تاۋەلسىزدىك العالى بەرى قول جەتكىزگەن تابىستارىمىز بەن جەتىستىكتەرىمىزدى كەڭ كولەمدە سارالاپ, سىندارلى كوزقاراسپەن 25 جىلعا شولۋ جاساعان « ۇلى دالا ۇلاعاتتارىن» وقي وتىرىپ, پرەزيدەنتىمىزدىڭ مەملەكەتشىل سانامەن ويلاپ, قازاقى تىلمەن ءسوز ساپتايتىنىنا تاعى ءبىر ءسۇيسىندىم. قازاقستاننىڭ جاڭا تاريحىندا, مەملەكەت ىرگەتاسىن قالىپتاستىرۋدا ەرەكشە ەڭبەك سىڭىرگەن تۇلعا اسقارالى بەلەس بيىگىنەن وتكەنگە كوز سالا تۇرىپ, تەرەڭ پايىمدار جاسايدى. ءسوزىنىڭ جالعانى جوق. ەل تۋرالى ويلانسا دا, جەر ءجونىندە تولعانسا دا, قازاق جاستارىن قاۋىپ-قاتەردەن ساقتاندىرىپ, ءتىلى مەن ءدىنىن قۇرمەتتەۋگە شاقىرسا دا, پايىمى مەن ويى پرەزيدەنتتىك مىندەتىنەن عانا ەمەس, وسى ۇلتتىڭ ازاماتى رەتىندەگى پەرزەنتتىك جاناشىرلىعىنان, اعالىق قامقورلىعىنان تۋعانىن بايقاتادى.
ساياسي جانە ەكونوميكالىق تىعىرىققا تىرەلۋگە جول بەرمەي, بارلىق قيىن كەزەڭدەردەن اقىلمەن جول تاۋىپ, قازاقستاندى العا سۇيرەپ كەلە جاتقان قىزمەتى كوز الدىمىزدا. پرەزيدەنت بۇل كىتابىندا ادەتتەگى دەموكراتيالىق, ساياسي, ەكونوميكالىق تولعامدارىمەن ەمەس, حالىقتىق قۇندىلىقتاردى, عاسىرلار بويى تىرنەكتەپ جيناعان اسىل قازىناسىن – ءتىل, ءدىن, ونەر, ءداستۇر, ىزگىلىك, ادامگەرشىلىك دەپ اتالاتىن جان بايلىعىن قۇرمەتتەۋگە, قورعاۋعا, ساقتاۋعا ۇندەپتى. باسقانى بىلمەيمىن, مۇنداي اڭگىمە, اسىرەسە ءبىزدىڭ, ونەر ادامدارىنىڭ قۇلاعىنا مايداي جاعادى. كىتاپتىڭ سوڭعى «جاڭعىرىپ كەلەر جاس تولقىن», «قاريالارىمىز – قازىنالارىمىز» دەگەن بەسىنشى جانە التىنشى تاراۋلارىنداعى جاڭاشىل جاستارىمىز بەن قادىرلى قاريا, ابزال اقساقالدارىمىزعا قاراتىلا ايتىلعان ويدى حالىقتىق تاربيەمەن ءوسىپ, تۇلعالىق تۇرپاتى وبال-ساۋاپ, ار-وجدان سەكىلدى ءتورت تاعانمەن بيىكتەگەن ادام عانا ايتا الادى. ءوزىمىز دە اقساقال جاسىنا جەتتىك, قازاقتىڭ وتباسىلىق ينستيتۋتىن قۇرايتىن ءداستۇرلى ۇعىمداردى – قاريا كىم, اقساقال كىم, ابىز كىم, پرەزيدەنت اراجىگىن ادەمى اشىپ, تارقاتادى. بالالىعى – جاستىققا, جاستىعى – قارتتىققا ۇلاساتىن قۋىس كەۋدەلى ادام بالاسى بىلە ءجۇرۋى ءتيىس كەرەك وي, كادەمىزگە جاراسا, قانە؟
پرەزيدەنتىمىزدىڭ وسى ەڭبەگىن وقي وتىرىپ, سۇلتانماحمۇت تورايعىروۆتىڭ «قازاق ءۇشىن جۇرەك مايىن شام قىلدى» دەگەن ءسوزى ەسكە تۇسەدى. راسىندا دا, ەلباسىمىزدىڭ قايراتكەرلىك كەلبەتى ەل ءومىرىنىڭ تىرشىلىك-تىنىسىن تەرەڭ بىلۋىمەن, مەملەكەت ىشىندەگى جانە الەمدىك احۋالدارمەن ساناسا وتىرىپ, باتىل قادامدارعا بارۋىمەن, ويعا الىپ, دىتتەگەن يدەياسىن تاباندىلىقپەن جۇزەگە اسىرۋىمەن دارالانادى. ەلىمىز سىنعا تۇسكەن ەگەمەندىكتىڭ ءاربىر كۇنى ايعا, ءاربىر اپتاسى جىلعا, ءاربىر جىلى عاسىرعا بەرگىسىز بولىپ كەلەدى. سودان بەرى ءۇمىت ارتىپ, تاعدىرىمىزدى تاپسىرعان كوشباسشىمىز قياننان جول تاۋىپ, اداستىرماي العا سۇيرەپ, ازاماتتىعىن تانىتۋمەن كەلەدى. 25 جىل دەگەنىڭىز ونشا كوپ ۋاقىت ەمەس, بىراق ماڭىزى ۇلكەن. ەلىمىز ەشكىمگە تاۋەلدى بولماي, ۇلكەن جەكە مەملەكەت بولعانىمىز – باقىتىمىز. وسى تاۋەلسىزدىكتى ۇستاپ تۇرا الساق, سول ءبىزدىڭ مىندەتىمىز. بۇدان ارى دا ءبىزدىڭ قاجىر-قايراتىمىز, ەرىك-جىگەرىمىز تولىعىمەن وسى ۇلى ماقساتقا جۇمسالۋى كەرەك.