العاشقى كۇن اتا زاڭعا ارنالدى

وڭتۇستىك قازاقستان وبلىسىندا قازاقستان رەسپۋبليكاسى تاۋەلسىزدى­گى­نىڭ 25 جىلدىعىنا ارنالعان « ۇلى دالا ەلى – تاۋەلسىزدىك­تىڭ 25 نەگىزى» ات­تى 25 جۇلدىزدى كۇن اكتسياسىنىڭ العاشقى كۇنى كونستيتۋتسيا كۇنىنە ارنالدى. جۇلدىزدى كۇن «قازاقستان رەس­پۋب­لي­كاسىنىڭ كونستيتۋتسياسى» دەپ اتالىپ, شىمكەنت قالاسىنداعى «كورمە» ورتا­لىعىندا «تاۋەلسىزدىك جەتىستىكتەرى» اتتى تانىستىرىلىمدىق كورمە كەشەنىنىڭ اشىلۋىمەن باستالدى. شاراعا قاتىسقان وبلىس اكىمى جانسەيىت تۇيمەباەۆ بارشا ءوڭتۇس­تىك­قازاقستاندىقتاردى تاۋەلسىزدىك تويىمەن قۇتتىقتاپ, ەلىمىزدىڭ جەتكەن جەتىستىكتەرى مەن اتا زاڭنىڭ ءمان-ماعىناسىنا توقتالدى. – قازاقستان رەسپۋبليكاسى 25 جىلدىڭ ىشىندە ەلباسى نۇرسۇلتان ءابىش ۇلى نازارباەۆتىڭ باسشىلىعىمەن تورتكۇل دۇنيەگە تانىلدى, الەم مويىنداعان ەگەمەن ەل بولدى. تاۋەلسىز ەلدىڭ ەڭ باستى تۇعىرى, ول – قوعامنىڭ, سول مەملەكەتتەگى جەرگىلىكتى ۇلتتىڭ رۋحى, جىگەرى, قوعامدىق ساناسى. جاڭا الەمدەگى جاڭا قازاقستاننىڭ بۇگىنگى قۇدىرەتتى كۇشى ەل بىرلىگىندە, ۇلت­تار تاتۋلىعىندا جاتىر. قازاقستان ءۇشىن ححI عاسىر تاريحىنىڭ پاراعى پاراسات پەن پايىمعا تولى. ال « ۇلىستىڭ ۇيىت­قىسى – وڭتۇستىك» اتانعان ءوڭىر حالقى دا تاۋەلسىزدىكتىڭ تارتۋلارىن ءىس جۇزىندە سەزىنۋدە. تاۋەلسىزدىك جىلدارىندا ءوڭىر ەكو­نو­ميكاسىنا 3 ترلن 300 ملرد تەڭگەدەن استام ينۆەستيتسيا تارتىلىپ, 347 دەنساۋلىق ساقتاۋ نىسانى, 491 مەكتەپ, 1491 بالاباقشا ىسكە قوسىلدى. جالپى, تاۋەلسىزدىكتىڭ ارقاسىندا قول جەتكەن ءىرى جەڭىستەرگە دالەل بولاتىن مىسالدار وتە كوپ. قازاقستاننىڭ قانشالىقتى وسكەنىن سالىستىرمالى تۇردە ايتساق, 2001 جىلى بۇكىل مەملەكەتىمىزدىڭ بيۋدجەتى 508 ملرد تەڭگە بولسا, بۇگىندە تەك وڭتۇستىك قازاقستان وبلىسىنىڭ بيۋد­جەتى 550 ملرد تەڭگەگە جەتىپ وتىر, – دەدى جانسەيىت قانسەيىت ۇلى. «تاۋەلسىزدىك جەتىستىكتەرى» اتتى تانىستىرىلىمدىق كورمە ەلىمىزدىڭ شيرەك عاسىردا قول جەتكىزگەن كورسەتكىشتەرى – «قازاقستان-2050» ستراتەگياسى, استانانىڭ دامۋى, يندۋستريالىق-يننوۆاتسيالىق دامۋ باعدارلاماسى, «ماڭگىلىك ەل» جالپىۇلتتىق يدەياسى, الەمدىك جانە ءداستۇرلى دىندەر كوشباسشىلارىنىڭ سەزدەرى سىندى 14 تاقىرىپتىق بولىمنەن تۇرسا, قالعان 12 ءبولىم وڭتۇستىك قازاقستاننىڭ الەۋمەتتىك-ەكونوميكالىق كورسەتكىشتەرى مەن شاعىن جانە ورتا بيزنەستىڭ دامۋى, تۇرعىن ءۇي قۇرىلىسى, اۋىل شارۋاشىلىعى مەن ءبىلىم, مادەنيەت, سپورت جانە ءتۋريزمنىڭ دامۋىنا ارنالدى. سونىمەن بىرگە, شارا اياسىندا ەگىز تۋعان نارەستەلەردىڭ اتا-انالارىنا تۋ تۋرالى كۋالىكتەر بەرىلىپ, قوعام ومىرىنە ەتەنە ارالاسىپ, بەلسەندى كوزگە ءتۇسىپ جۇرگەن 16 جاسقا تولعان ازاماتتارعا جەكە كۋالىكتەر تاپسىرىلدى. ال مەرەكە قارساڭىندا شاڭىراق كوتەرىپ, وتباسىن قۇرعان جاس جۇبايلارعا نەكە كۋالىگى تابىستالدى. «تاۋەلسىزدىك جەتىستىكتەرى» تانىستى­رى­لىمدىق كورمەسىندە وبلىس اكىمى جانسەيىت تۇيمەباەۆ وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ باستاعان ارداگەرلەرگە قازاقستاننىڭ تاۋەلسىزدىك جىلدارىندا جەتكەن جەتىستىكتەرى تۋرالى اڭگىمەلەپ, «100 ناقتى قادام» ۇلت جوس­پارى بويىنشا جۇيەلى جۇمىس جاسالىپ جاتقاندىعىن ايتتى. «ەلگە ەل قوسىلسا – قۇت» دەيدى حالقى­مىز. كۇنگەيگە كورشى مەملەكەتتەردەن كوشىپ كەلىپ جاتقان وتانداستارىمىز كوپ. مىسالى, 1991-1992 وقۋ جىلىندا مەكتەپتەردە 429 مىڭ 081وقۋشى وقىسا, 2016-2017 وقۋ جىلىندا وقۋشىلار سانى 611 مىڭ 318-گە جەتكەن. ياعني, تابيعي ءوسىم دە كوز قۋان­تادى. تاۋەلسىزدىك جىلدارىنان بەرگى تەك ءبىلىم سالاسىندا سالىنعان نىسان­دار­دىڭ 5700 ەكەندىگىن ەسكەرسەك, ءار سالا بو­يىن­شا وسىنداي جاقسىلىقتار ايتۋعا بولادى. قازاقستان رەسپۋبليكاسىنىڭ كونس­تيتۋ­تسياسىنا ارنالعان ءىس-شارالار وبلىستىڭ وزگە دە وڭىرلەرىندە جالعاسىن تاپتى. باقتيار تايجان, «ەگەمەن قازاقستان» وڭتۇستىك قازاقستان وبلىسى