بۇگىن پارلامەنتتە ءماجىلىس توراعاسى نۇرلان نىعماتۋلين چەحيا رەسپۋبليكاسىنىڭ سىرتقى ىستەر ءمينيسترى ليۋبومير زاورالەكپەن كەزدەستى.
ءماجىلىس سپيكەرىنىڭ ايتۋىنشا قازاقستان تاۋەلسىزدىگىنىڭ 25 جىلدىعى قارساڭىندا ءوتىپ جاتقانىن مارتەبەلى مەيمانمەن كەزدەسۋ وسى ۋاقىتقا دەيىن قول جەتكىزىلگەن ەكىجاقتى قارىم-قاتىناستىڭ جوعارى دەڭگەيىن قولداۋعا مۇددەلىلىكتىڭ بەلگىسى جانە قوس ەل پرەزيدەنتتەرىنىڭ كەلىسىمدەرىن ءىس جۇزىندە جۇزەگە اسىرۋ بولىپ تابىلادى.
تاراپتار ديپلوماتيالىق قاتىناس ورناعان 23 جىل ىشىندەگى جەتىستىكتەردى ودان ءارى نىعايتۋ كەرەكتىگىن ءسوز ەتە كەلىپ, باسىم باعىتتار قاتارىندا اۋىلشارۋاشىلىعى, ماشيناقۇرىلىسى, ەنەرگەتيكا, تۋريزم سالالارىنا باسا نازار اۋداردى.
ن.نىعماتۋلين اتاپ وتكەندەي, چەحيالىق تاراپتىڭ «ەكسپو - 2017» كورمەسىنە قاتىسۋى «جاسىل تەحنولوگيا» سالاسىندا يننوۆاتسيالىق جەتىستىكتەر بويىنشا تاجىريبە الماسۋعا زور مۇمكىندىك بەرەدى.
ءوز كەزەگىندە مينيستر مىرزا ساۋدا-ەكونوميكالىق, مادەني- گۋمانيتارلىق, حالىقارالىق ىنتىماقتاستىقتى كۇشەيتۋ جايىن ءسوز ەتتى. وسى ورايدا قازاقستان پرەزيدەنتى نۇرسۇلتان نازارباەۆتىڭ بۇۇ اياسىندا حالىقارالىق تەرروريزم مەن ەكسترەميزمگە قارسى ءىس-قيمىلدىڭ بىرىڭعاي الەمدىك جەلىسىن قۇرۋ باستاماسى اسا ماڭىزدى بولماق.
وسى رەتتە تاراپتار پارلامەنتتىك بايلانىستىڭ ماڭىزدىلىعىنا ەرەكشە كوڭىل ءبولدى. پارلامەنتارالىق بايلانىستاردى ودان ءارى نىعايتۋ ماقساتىندا ءماجىلىس توراعاسى نۇرلان نىعماتۋلين چەحيا پارلامەنت دەپۋتاتتارى پالاتاسىنىڭ توراعاسى يان گاماچەككە قازاقستانعا رەسمي ساپارمەن كەلۋ شاقىرۋىن جولدادى.