كەشە استاناداعى «ريكسوس» قوناقۇيىندە ەلىمىزدىڭ تاۋەلسىزدىگىنە 20 جىل تولۋى اياسىندا كەدەن وداعى جانە ەۋرازەق-تىڭ بىرىڭعاي ەكونوميكالىق كەڭىستىگىن قالىپتاستىرۋ ءماسەلەلەرى جونىندە حالىقارالىق كونفەرەنتسياسى بولىپ ءوتتى.
كەدەن وداعى جانە ەۋرازەق-تىڭ بىرىڭعاي ەكونوميكالىق كەڭىستىگىن قۇرۋ ماسەلەلەرىنە ارنالعان كونفەرەنتسيا قاتىسۋشىلارىنا مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ ارنايى قۇتتىقتاۋىن سىرتقى ىستەر ۆيتسە-ءمينيسترى قايرات سارىباي وقىپ بەردى. ول ءوز قۇتتىقتاۋىندا كەدەن وداعىنىڭ قۇقىقتىق-كەلىسىمشارتتىق نەگىزىن قۇرايتىن ءىس-شارالار تولىعىمەن جۇزەگە اسىرىلىپ, ونىڭ ينستيتۋتتىق قۇرىلىمى جاساقتالىپ, تابىستى جۇمىس ىستەپ جاتقاندىعىن اتاپ وتكەن. كەدەن وداعىنىڭ ءتيىمدى قىزمەتى مەن ءبىرتۇتاس ەكونوميكالىق كەڭىستىكتى قۇرۋ ەلدەرىمىز اراسىنداعى دوستىق پەن تاتۋ كورشىلىكتىڭ دالەلى بولىپ وتىر, دەگەن ءوز قۇتتىقتاۋىندا ق.ساۋداباەۆ.
«كەدەن وداعى: العاشقى جىل قورىتىندىسى: بەك جولىندا» تاقىرىبىندا ءسوز قوزعاعان ەكونوميكالىق دامۋ جانە ساۋدا ۆيتسە-ءمينيسترى تيمۋر سۇلەيمەنوۆ كەدەن وداعىنىڭ قۇقىقتىق-كەلىسىمشارتتىق بازاسىنىڭ 70-تەن استام قۇجاتتى قۇراپ وتىرعاندىعىن ايتتى. سونداي-اق, ۆيتسە-مينيستر كەدەن وداعى اياسىندا بىرىڭعاي كەدەندىك اكىمشىلىك جۇيەسى جۇمىس ىستەي باستاعاندىعىن جەتكىزدى. سالىق سالاسىندا جاناما سالىق بويىنشا دا قۇقىقتىق-نورماتيۆتىك اكتىلەر جاساقتالعان. سونىمەن قاتار, بيزنەس سالاسىندا جەڭىلدىكتەرگە قول جەتكىزىلىپ, ءبىزدىڭ كاسىپورىندار مەن شارۋاشىلىقتار پايداسىنا شەشىلۋدە, دەدى ول. سونداي-اق, كونفەرەنتسيا بارىسىندا كەدەن وداعى اياسىندا بىرىڭعاي ينتەگراتسيالانعان اقپاراتتىق جۇيە قۇرىلاتىندىعى ايتىلىپ, تالقىلاندى.
ۆەنەرا تۇگەلباي.