قىزىلوردا وبلىسىنىڭ ارال اۋدانىندا جاس كاسىپكەر شىنى پلاستيكتەن ەسكەكتى قايىق شىعاراتىن كاسىپكورىندى ىسكە قوسىپ, ءوندىرىستى جونگە قويدى, دەپ حابارلادى قازاقپارات.
وسىدان ەكى جىل بۇرىن كاسىپكەر جانسەرىك نىسانباەۆ «بيزنەستىڭ جول كارتاسى 2020» مەملەكەتتىك باعدارلاماسىنىڭ تيىمدىلىگىن پايدالانا وتىرىپ, كورپۋستى قاتقىل جيھاز شىعاراتىن تسەح اشقان بولاتىن. بۇگىندە ول كاسىبىن كەڭەيتىپ قانا قويماي, ونى ارتاراپتاندىرۋعا مۇمكىندىك الىپ وتىر. ناقتى ايتقاندا «قازاقستان حالىق بانكىنەن» 13,5 ملن تەڭگە نەسيە راسىمدەپ, «دامۋ» قورىنىڭ 44 پايىزدىق كەپىلدەندىرۋىمەن جاڭا جوبانى جۇزەگە اسىردى.
«ارال اۋدانىنداعى حالىقتىڭ نەگىزگى قىزمەتى بالىق شارۋاشىلىعى بولعاندىقتان, قايىققا دەگەن سۇرانىس ۇنەمى جوعارى دەڭگەيدە. سوندىقتان دا ءبىز ايىنا 3 قايىق جاساپ شىعارىلۋدامىز. جيھاز جاساۋ سالاسىندا تاجىريبەم بولعاندىقتان, مەن شىنى پلاستيكتەن قايىق جاساۋ تۋرالى عالامتوردان العان مالىمەتتەردى تەز ۇعىندىم. بەلگىلى بولعانداي, ءادىسىن تاپساڭ, ساپالى قايىقتى جاساۋ اسا قيىن ەمەس ەكەن. شىنى پلاستيكتەن شىققان قايىقتار وتە جەڭىل, بىراق مىقتى بولىپ كەلەدى. ولاردى اعاش پەن مەتاللدان جاسالعان قايىقپەن سالىستىرعاندا الدەقايدا كوپ مەرزىم پايدالانۋعا جارايدى», – دەيدى كاسىپكەر جانسەرىك نىسانباەۆ.
ءوندىرىستى كەڭەيتۋدىڭ ناتيجەسىندە كاسىپكەر قوسىمشا 3 جاڭا جۇمىس ورنىن اشىپ, قاراماعىنداعى جۇمىسشىلار سانىن 10-عا جەتكىزدى. شاعىن كاسىپورىن تەك جوعارى ساپالى ءونىم شىعارۋعا باعىتتالعان, سوندىقتان دا جاسالۋ كەزىندە ءاربىر تەتىگىنە اسا ءمان بەرىلەدى. جانسەرىك نىسانباەۆتىڭ ايتۋىنشا, مىقتىلىعى مەن ساپالىلىعى ەسكەرىلىپ, قايىقتىڭ باعاسى قولجەتىمدى دەڭگەيگە سايكەستەندىرىلگەن.
ايتا كەتەيىك, جاس كاسىپكەر كاسىپورنىنا قوسىمشا قارجى تارتۋ ماقساتىندا «دامۋ» قورىنىڭ كەپىلدىگىمەن ەدب نەسيە الۋ ءۇشىن قۇجاتتار جيىنىن دايىنداۋ ۇستىندە. نەسيە قاراجاتىنىڭ كومەگىمەن ول موتورلى قايىق شىعارۋدى جانە ءوندىرىس كولەمىن ارتتىرۋدى قولعا الماقشى.