جاقىندا ەكسپو-2017 كورمەسىنىڭ كوميسسارى ءراپىل جوشىباەۆتىڭ شري-لانكا رەسپۋبليكاسىنا ساپارى ءوتتى. ساپارى بارىسىندا ول شري-لانكا رەسپۋبليكاسىنىڭ ونەركاسىپ جانە ساۋدا ءمينيسترى ريشاد باسيۋدينمەن, وسى ەلدىڭ ۇلتتىق سەكتسيا كوميسسارى – «Huejay International» كورپوراتسياسىنىڭ باسقارما باسشىسى حۋبەرت دجاكوديمەن جانە ىسكەر توپتارى وكىلدەرىمەن كەزدەستى.
ونەركاسىپ جانە ساۋدا مينيسترلىگىندە وتكەن كەزدەسۋدە تاراپتار ەكىجاقتى ىنتىماقتاستىقتىڭ وزەكتى ماسەلەلەرى بويىنشا پىكىر الماستى. ەكسپو-2017 كوميسسارى قابىلداۋشى جاققا قازاقستاننىڭ باستامالارىن, سونداي-اق, ەلىمىزدىڭ 2017-2018 جىلدارعا بۇۇ قاۋىپسىزدىك كەڭەسىنىڭ تۇراقتى ەمەس مۇشەسى كانديداتۋراسىن قولداعانى ءۇشىن العىس ءبىلدىرىپ, «بولاشاقتىڭ ەنەرگياسى» تاقىرىبىنداعى كورمەگە دايىندىق جۇمىستارى تۋرالى حاباردار ەتتى.
شري-لانكا كوميسسارىمەن وتكەن كەزدەسۋ بارىسىندا كورمەگە قاتىسۋ شارتتارى تالقىلاندى جانە پاۆيلوننىڭ ورنالاسۋ رەتى بەلگىلەندى. شري-لانكا پاۆيلونىنىڭ اۋماعى 526 شارشى مەتر شاماسىندا. سونىمەن قاتار, كوميسسار حۋبەرت دجاكودي ەكسپو-2017 كورمەسى اياسىندا شري-لانكا ۇلتتىق كۇنىن 2017 جىلى 19 شىلدەدە وتكىزۋگە ءوتىنىش ءبىلدىردى. اتالعان شاراعا شري-لانكا پرەزيدەنتى لانكي مايتريپالا سيريسەننىڭ قاتىسۋى جوسپارلانىپتى.
ءراپىل جوشىباەۆ شري-لانكانىڭ ەكسپو-2017 كورمەسىنە قاتىسۋى ەكىجاقتى قارىم-قاتىناستاردىڭ دامي تۇسۋىنە ايتارلىقتاي وڭ اسەر ەتەتىندىگىن اتاپ ءوتتى. 12 حالىقارالىق كورمەنىڭ كوميسسارى بولعان حۋبەرت دجاكودي مىرزا, استانادا وتەتىن كورمەگە دايىندىق جۇمىستارىن جوعارى باعالاپ, شري-لانكادا «جاسىل» ەنەرگەتيكا سالاسىنداعى قولدانىس تاپقان تەحنولوگيالاردى كورسەتۋ جوسپارلانىپ وتىرعانىن ايتتى. كوميسسار حۋبەرت دجاكوديدىڭ سوزىنە قاراعاندا, بۇگىنگى تاڭدا شري-لانكانىڭ ەنەرگەتيكالىق وبەكتىلەرىنىڭ جالپى قۋاتى 3,9 گۆت قۇراپ, ونىڭ 11%-ى نەمەسە 448 مۆت ەنەرگياسى جاڭارتىلاتىن ەنەرگيا كوزدەرى ارقىلى الىنادى. ال «جاسىل» ەنەرگيا شاعىن گيدرو جانە جەل ەلەكتر ستانسالارى ارقىلى وندىرىلەدى ەكەن. شري-لانكا 2030 جىلعا قاراي ەلەكتر قۋاتىن وندىرۋدە جاڭعىرمالى ەنەرگيا كوزدەرىنىڭ ۇلەسىن 100%-عا جەتكىزۋدى جوسپارلاپ وتىرعان كورىنەدى.
كەزدەسۋ قورىتىندىسى بويىنشا, كورمە كوميسسارلارى ر.جوشىباەۆ پەن ح.دجاكودي شري-لانكانىڭ ونەركاسىپ جانە ساۋدا ءمينيسترى ريشاد باسيۋدين مەن قازاقستان رەسپۋبليكاسىنىڭ ۇندىستانداعى ەلشىسى – شري-لانكادا ەلشىلىك قىزمەتتى قوسا اتقارۋشى ب.سارسەنباەۆتىڭ قاتىسۋىمەن شري-لانكانىڭ ەكسپو-2017 كورمەسىنە قاتىسۋ كەلىسىمىنە قول قويدى.
«ەگەمەن-اقپارات»