بۇگىن قر پرەمەر-ءمينيسترى ب.ساعىنتاەۆتىڭ توراعالىعىمەن وتكەن ۇكىمەت وتىرىسىندا «قر كەيبىر زاڭنامالىق اكتىلەرىنە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.
ەنەرگەتيكا ءمينيسترى قانات بوزىمباەۆ ءوز بايانداماسىندا اتاپ وتكەندەي, زاڭ جوباسى مەملەكەت باسشىسىنىڭ «100 ناقتى قادام» ۇلت جوسپارىنىڭ» 51-قادامىندا ايقىندالعان مىندەتتەردى ىسكە اسىرۋ ماقساتىندا ازىرلەنگەن.
- وسى زاڭ جوباسىن ازىرلەۋدەگى نەگىزگى ماقسات – ەنەرگيا بەرۋشى ۇيىمداردىڭ سانىن قىسقارتۋ. اعىمداعى جىلعى 1 قاراشاداعى جاعداي بويىنشا, ولاردىڭ سانى ءجۇز الپىستى قۇرايدى. سونىڭ ىشىندە جۇيەلىك وپەراتور - «KEGOC» اكتسيونەرلىك قوعامىن, 19 وڭىرلىك ەلەكتر جەلىلىك كومپانيانى, 27 مەملەكەتتىك كاسىپورىندى جانە 113 شاعىن جانە ورتا ەنەرگيا بەرۋشى ۇيىمدى اتاپ وتۋگە بولادى,- دەدى مينيستر.
ق.بوزىمباەۆ ءوز بايانداماسىندا بۇل قۇجاتتىڭ بىرقاتار ەرەكشەلىگىن اتاپ ءوتتى.
- زاڭ جوباسىندا كورسەتىلگەن مەحانيزمدەردى ىسكە اسىرۋ ەنەرگيا بەرۋشى ۇيىمداردى ىرىلەندىرۋگە مۇمكىندىك بەرەدى. بۇل ءوز كەزەگىندە ەنەرگيا بەرۋشى ۇيىمدار سانىنىڭ ازايۋىنا, ەنەرگيامەن جابدىقتاۋ سەنىمدىلىگىن ارتتىرۋعا, ەلەكتر ەنەرگياسىن بەرۋ قىزمەتى ءۇشىن تولەم ەنگىزۋ بويىنشا تۇتىنۋشىلار شىعىندارىنىڭ ازايۋىنا, يەسىز ەلەكتر جەلىلەرىن ەنەرگيا بەرشى ۇيىمداردىڭ بالانسىنا بەرۋگە اكەلەدى,- دەدى ەنەرگەتيكا ءمينيسترى.
اعىمداعى جىلعى قازان ايىندا ۇكىمەت جانىنداعى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا زاڭ جوباسىنىڭ جاڭارتىلعان تۇجىرىمداماسى ماقۇلدانعان بولاتىن. وسى قۇجات بويىنشا تۇجىرىمدامانى قاراۋ العاش رەت بۇقارالىق اقپارات قۇرالدارىنىڭ قاتىسۋىمەن وتكەندىگىن اتاپ وتكەن ءجون.
ارنۇر اسقاروۆ,
"ەگەمەن قازاقستان".