عيبراتقا تولى ءومىرىن وتانىنىڭ قاۋىپسىزدىگى مەن دامىپ, ورلەۋىنە ارناعان, حالقىنىڭ سەنىمىن اقتاپ, ىقىلاسىنا يە بولعان تۇلعالاردىڭ ءبىرى - اسكەري-ۇشقىش, ارميا گەنەرالى, حالىق قاھارمانى مۇحتار التىنباەۆ.
مۇحتار قاپاش ۇلى قاراپايىم جۇمىسشى وتباسىندا تۋعان. ول قازاق ورتا مەكتەبىنىڭ 10-11-سىنىپتا وقىپ جۇرگەن كەزدە-اق اەروكلۋبقا بارىپ شاعىن ۇشاقتارمەن ۇشادى. بولاشاق ۇشقىش ءوزىنىڭ ەڭبەك جولىن 17 جاسىندا شاحتادا كومىر قازىپ جۇمىسشى بولۋدان باستادى. قاراعاندىلىق جاس جىگىت التى جىلداي جەر استىندا اۋىر ەڭبەكپەن اينالىسىپ جۇرگەن كەزدە دە, اۋەدە ۇشۋ ارمانى ويىنان كەتپەدى. قول ەڭبەگىمەن اينالىسىپ جۇرسە دە, ۇشقىشتاردى دايىندايتىن اسكەري ورتالىقتان قول ۇزبەيدى. ءسويتىپ زاپاستاعى كىشى-لەيتەنانت شەنىنە يە بولادى.
24 جاسىندا بالالىق شاعىنان كەلە جاتقان ارمانى جەتەلەپ, كراسنودار ولكەسىنىڭ ارماۆير قالاسىنداعى ۇشقىشتار اسكەري ۋچيليششەسىنە تۇسەدى. تاڭداعان ماماندىعىنا قولى جەتكەن جىگىت وقۋدى ۇزدىك بىتىرەدى. بۇدان كەيىن تۆەر قالاسىنداعى مارشال گ.ك.جۋكوۆ اتىنداعى 1985 ج. اشق اسكەري كوماندالىق اكادەمياسىن قىزىل ديپلوممەن اياقتايدى. اسكەري ەڭبەك جولىندا وداق قالالارىندا اسكەري تاپسىرمالارمەن ەلدەن جىراقتا ءومىر ءسۇرىپ, اسكەري يسترەبيتەل ۇشاقتاردىڭ سان تۇرلەرىن باسقارۋدى يگەرەدى. ول وتانىمىزدىڭ قارۋلى كۇشتەر سالاسىندا 40 جىلعا جۋىق قىزمەت اتقارعان تاجىريبەلى باسشى. م.قاپاش ۇلى بىردە تەلەارنادان بەرگەن سۇحباتىندا: «ادام ءوز جاساعان ىسىنە كوڭىلى تولىپ جايباراقات جۇرەتىن بولسا, ول توقىراي باستايدى. سوندىقتان قانداي بيىككە قول جەتكىزسەڭ دە, ءوز ىسىڭدەگى كەمشىلىكتەردى كورىپ, ونى تۇزەتۋ ءۇشىن العا قاراي ۇمتىلا ءبىلۋ كەرەك», دەدى.
اسكەري-كاسىبي ەڭبەك جولىن اعا ۇشقىشتان باستاپ, 1992 ەلگە ورالعان سوڭ قازاقستان رەسپۋبليكاسىنىڭ قورعانىس مينيسترىنە (1996, 2001) دەيىنگى وتە جاۋاپتى قىزمەتتەردى ابىرويمەن اتقاردى. سول جىلدارى ۋرالسك اسكەري وكرۋگى اۋە شابۋىلىنا قارسى قورعانىس اۆياتسياسى پولكىنىڭ كومانديرى بولىپ تاعايىندالعاندا م.التىنباەۆ باسشىلىعىنداعى پولك كسرو-داعى ەڭ جوعارى دەڭگەيدەگى ۇزدىك پولك بولعان ەكەن. شەتەل ماماندارى ونىڭ كاسىبي شەبەرلىگىن جوعارى باعالادى.
حالىق قاھارمانى باقىتجان ەرتاەۆ مۇحتار اعا تۋرالى: «ول جول تاۋىپ ءوزىنىڭ بۇيرىعىن ورىنداتا بىلەدى, ءوزىن سىيلاتا بىلەدى. مىنەزىندە ديپلوماتتىعى مەن جاۋاپكەرشىلىككە قاتالدىعى دا بار. بويىندا ادامگەرشىلىگى جوعارى» دەگەن باعاسى كورەرمەننىڭ ەسىندە.
مۇحتار قاپاش ۇلى حالىق قالاۋلىسى, ەلىنىڭ ماقتانىشى, پاتريوت تۇلعا. ونىڭ ابىرويمەن اتقارعان اسكەري قىزمەت جولى وسكەلەڭ ۇرپاقتىڭ ەلىنىڭ ادال ۇلى, ازاماتى بولىپ وسۋىنە ۇلگى بولماق. قازاقستاننىڭ قورعانىس سالاسىنىڭ بەكىپ, نىعايۋىنا وراسان ۇلەس قوسقان تۇلعانىڭ ءبىرى جانە بىرەگەيى. 2010 جىلدان ەلباسىنىڭ جارلىعىمەن قر پارلامەنتى سەناتىنىڭ دەپۋتاتى بولىپ تاعايىندالدى.
ەلىنىڭ ەر ۇلاندارىنىڭ وتان الدىنداعى اتقارعان پارىزىن جاس ۇرپاققا, ورتامىزدا ناسيحاتتاۋدى ۇلتتىق «تابىستىڭ 100 قادامى» جوباسى ءوزىنىڭ ماقساتى ەتىپ قويدى.
باقىت جولدىبايقىزى