كەشە استاناداعى قازاق ۇلتتىق «شابىت» ونەر ۋنيۆەرسيتەتىندە قازاق ونەرىنىڭ جەرگىلىكتى جەردەگى جاناشىرى بولىپ, ۇلكەن قىزمەتتەر ىستەگەن, سونىڭ ىشىندە س.سەيفۋللين اتىنداعى پەدينستيتۋتتا ونەر فاكۋلتەتىنىڭ اشىلۋىنا مۇرىندىق بولعان سايلاۋ بورانباەۆتىڭ 80 جىلدىعىنا ارنالعان عىلىمي-پراكتيكالىق كونفەرەنتسيا بولدى.
ۇلاعاتتى ۇستاز, تاباندى ءتالىمگەر, ۇلت ونەرىنىڭ جاناشىرى, تاماشا ازامات سايلاۋ بورانباەۆتىڭ ەلى ءۇشىن ەتكەن ەڭبەگى مەن قىزمەتىنىڭ جەتكىلىكتى دارەجەدە ەلەنبەي كەلگەندىگى تۋرالى «ەگەمەن» وتكەن جىلعى جەلتوقسان ايىندا جازعان ەدى («ەلەنبەي جۇرگەن ءبىر ەسىم»., 03.12.2010 ج.) اتالعان كونفەرەنتسيا سول ماقالادا كوتەرگەن ماسەلەلەردى قۋاتتاي تۇسكەندەي شارا بولدى.
كونفەرەنتسيانى ۋنيۆەرسيت رەكتورى ايمان مۇساقوجاەۆا اشىپ, جينالعاندارعا قۇتتىقتاۋ ءسوزىن ايتتى. وسىدان كەيىن سايلاۋ بورانباەۆ تۋرالى دەرەكتى فيلم كورسەتىلدى. وندا ازاماتتىڭ ءومىر جولىنا قىسقاشا شولۋ جاسالدى. ءسوز كەزەگى ءوزىنە بەرىلگەندە قازاقستاننىڭ ەڭبەك ەرى, اتاقتى كومپوزيتور ەركەعالي راحماديەۆ سايلاۋ بورانباەۆتى وتە جاقسى بىلگەندىگىن جانە ونىڭ سولتۇستىك وبلىستاردا قازاق ونەرىن دامىتۋعا سىڭىرگەن ەڭبەگىن ىبىراي التىنساريننىڭ حالىق اعارتۋ ىسىنە جاساعان ەڭبەگىندەي كورەتىنىن تىلگە تيەك ەتتى.
«سارى ارقا» جۋرنالىنىڭ باس رەداكتورى, قازاقستاننىڭ ەڭبەك ءسىڭىرگەن قايراتكەرى, جازۋشى نۇرعوجا وراز سايلاۋ بورانباەۆتىڭ اقمولاعا قازاق ونەرى تىڭ يگەرۋ سالدارىنان قاتتى زارداپ شەگىپ جاتقان كەزدە كەلگەندىگىن ايتتى. سول شاقتا, دەدى جازۋشى, بارلىق كونتسەرت, ونەر شارالارى تەك ورىس تىلىندە وتەتىن. اراسىنا ءبىر ءنومىر دە قازاق ءانىن قوسپايتىن. ولار بىزدە ونەر مۇلدە جوقتاي كورەتىن. وسىنداي كەزدە سايلاۋ اعامەن بىرىگىپ, قازاق ونەر ۇجىمدارىن قۇرماق بولدىق. سوندا بىزگە اقمولاداعى تىڭ يگەرۋشىلەر, تەمىرجولشىلار سارايىنان ءبىر بولمە دە بەرىلمەگەن ەدى. ءتىپتى, ءوزىمىزدى باستىقتار, سونىڭ ىشىندە قازاقتارى دا بار, «ۇلتشىلدار» دەپ ايىپتاپ, قۋدالاۋعا دا سالعان. وسىنىڭ بارىنە س.بورانباەۆ توتەپ بەرىپ, ارتىنان ءبارىبىر قازاق ونەر ۇجىمدارىن ۇيىمداستىرا ءبىلدى, دەپ قورىتتى ءسوزىن.
كونفەرەنتسياعا ەلىمىزدىڭ كوپتەگەن وبلىستارىنان, رەسەيدەن, گەرمانيادان سايلاۋ بورانباەۆتىڭ ءشاكىرتتەرى كەلگەن ەكەن. ولاردىڭ ءبارى دە ايتىلعان ەستەلىكتەرىندە سايلاۋ بورانباەۆتىڭ ەرەكشە ەڭبەگىن اۋىزعا الدى. جاسالعان عىلىمي باياندامالار نەگىزىنەن س.بورانباەۆتىڭ مۋزىكالىق اعارتۋشىلىق, پەداگوگتىق قىزمەتى مەن عىلىمي ەڭبەكتەرىن تالقىلاۋعا ارنالدى.
كونفەرەنتسيا بارىسىندا ونەرگە ايتارلىقتاي ەڭبەك ءسىڭىرگەن جەرگىلىكتى ازامات سايلاۋ بورانباەۆتىڭ جارقىن ەسىمىن ەستە قالدىرۋ ءۇشىن استانا قالاسىنىڭ ءبىر كوشەسىنە جانە ءبىر مۋزىكا مەكتەبىنە ونىڭ اتىن بەرۋدى ءوتىنىپ, قالا اكىمدىگىنە حات جازۋ كەرەكتىگى تۋرالى شەشىم قابىلداندى.
جاقسىباي سامرات.