كەشە «نۇر وتان» حدپ-نىڭ ورتالىق اپپاراتىندا پارتيا توراعاسىنىڭ ءبىرىنشى ورىنباسارى نۇرلان نىعماتۋلين ەۋروپا حالىقتىق پارتياسى دەلەگاتسياسىمەن كەزدەستى. كەزدەسۋ بارىسىندا تاراپتار پارتيا قىزمەتىنىڭ نەگىزگى باعىتتارىن, سونىڭ ىشىندە پارتياارالىق ىنتىماقتاستىق ماسەلەلەرىن تالقىلادى.
«نۇر وتان» ازيانىڭ, ەۋروپانىڭ, امەريكانىڭ جەتەكشى پارتيالارىمەن بايلانىس ورناتىپ, قازاقستاندا اككرەديتتەلگەن ەۋروپا كەڭەسىنىڭ پارلامەنتتىك اسسامبلەياسى, ەقىۇ سياقتى حالىقارالىق ۇيىمدارىمەن بەلسەندى ءارىپتەستىك قارىم-قاتىناس ورناتقان.
ەۋروپا حالىقتىق پارتياسى قۇرامىندا قازىرگى تاڭدا 39 ەلدىڭ 73 پارتياسى بار. سوندىقتان بۇل پارتيا كوپ جىلداردان بەرى ەۋروپا پارلامەنتىندە باسىمدىققا يە ەۋروپاداعى ءىرى پارتيالىق ينستيتۋت رەتىندە كوپتەگەن ەلدەردىڭ پارتيالىق قىزمەتىن رەتتەۋدە زور تاجىريبە جيناقتاعان.
ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ ەۋروپالىق وداقپەن ارىپتەستىكتى نىعايتۋعا ايرىقشا نازار اۋدارىپ وتىرعانىن ايتا كەلىپ, نۇرلان نىعماتۋلين ەۋروپا حالىقتىق پارتياسىمەن ۇزاق مەرزىمدى بايلانىس ورناتۋعا دەگەن نيەتىن ءبىلدىردى.
ءوز كەزەگىندە دەلەگاتسيا مۇشەلەرى ورتالىق ازيانىڭ ساياسي تۇراقتىلىعىنداعى قازاقستاننىڭ ماڭىزدى ورنىن اتاي كەلىپ, بيلىك پارتياسىمەن بولعان ءوزارا ءتيىمدى ءارى كونسترۋكتيۆتى ۇنقاتىسۋ ءۇشىن ىستىق ىقىلاستارىن جەتكىزدى.
«ەگەمەن-اقپارات».