« ۇلى دالا ۇلاعاتتارى» – ەلباسىمىز نۇرسۇلتان نازارباەۆ جازعان جاڭا ەڭبەك – وقىعان ادامدى ەنجار قالدىرمايتىن, تۋعان ەلىمىز – قازاقستاننىڭ سوناۋ-سوناۋ ەرتەدەن كەلە جاتقان مىڭداعان جىلدىق تاريحىنا, وتكەنى مەن بۇگىنگىسىنە وي جۇگىرتكەن, كەۋدەنى قۋانىشقا, شاتتىققا, ماقتانىش سەزىمىنە بولەيتىن دۇنيە ەكەن. ونى وقىپ وتىرعاندا كەشە قانداي ەدىك, بۇگىن قاندايمىز دەگەن وي وزىنەن ءوزى تۋىندايدى. بۇل تۋىندى – وسىدان شيرەك عاسىر بۇرىن تاۋەلسىزدىككە قول جەتكىزگەن ەلىمىزدى سول كەزدەگى بارلىق قيىندىقتاردان قۇتقارىپ, ەكونوميكامىزدى نىعايتىپ, حالىقتىڭ ءال-اۋقاتىن جاقسارتىپ, دامۋدىڭ داڭعىل جولىنا ءتۇسىرىپ, كورەگەندىكپەن, كەمەڭگەرلىكپەن ساۋلەلى ەرتەڭىمىزگە, جارقىن بولاشاققا قاراي باستاپ كەلە جاتقان ەلباسىمىزدىڭ ءوز حالقىمەن سىرلاسۋى, اتقارىلعان ىستەر, قول جەتكىزگەن جەتىستىكتەرىمىز, جەڭىستەرىمىز جونىندە تۋعان حالقىنا بەرگەن ەسەبى دەسە دە بولعانداي ەكەن.
ماعان كەيدە وي كەلەدى: ەگەر سوناۋ وتكەن عاسىردىڭ توقسانىنشى جىلدارىنىڭ باسىندا ەل تىزگىنى ەلىمىزدىڭ باعىنا تۋعان نۇرسۇلتان ءابىش ۇلىنىڭ ەمەس, باسقا بىرەۋدىڭ قولىنا تيسە, جاعدايىمىز قالاي بولار ەدى دەگەن. ويلاۋدىڭ ءوزى قورقىنىشتى. اعا ۇرپاق وكىلدەرى بىزدەر جاقسى بىلەمىز, ول كەزدەگى قازاقستاننىڭ حال-احۋالى ادام ايارلىقتاي قيىن ەدى. ەل ەكونوميكاسى نەگىزىنەن شيكىزات وندىرۋگە باعىتتالعان. وداق ىدىراپ, تاراعان سوڭ بۇرىنعى شارۋاشىلىق بايلانىستاردىڭ بارلىعى كۇرت ءۇزىلىپ, ءوندىرىس تە, وزگە تىرشىلىگىمىز دە تۇرالاپ, تۇرىپ قالدى. ەلدى جۇمىسسىزدىق, قيىنشىلىق جايلادى. بىزدەن گورى جاعدايلارى تۇراقتى بولىپ سانالاتىن وزگە رەسپۋبليكالاردىڭ وزىندە ۇلتارازداق كيكىلجىڭدەر, قاقتىعىستار تۋىنداپ جاتقاندا, كوپ ۇلتتى, ونىڭ ۇستىنە جەر يەسى – قازاق حالقىنان سىرتتان كەلگەن وزگە ۇلتتاردىڭ سانى الدەقايدا باسىم قازاقستان ءوز الدىنا مەملەكەت بولىپ كەتە المايدى دەپ ساۋەگەيلىك ايتۋشىلار دا بولدى. شۇكىر-شۇكىر… ەلباسىنىڭ ءوزىنىڭ سوزىمەن ايتساق: «ەل بولۋدىڭ, مەملەكەت بولۋدىڭ ءجون-جوباسىن كورسەتىپ بەرگەن, كومەككە كەلگەن ەشكىم بولعان جوق. ءبىز ءبارىن دە تىڭنان باستاپ, حالقىمىزبەن بىرگە قالىپتاستىردىق. جوقتان بار جاسادىق, باردى بەرەكەگە اينالدىردىق, سول ىرىستى ءوسۋ مەن وركەندەۋدىڭ نەگىزى ەتىپ الدىق». ءسويتىپ, بۇگىنگىدەي الەم تانىعان, ەڭ ۇلكەن, الىپ مەملەكەتتەردىڭ ءوزى قۇرمەتپەن قارايتىن, ماقتانىش تۇتۋعا بولاتىن قازاقستان دارەجەسىنە جەتتىك.
بۇل كىتاپتا ەلىمىزدىڭ وسىنداي ءوسۋ جولى تاماشا باياندالعان.