ۇكىمەتتە پرەمەر-مينيستر باقىتجان ساعىنتاەۆتىڭ توراعالىعىمەن وتكەن وتىرىستا ءبىلىم جانە عىلىم ءمينيسترى ەرلان ساعاديەۆ ۇبت-نىڭ جاڭا فورماتىنىڭ ەرەكشەلىكتەرى تۋرالى باياندادى.
ە.ساعاديەۆتىڭ ايتۋىنشا, مينيسترلىك قورىتىندى اتتەستاتسيالاۋدى ءبولۋ جۇمىستارىن جۇرگىزگەن. ەندى تۇلەكتەر مەكتەپتى ءبىتىرۋ سىناعىن جانە جوو-عا قابىلداۋ ەمتيحانى رەتىندە ۇبت تاپسىرادى. مەكتەپتەگى قورىتىندى اتتەستاتسيا 5 پاننەن تۇرادى, ونىڭ 4-ءۋى مىندەتتى, 1 ءپان - تاڭداۋ بويىنشا.
ۇبت جوو-عا قابىلداۋ ەمتيحانى جانە مەملەكەتتىك گرانتتاردى ءبولۋ جۇيەسى رەتىندە ساقتالادى, بىراق ونىڭ فورماتى وزگەرەدى. بۇرىن 5 پاننەن 125 سۇراق بەرىلىپ, ونىڭ ىشىنەن 4 ءپان بويىنشا 100 سۇراق ەسەپتەلەتىن. ال 2017 جىلعى ۇبت فورماتىندا 120 سۇراق قاراستىرىلىپ, بارلىعى ەسەپتەلەدى. كەيبىر سۇراقتاردىڭ جاۋابىنا 2 بالل بەرىلەتىندىكتەن, ەڭ جوعارعى كورسەتكىش – 140 بالعا تەڭ. ساۋالدار 5 پاننەن قويىلادى, ولاردىڭ 3-ءى مىندەتتى, 2-ءۋى تالاپكەر جوسپارلاعان جوو-داعى ماماندىققا بايلانىستى بەيىندىك ءپان بولادى. تەستىلەۋ ۋاقىتى دا وزگەرمەيدى – 3 ساعات 30 مينۋت. ءوتۋ بالى دا وزگەرگەن جوق - 50 بالل.
2017 جىلى ۇبت 20 ماۋسىم مەن 1 شىلدە ارالىعىنلا وتەدى, سونداي-اق تۇلەكتەرگە ونى 2017 جىلدىڭ تامىزى مەن 2018 جىلدىڭ قاڭتارىندا قايتا تاپسىرۋعا مۇمكىندىك بەرىلەدى.
ءبىر ايتا كەتەرلىگى, ۇبت بەيىندىك پاندەرى 20 ساۋال مەن ونىڭ بەس ءتۇرلى جاۋاپ نۇسقاسىنان تۇرادى. سونىمەن قاتار, تۇلەكتەرگە 10 تاپسىرما بەرىلىپ, ونىڭ كوپتەگەن جاۋاپتارىنىڭ ىشىنەن دۇرىستارىن تاڭداۋ ۇسىنىلادى. بەيىندىك پاندەردى تەستىلەۋدەگى جاۋاپتاردىڭ بىرنەشە نۇسقاسىنىڭ بولۋى تالاپكەردىڭ ناقتى تاقىرىپتى قانشالىقتى جاقسى بىلەتىندىگىن تەكسەرۋگە مۇمكىندىك بەرەدى. سونداي-اق بىرنەشە جاۋاپ نۇسقاسى ارقىلى تەستىلەۋ جاۋاپتاردى كەزدەيسوق بەلگىلەۋدى بولدىرماۋعا كومەكتەسەدى.
ارنۇر اسقاروۆ,
"ەگەمەن قازاقستان".