ وتستاۆكاعا كەتپەيدى, دەپ حابارلايدى قازاقستان فۋتبول فەدەراتسياسىنىڭ ءباسپاسوز قىزمەتى.
اتالعان فەدەراتسيانىڭ حاتشىسى قانىش اۋباكىروۆ باس باپكەرگە قاتىستى ەل ىشىندەگى الىپ-قاشپا اڭگىمەلەرگە وراي پىكىر ءبىلدىردى.
«جاڭا باپكەردى ىزدەۋ بويىنشا ەشقانداي جۇمىستار جۇرگىزىلىپ جاتقان جوق. ۇلتتىق قۇراماعا شەتەلدىك ماماننىڭ ىزدەستىرىلىپ جاتقانى تۋرالى قاۋەسەتتەردىڭ بارلىعى جورامال عانا. تالعات بايسۋفينوۆ كوماندانى جاتتىقتىرۋدى جالعاستىرادى جانە ءبىرىنشى قۇرامامىزدىڭ باپكەرلىك شتابىنىڭ باسشىسى بولىپ قالا بەرەدى», – دەدى ول.
ايتا كەتەيىك, باس باپكەردىڭ ءوز ورنىنان كەتەتىنى جايلى قاڭقۋ سوزدەر ۇلتتىق قۇرامامىز دانيا (1:4) مەن چەرنوگورياعا (0:5) قارسى ىرىكتەۋ ماتچتارىندا جەڭىلگەننەن كەيىن ايتىلعان بولاتىن. جالپى, تالگات بايسۋفينوۆ قازاقستان قۇراماسىنىڭ باس باپكەرى بولىپ وسى جىلدىڭ باسىندا تاعايىندالدى. ونىڭ جەتەكشىلىگىمەن كوماندا 8 كەزەدسۋ وتكىزدى (2 جەڭىس, 3 تەڭ ويىن جانە 3 جەڭىلىس).