«ولگانىڭ ولجاسى ويىمىزدان شىقتى»

كەشە تاڭەرتەڭ جەڭىل اتلەت ولگا رىپاكوۆا ريو تورىندە ءۇش قارعىپ سەكىرۋدەن قولا مەدال جەڭىپ العان بويدا ونىڭ وسكەمەندە تۇراتىن تۋىستارىن ىزدەستىردىك. بىردەن تاۋىپ العانىمىز ولجالى قىزىمىزدىڭ تۋعان ءسىڭلىسى ليۋدميلا الەكسەەۆا بولدى. – ليۋدا, سالەمەتسىز بە؟ ولگا­نىڭ قولا جۇلدەسى قۇتتى بولسىن! – راحمەت! – اپكەڭىز ريو وليمپياداسىنا قانداي سەنىممەن اتتاندى؟ قاي تۇعىردان كورىنەتىنىن الدىن الا ءبىلدى مە؟ – وليا قاي مەجەدەن كورىنەتىنىن بىلمەسە دە, جۇلدەگەر بولاتىنىن, مەدال الاتىنىن انىق ءبىلدى. ءويت­كەنى, وليمپياداعا جاقسى كوڭىل كۇي­مەن, تاس-ءتۇيىن اتتاندى. ارينە, سپورت­شىنىڭ بارلىعى التىنعا ۇمتى­لادى. ولگا بۇل جولى «قولاعا» يە بولدى. وتە قۋانىشتىمىن. نەگىزى, بۇل سۇراقتى ەلگە كەلگەنىندە جاتتىق­تى­رۋ­شىسىنا قويۋلارىڭىز كەرەك شىعار. – جاتتىقتىرۋشىسى اكەسى ەكەنىن بىلەمىز. ۇيدە الدەقانداي دا ءبىر بولجامدار بولعان شىعار؟ – ءيا, ولگانىڭ باپكەرى تۋ­عان اكەسى – سەرگەي دميتريەۆيچ الەك­سەەۆ. ۇيدە بولجامدار بولدى ما, بىلمەيمىن, ەسىمدە جوق. نەگىزى, ناقتى بولجامعا ارقا سۇيەگەن جوقپىز. «التىن مەدال الامىز» دەپ تە ايتپادىق. جۇلدەنى ويلاماۋعا بەكىندىك. اكەمىز بولجام جاساعاندى ۇناتپايدى. ول تەك جۇمىس ىستەيدى. بولجام جاساۋ دۇرىس نارسە ەمەس. ويتكەنى, سپورتتى بولجاۋ مۇمكىن دە ەمەس. – «قولانى» قومسىنعان جوقسىز­دار ما؟ – مەن ريزامىن. ولگا جوعا­رى دەڭگەيدە ونەر كورسەتتى. قارسى­لاس­تارى وتە مىقتى بولدى. نەگە «التىن مەدال المادى» دەگەنگە كەلسەك, بۇل – ولگانىڭ قاتەلىگى ەمەس. ول وزىنە جۇكتەلگەن بارلىق مىندەتتى جاقسى اتقاردى. باسەكەنى كورگەندە, اسىرەسە, فينالعا كەلگەندە, قارسىلاستارىنىڭ وتە قۋاتتى ەكەنىن بايقادىق, سوندىق­تان قاتتى قوبالجۋ بولدى. بىراق, ءتۇپ­تەپ كەلگەندە, ۇشتىككە ەندى. ەت جاقىن­دارىنا ريو ويىندارى لوندون وليمپياداسىنان كەم سوققان جوق. ءسوزسىز قۋانىشتىمىز. بۇل – وتە كۇردەلى كۇرەسپەن كەلگەن مەدال! ولگانىڭ لوندوننان كەيىنگى ءۇزىلىسىن ەسەپكە العاندا, بۇل جۇلدەنىڭ ءباسى بيىك ەكەنى داۋسىز. بۇگىندە ول ەكى بالا تاربيەلەپ وتىر. وليمپيادادان كەيىن وتباسىنا دا كوڭىل ءبولدى, جاتتىعۋعا دا ۋاقىت تاپتى. جاتتىعۋىن ويداعىداي اتقاردى. ونىڭ ناتيجەسىن ريو تورىنەن كوردىڭىزدەر. – ولگانىڭ ونەرىن قايدان كوردىڭىزدەر؟ – تاڭەرتەڭ ەرتە تەلەديداردان تىكەلەي كورسەتىلىم بولعاندىقتان, ءبارىمىز بىرگە ۇيدە تاماشالادىق. انامىز, مەن, وليانىڭ كىشى ۇلى بار – ۇشەۋمىز كوردىك. قاتتى قوبال­جىدىق تا, قۋاندىق تا. بۇل تاماشا ناتيجە بولدى. قاتارىنان ەكى رەت وليمپيادا مەدالدارىن ەنشىلەۋ دەگەنىڭىز وتە عاجاپ قوي! البەتتە, ولگا ءوزىنىڭ دايىندىعىنا سەندى. ءتىپتى قارسىلاستارى تۋرالى, ولاردىڭ ناتيجەلەرى جونىندە ويلامادى. ءوزىنىڭ كوڭىل كۇيى مەن بارلىق وي جۇيەسىن قيمىلى مەن سەكىرۋىنە ارنادى. وسىلاي بولعانىنا سەندىك. اقتىق باسەكەدە الدىڭعى ناتيجەلەرى ءسال كەمشىندەۋ بولعاسىن, قاتتى ۋايىمدادىق. ءوزىنىڭ جوعارى ۇپايىن ەنشىلەپ, قولا مەدال الاتىنى بەلگىلى بولعاندا عانا تىنىسىمىز كەڭىپ سالا بەردى. انام قۋانعاننان كۇلە بەردى. ءبارىمىز قۋاندىق. ويتكەنى, ولگا وليمپيادا تۇعىرىندا قالدى. بىزگە ارادا سەكۋندتار وتپەي جاتىپ, قۇتتىقتاعان قوڭىراۋلار مەن سمس-تەر كەلە باستادى. – ءسىز دە سپورتشىسىز با؟ – جوق. دەنساۋلىعىم كەلمەي­تىندىكتەن, سپورتپەن شۇعىلدانعان ەمەسپىن. – ولگاعا سپورتتىق دارىن اكە جاعىنان كەلدى مە, الدە شەشەسى دە بۇل سالاعا بەيىم بە؟ – اكەمىز سپورتپەن شۇعىلدان­عانىن, سپورتشىلاردى تاربيەلەگەنىن ايتتىم. انامىزدىڭ تابيعاتىندا دا سپورتتىق مىنەز-ق ۇلىق بار.  ەڭ الدىمەن, ادامنىڭ تابيعاتىندا قابىلەت بولۋى ءتيىس. سونان سوڭ سپورتتىق ساپا, توزىمدىلىك, شىدامدىلىق, جەڭىسكە قۇشتارلىق سىندى قاسيەتتەردى مەڭگەرۋ ءۇشىن تاستاي ءتارتىپ كەرەك. ءتارتىپ بولماسا, تالانتتى قاجەتتى ماقساتقا جۇمساي الماۋىڭ مۇمكىن. مىنە, ولگادان وسىنىڭ بارلىعى تابىلدى. ول كەرەك كەزدە ءوزىنىڭ بارشا قابىلەت-قۋاتىن ءبىر ماقساتقا جۇمىلدىرا الادى. سپورتتا دا, ومىردە دە وتە جاۋاپتى. وسى قاسيەتى ولگانى العا جەتەلەپ كەلەدى. – اڭگىمەڭىزگە راحمەت. وليم­پيادا جۇلدەسىمەن تاعى دا قۇت­تىق­تايمىز! اڭگىمەلەسكەن دۋمان اناش, «ەگەمەن قازاقستان» وسكەمەن