وڭتۇستىك قازاقستان وبلىسىنىڭ اكىمدىگىندە VI شاقىرىلىمداعى وبلىستىق ءماسليحاتتىڭ كەزەكتەن تىس 7 سەسسياسى ءوتتى, دەپ حابارلادى قازاقپارات.
سەسسيا جۇمىسىنا وبلىس اكىمى جانسەيىت تۇيمەباەۆ, وبلىستىق ءماسليحات دەپۋتتارى مەن وبلىس اكىمىنىڭ ورىنباسارلارى, باسقارما باسشىلارى جانە اۋدان, قالا اكىمدەرى, بۇقارالىق اقپارات قۇرالدارىنىڭ وكىلدەرى قاتىستى. كۇن تارتىبىندە 7 ماسەلە قارالدى. اتاپ ايتقاندا, التىنشى شاقىرىلىمداعى وڭتۇستىك قازاقستان وبلىستىق ءماسليحاتىنىڭ حاتشىسىن سايلاۋ, «2016-2018 جىلدارعا ارنالعان وبلىستىق بيۋدجەت تۋرالى» وڭتۇستىك قازاقستان وبلىستىق ءماسليحاتىنىڭ شەشىمىنە وزگەرىستەر مەن تولىقتىرۋلار ەنگىزۋ, «وڭتۇستىك قازاقستان وبلىسىنداعى ادامداردى زاڭسىز اكەتۋگە, اكەلۋگە جانە ساتۋعا قارسى كۇرەس ماسەلەلەرى جونىندەگى ۆەدومستۆوارالىق كوميسسيانىڭ دەربەس قۇرامىن بەكىتۋ تۋرالى» وڭتۇستىك قازاقستان وبلىستىق ءماسليحاتىنىڭ شەشىمىنە وزگەرىستەر ەنگىزۋ تۋرالى جانە ت.ب. وزگە دە ماڭىزدى ماسەلەلەر.
سونىمەن سەسسيا وتىرىسىندا وبلىستىق ءماسليحات حاتشىسىنا قايرات راحىم ۇلى بالابيەۆتىڭ كانديداتۋراسى ۇسىنىلىپ, دەپۋتاتتار ونى ءبىراۋىزدان قولدادى. سونداي-اق, كۇن تارتىبىندەگى وزگە دە ماسەلەلەرگە حالىق قالاۋلىلارى ءبىراۋىزدان داۋىس بەرۋ ارقىلى شەشىم قابىلداپ, ولاردىڭ ورىندالۋىن ماقۇلدادى.
قايرات بالابيەۆ 1965 جىلى تۋعان. ۇزاق جىلدار پروكۋراتۋرا سالاسىندا قىزمەت ەتكەن. ءار جىلدارى شىمكەنت قالاسىنىڭ پروكۋرورى, وڭتۇستىك قازاقستان, جامبىل وبلىستارى پروكۋرورىنىڭ ورىنباسارى بولعان.
سەسسيانىڭ كۇن تارتىبىندە ءسوز العان ايماق باسشىسى ج.تۇيمەباەۆ جاڭا حاتشىنى قىزمەتىمەن قۇتتىقتاپ, جۇمىسىنا تابىس تىلەدى. سونىمەن بىرگە, وسى ۋاقىتقا دەيىن وبلىستىق ءماسليحات حاتشىسىنىڭ مىندەتىن اتقارىپ كەلگەن ابىلقاسىم دوسبولوۆقا العىسىن ءبىلدىردى.