التايدا جەلتوقسانعا جەتپەي تۇسەتىن قىس قاراشانىڭ بەل ورتاسىندا-اق كارىنە ءمىندى. شىعىس وڭىرىندە بىرنەشە كۇن قاتارىنان ايازدىڭ بەتى قايتپاي تۇر. قىرىق گرادۋسقا دەيىنگى قاتتى ايازعا بايلانىستى مەكتەپتەردە ساباقتاردىڭ توقتاتىلعانىنا ءبىر اپتاعا جۋىق ۋاقىت بولدى. ساقىلداعان سارى اياز بۋىپ تۇرعاندا وسكەمەندە ەكى بىردەي جىلۋ ورتالىعىندا اپاتتى جاعداي ورىن الدى. وسكەمەن جىلۋ ەلەكتر ستانساسىنىڭ 9 قازاندىعىنىڭ ءبىرى ىستەن شىقسا, سوگراداعى جىلۋ ورتالىعىنىڭ ءۇش قازاندىعىنىڭ ەكەۋى ىستەمەي, قالانىڭ بىرقاتار بولىگى جىلۋسىز قالدى. قازاقستانداعى اES كومپانيالار توبىنىڭ قوعاممەن بايلانىس قىزمەتىنىڭ مالىمەتىنشە, وسكەمەن جەو-نىڭ №11 قازاندىعى 17 قاراشادا ساعات 16.00-دە اقاۋ تابىلۋىنا بايلانىستى قىزمەتىن توقتاتقان. ستانسا ماماندارى اقاۋدى 18 قاراشا كۇنى قازاندىق سۋىعان سوڭ قالپىنا كەلتىردى. جوندەۋ جۇمىستارىنان كەيىن قازاندىققا وت جاعىلىپ, ىسكە قوسىلدى. وسكەمەندىكتەردىڭ ۇيلەرىنىڭ سالقىنداپ كەتۋىنىڭ نەگىزگى سەبەبى – وسى. ال سوگرا جىلۋ ورتالىعىنداعى جاعداي قيىن. ءۇش قازاندىقتىڭ بىرەۋى عانا جۇمىس ىستەپ تۇر. №2 قازاندىق 23 قاراشاعا دەيىن جوندەۋدەن ءوتۋى ءتيىس بولعاندىقتان ىسكە قوسىلماعان. ال 18 قاراشانىڭ تۇنىندە 1 قازاندىق اگرەگاتى اپاتتى جاعدايدا توقتادى. وسىعان بايلانىستى جوندەۋدە تۇرعان №2 قازاندىقتى ىسكە قوسۋعا تۋرا كەلگەن.
وبلىس باسشىلىعى اتالعان ستانسالاردىڭ مەنشىك يەسى بولىپ تابىلاتىن امەريكاندىق كومپانيانىڭ ءوز مىندەتتتەرىن تولىعىمەن ورىنداماعانىا جانە جوندەۋ جۇمىستارىن جۇيەلى جۇرگىزبەگەنىنە بايلانىستى ايىپتاپ وتىر.
– كومپانيا تاراپىنان ميللياردتاعان ينۆەستيتسيا قۇيىلادى دەلىنگەن ۋادە بولعانىمەن, ءىس جۇزىندە جۇزەگە اسىرىلعان جوق. جوندەۋ جۇمىستارى تولىق ورىندالمادى, دەگەن ءوڭىر باسشىسى دانيال احمەتوۆ قالا باسشىلىعى مەن جىلۋ ماماندارىنا تاۋلىكتىك كەزەكشىلىك ۇيىمداستىرۋعا تاپسىرما بەردى. الداعى ۋاقىتتا وبلىس باسشىلىعى اتالعان ماسەلەنى كومپانيانىڭ وڭىرلىك جەتەكشىلەرىمەن بىرگە اقش وكىلدەرىمەن دە تالقىلاماق.
سونداي-اق ايازدىڭ كەسىرىنەن قالاداعى قوعامدىق كولىكتەردى كۇتكەن جولاۋشىلاردىڭ ايالدامادا ۇزاق تۇرىپ قالۋى جيىلەدى. قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ مالىمەتىنشە, اۆتوپاركتەردەگى 309 اۆتوبۋستىڭ 126-سى ديزەلى قاتىپ قالعاندىقتان جولعا شىعا الماي قالعان. ءتىپتى, تۇرعىنداردىڭ جەكە كولىكتەرىنىڭ دە كوپشىلىگى وتالماي قالعاندىقتان تاكسي قىزمەتىنە سۇرانىس ارتقان. بۇل باعانىڭ 100 پايىزعا دەيىن قىمباتتاۋىنا سەبەپ بولىپ وتىر.
ايازدى كۇنى كۇرشىم اۋدانىندا 5 ادام جۇزدەگەن مالمەن (100-دەن استام قوي مەن 10 شاقتى جىلقى) بىرگە دالادا ارناسىنان اسىپ جايىلعان وزەننىڭ قورشاۋىندا قالعان. قالجىر وزەنىندە قابىرشاق مۇز قاتىپ قالعاندىقتان سۋ ارناسىنان اسىپ, جاعالاۋعا تەگىس جايىلعان. قىستاۋدان شىققان مالشىلار ءوز اۋىلى – جاڭااۋىلعا دەيىن جەتە الماي, قۇتقارۋشىلاردىڭ كومەگىنە جۇگىنۋگە ءماجبۇر بولدى. اۋداننىڭ توتەنشە جاعدايلار قىزمەتى مەن جەرگىلىكتى اكىمدىك قىزمەتكەرلەرىنەن قۇرالعان ماماندار توبى شىنجىر تاباندى تەحنيكامەن ءتۇنى بويى قۇتقارۋ جۇمىستارىن جۇرگىزدى.
– تۇندە تۇك كورىنبەيتىن قاراڭعىلىق بولدى. ءبىزدى مالشىلارمەن ءبولىپ تۇرعان قاۋىپتى بەلدەۋ شامامەن 500 مەتردەي ەدى. شىنجىر تاباندى تەحنيكامەن ءوتۋ وتە قاۋىپتى بولاتىن. ويتكەنى الدىندا بەتى قاتىپ قالعانىمەن ءتۇبى قۋىس, تەرەڭدىگى 3-4 مەترگە دەيىن جەتەتىن جىرا بولدى. تاۋەكەلگە بەل بۋىپ, جاياۋ جۇردىك. مالشىلار ءبىزدىڭ باعىتتان جاڭىلماۋىمىز ءۇشىن وت جاقتى, دەيدى اۋداندىق توتەنشە جاعدايلار ءبولىمىنىڭ باستىعى ازامات ابدراحمانوۆ. اۋدان اكىمدىگى قىزمەتكەرلەرى قالجىر وزەنىندەگى سۋ توسپاسىن تەكسەردى. اتالعان بوگەتتەن ەلدى-مەكەنگە قاۋىپ جوق.
دۋمان اناش,
"ەگەمەن قازاقستان"
شىعىس قازاقستان وبلىسى.