كەشە قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ قازاقستانعا رەسمي ساپارمەن كەلگەن چەح رەسپۋبليكاسىنىڭ سىرتقى ىستەر ءمينيسترى ليۋبومير زاورالەكپەن كەزدەسىپ, كەلىسسوز جۇرگىزدى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
سىرتقى ساياسات ۆەدومستۆولارىنىڭ باسشىلارى ماشينا جاساۋ, ەنەرگەتيكا, «جاسىل ەكونوميكا», اۋىل شارۋاشىلىعى, ءاسكەري-ونەركاسىپتىك كەشەن, ءبىلىم بەرۋ, دەنساۋلىق ساقتاۋ جانە تۋريزم سالالارىنداعى كوكەيكەستى ماسەلەلەر مەن ەكىجاقتى ىنتىماقتاستىقتىڭ پەرسپەكتيۆالارىن قاراستىردى. سونداي-اق, قازاقستان – ەۋروپالىق وداق جانە ەۋرازيالىق ەكونوميكالىق وداق – ەۋروپالىق وداق جەلىلەرى بويىنشا ءوزارا ارەكەتتەستىك جايىن ءسوز ەتتى.
كەلىسسوز بارىسىندا ە.ىدىرىسوۆ چەحيانىڭ ساۋدا-ەكونوميكالىق جانە ينۆەستيتسيالىق سالالاردا ايتارلىقتاي الەۋەتكە يە ەل ەكەنىن ايتا كەلىپ, قازاقستاننىڭ سەنىمدى سەرىكتەسى ءارى ەۋروپالىق وداقتىڭ ماڭىزدى مۇشەسى ەكەنىن اتاپ كورسەتتى. ول قازاقستاننىڭ ينۆەستيتسيالىق احۋالىنىڭ وڭتايلىلىعى جونىندە اڭگىمە قوزعاپ, وسى كۇندەرى استانا مەن الماتىدا ءوتىپ جاتقان قازاقستان-چەحيا بيزنەس-فورۋمىنا چەحيانىڭ وتىزدان استام ىسكەر توپتارىنىڭ وكىلدەرى قاتىسىپ جاتقانىنا ريزاشىلىعىن ءبىلدىردى.
«ەكى ەل ىسكەر توپتارىنىڭ اراسىنداعى تىكەلەي ۇنقاتىسۋلار مەن ارىپتەستىككە بەلسەندى ىقپال ەتۋ ءبىزدىڭ بىرلەسكەن جۇمىسىمىزدىڭ نەگىزى بولۋى ءتيىس», دەدى ءوزىنىڭ سوزىندە ە.ىدىرىسوۆ. سونداي-اق, ول چەحيانىڭ قازاقستاندىق تۋريستەر مەن ستۋدەنتتەر اراسىندا اسا تارتىمدى باعىتتاردىڭ ءبىرى بولىپ وتىرعانىن اتاپ ءوتتى. قازىرگى كەزدە چەحيانىڭ جوعارى وقۋ ورىندارىندا 2 مىڭنان استام قازاقستاندىق ءبىلىم الىپ جاتسا, جىل سايىن چەح رەسپۋبليكاسىنا شامامەن 100 مىڭداي قازاقستاندىق تۋريست بارادى ەكەن.
ءوز كەزەگىندە, ل.زاورالەك قازاقستاندى تاۋەلسىزدىگىنىڭ 25 جىلدىعىمەن قۇتتىقتاي كەلىپ, ەلدىڭ وسى از عانا ۋاقىتتا تاماشا تابىستارعا قول جەتكىزگەنىن اتاپ كورسەتتى. سونىمەن قاتار, ول چەحيانىڭ قازاقستان مەن ەو اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمدى راتيفيكاتسيالاعان ەۋروپالىق وداقتاعى ءتورتىنشى ەل بولعانىن كولدەنەڭ تارتتى جانە ءوز ەلىنىڭ قازاقستاننىڭ كانديداتۋراسىن 2017-2018 جىلدارداعى بۇۇ قاۋىپسىزدىك كەڭەسىنىڭ قۇرامىنا سايلاۋدا قولداۋ كورسەتكەنىن ايتتى. سونىمەن بىرگە, چەحيانىڭ استانادا وتەتىن ەكسپو-2017 حالىقارالىق مامانداندىرىلعان كورمەسىنە العاش رەت قاتىساتىنىن جاريا ەتتى.
تاراپتار, سونداي-اق, پارلامەنتارالىق جانە وڭىرارالىق ىنتىماقتاستىقتى ءارى قاراي دامىتۋدىڭ ماڭىزدى ەكەنىنە نازار اۋدارا كەلىپ, ەكى ەل اراسىنداعى مادەني-گۋمانيتارلىق بايلانىستاردى جانداندىرا ءتۇسۋدىڭ ماڭىزى دا ايتارلىقتاي زور ەكەنىمەن كەلىستى.
كەلىسسوز قورىتىندىلارى بويىنشا, قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسى مەن چەح رەسپۋبليكاسى سىرتقى ىستەر مينيسترلىگى جانىنداعى ديپلوماتيالىق اكادەميا اراسىندا ىنتىماقتاستىق تۋرالى مەموراندۋمعا قول قويىلدى.