قوستانايدا «مەنىڭ ەلىم—ماڭگىلىك ەل!» رەسپۋبليكالىق اكتسياسى اياسىندا وبلىستىق پاتريوتتار فورۋمى ءوتتى. وعان جاستارمەن قاتار اعا ۇرپاق وكىلدەرى قاتىستى. وبلىس اكىمى ارحيمەد مۇحامەدوۆ فورۋمعا قاتىسۋشىلاردى الدا كەلە جاتقان قازاقستان تاۋەلسىزدىگىنىڭ 25 جىلدىق مەرەكەسىمەن قۇتتىقتادى.
«تاۋەلسىزدىك جىلدارى جاستاردىڭ قانداي جەتىستىككە جەتكەنى كىتاپقا تولتىرىلادى. ءبىزدىڭ «قوستاناي وبلىسى جاستارىنىڭ التىن كىتابىنا» وسى كۇنگە دەيىن ءومىردىڭ ءار سالاسىندا جەتىستىككە جەتكەن وبلىستاعى 72 جاستىڭ اتى التىن ارىپپەن جازىلعان. جاستار تاۋەلسىزدىك جىلدارى "بولاشاق", "جۇمىسپەن قامتۋدىڭ جول كارتاسى-2020", "ديپلوممەن –اۋىلعا!" سياقتى كوپتەگەن باعدارلامالار ارقىلى مەملەكەت قامقورلىعىن سەزىندى. جاستار—ەلىمىزدىڭ بولاشاعى, ولار جەتكەن تابىستار ارقاسىندا قازاقستان مويىنى وزىق 30 ەلدىڭ قاتارىنان ورىن الاتىن بولادى», - دەدى ارحيمەد بەگەجان ۇلى.
سونىمەن قاتار ءوڭىر باسشىسى پاتريوتتار فورۋمىنىڭ ەل تاۋەلسىزدىگىن تويلايتىن كۇنگە دەيىن 25 جۇلدىزدى كۇننىڭ باستالعانىن, ونىڭ وسى ماڭىزدى شارامەن تۇسپا-تۇس كەلگەنىن دە اتاپ ءوتتى. قازاقستان تاۋەلسىزدىگىنىڭ 25 جىلدىعى تاقىرىبىنا ارنالعان ۆيدەوروليكتەر وبلىستىق بايقاۋىنىڭ جەڭىمپازدارى وبلىس اكىمى قولىنان جۇلدەلەر الدى.
ارداگەر كەنجەبەك ۇكين, قازاقستان حالقى اسسامبلەياسى جاستار قاناتىنىڭ كوشباسشىسى ماكسيم سپوتكاي فورۋمعا قاتىسۋشىلاردى قۇتتىقتادى. مۇنان كەيىن ساحناعا بۇگىندە جوعارى وقۋ ورنىن ءبىتىرىپ, ەڭبەككە ارالاسىپ, ەلگە قىزمەت ەتىپ جۇرگەن تاۋەلسىزدىك قۇرداستارى شىقتى. سولاردىڭ ءبىرى «قوستاناي وبلىسى جاستارىنىڭ التىن كىتابىنىڭ» لاۋرەاتى ولجاس دۇيسەكوۆ فورۋمعا قاتىسۋشى جاستاردىڭ ەلباسىعا ۇندەۋىن وقىدى. مەرەيتويلىق كىتاپ پاۆلودار وبلىستىق «قوعامدىق كەلىسىم» مەملەكەتتىك مەكەمەسى باسشىسىنىڭ ورىنباسارى جاقيا قايراتقا سالتاناتتى تۇردە تابىس ەتىلدى.
ءنازيرا جارىمبەتوۆا,
"ەگەمەن قازاقستان".
قوستاناي