قىتاي كاسىپكەرلەرى قازاقستانداعى ومارتا شارۋاشىلىعىنىڭ دامۋىنا قىزىعۋشىلىق تانىتۋدا. سونىڭ ءبىر ايعاعى رەتىندە قحر اۋىل شارۋاشىلىعى مينيسترلىگى ساپا ينسپەكتسياسى جانە كارانتين جونىندەگى باس باسقارما توراعاسىنىڭ ورىنباسارى مەي كەباو جەتەكشىلىك ەتكەن دەلەگاتسيانىڭ ارشالى اۋدانىنا ارنايى كەلۋىن ايتۋعا بولادى. كورشى ەلدەگى ىسكەر قاۋىم وكىلدەرىن قازاقستان رەسپۋبليكاسى اۋىل شارۋاشىلىعى ۆيتسە-ءمينيسترى گۇلميرا يساەۆا مەن اۋدان اكىمى ازامات تايجانوۆ قارسى الدى.
قوناقتار اقمولا وبلىسىنا ايگىلى ءارى باي ءتاجىريبە يەسى اناتولي دوبروۆولسكيدىڭ باباتاي تەمىر جول ستانساسىنداعى ومارتا شارۋاشىلىعىندا بولىپ, اتقارىلىپ جاتقان ىستەرمەن تانىستى. شارۋاشىلىق يەسى ا.دوبروۆولسكي بال جيناۋ جۇمىسى جايلى جان-جاقتى اڭگىمەلەپ, قىتايلىق ءارىپتەستەرىمەن تاجىريبە ءبولىستى.
سونداي-اق, كەزدەسۋ بارىسىندا ەلگە بەلگىلى ومارتاشىلار ساندىقتاۋ اۋدانىنداعى بالقاشىن كەنتىنەن كەلگەن ستانيسلاۆ بوگومولوۆ پەن ارشالى اۋدانىنداعى يجەۆ اۋىلىنىڭ تۇرعىنى يۋري لاگۋتين ءوز كاسىپتەرىنىڭ قىر-سىرى مەن بولاشاعى جايلى ەگجەي-تەگجەيلى ايتىپ, قويىلعان سۇراقتارعا تولىمدى جاۋاپتار قايتاردى.
اۋدانداعى ومارتا شارۋاشىلىعىنىڭ ۇيىمداستىرىلۋىمەن تانىسىپ, دايىن ونىمنەن ءدام تاتقان قوناقتار اقمولا بالىنىڭ ەرەكشەلىگى مەن ساپاسىنا جوعارى باعاسىن بەردى. ءوزارا تۇسىنىستىك احۋالىنداعى پىكىر الماسۋ بارىسىندا مەي كەباو مىرزا اقمولا بالىنا قىتاي تاراپىنان قىزىعۋشىلىق بارىن اتاپ كورسەتىپ, الداعى ۋاقىتتا باعالى ءونىمدى جەتكىزۋ ماسەلەسىنە ءمۇددەلىلىك ءبىلدىردى. كەلىسىمشارتتار ءراسىمدەۋ كۇنى دە الىس ەمەستىگى بايقالدى.
– ەلىمىزدە ومارتا شارۋاشىلىعىن دامىتۋعا ەرەكشە كوڭىل بولىنە باستاعانى قۋانتادى, – دەدى بىزبەن اڭگىمەسىندە ا.دوبروۆولسكي. اۋىل شارۋاشىلىعى مينيسترلىگى دە وسىناۋ پايدالى سالاعا قولداۋ كورسەتۋدە. بۇل دەگەنىڭىز جاڭا جۇمىس ورىندارى, نارىققا تابيعي تازا ءونىم شىعارۋ ءارى ەل ەكونوميكاسىنا قوسىمشا كاپيتال تارتۋ بولىپ تابىلادى.