قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ ستۋدەنتتىك شاكىرتاقىسى ساراپقا تۇسكەن بايقاۋ كوميسسياسىنىڭ شەشىمىمەن مەرۋەرت شۋكۋەۆا, پاۆەل گراف, ءاليا لاۋباي, يۋليا تاراسوۆا, التىن امانگەلدينوۆا جانە ءادىلحان قاسىموۆ جەڭىمپاز اتاندى.
پاۆلودار مەملەكەتتىك ۋنيۆەرسيتەتىنىڭ ستۋدەنتتەرى وزدەرىنىڭ جوعارى اكادەميالىق كورسەتكىشتەرىمەن قوسا ۋنيۆەرسيتەتتىڭ قوعامدىق ءجانە عىلىمي-زەرتتەۋ جۇمىستارىنداعى جەتىستىكتەرىن, سونداي-اق, ستۋدەنتتەر مەن وقىتۋشىلار اراسىنداعى بەدەلدەرىن دودانىڭ ەكى كەزەڭىنەن تۇراتىن ىرىكتەۋىنەن وزا شاۋىپ بەكىتتى.
بولاشاق ءتىلشى مەرۋەرت شۋكۋەۆا وقۋى مەن ماماندىعى بويىنشا جۇمىسىن تاماشا ۇشتاستىرىپ كەلەدى. «ورىنداۋشىلىق ونەر» كافەدراسىنىڭ ستۋدەنتى پاۆەل گراف فورتەپيانو بويىنشا حالىقارالىق مۋزىكالىق بايقاۋلاردىڭ بىرنەشە ءدۇركىن لاۋرەاتى اتانعان. ال گۋمانيتارلىق-پەداگوگيكالىق فاكۋلتەتتىڭ ستۋدەنتى التىن امانگەلدينوۆا – ەكسپو-2017 حالىقارلىق كورمەسىنە دايىندىق ورتالىعىنىڭ ەرىكتىسى. بۇگىنگى كۇنى التىن ەرازمۋس+ باعدارلاماسى بويىنشا چەحيادا ءبىلىم الىپ ءجۇر.
ۆولونتەرلىك جۇمىستى وزىنە سەرىك ەتكەن تاعى ءبىر بەلسەندى جاس – ساۋلەت-قۇرىلىس فاكۋلتەتىنىڭ ستۋدەنتى ءاليا لاۋباي دا جەڭىمپازدار قاتارىنان كورىندى. ءاليا بۇل جۇمىسپەن 11 جاسىنان بەرى اينالىسىپ, كوپتەگەن الەۋمەتتىك ءىس-شارالارعا قاتىسۋدى ءومىرىنىڭ ءمانى سانايدى. «شاكىرتاقى يەگەرلەرى قاتارىندا بولعانىم – مەن ءۇشىن زور مارتەبە. ءبىرىنشى كەزەكتە, 30 جەڭىمپازدىڭ ىشىندە س.تورايعىروۆ اتىنداعى پمۋ-ءىنىڭ التى بىردەي ستۋدەنتى اتالعانى – ۋنيۆەرسيتەتىمىز ءۇشىن ۇلكەن جەڭىس. وسىنداي قورلار جاستاردىڭ بەلسەندى بولۋىنا, جەكە تۇلعا رەتىندە قالىپتاسۋىنا, ماقسات قويىپ, ونى يگەرۋىنە جول سالىپ بەرەدى», دەيدى ءاليا.
راۋان قايدار,
«ەگەمەن قازاقستان»