شىعىس قازاقستان وبلىسىنىڭ اكىمى دانيال احمەتوۆ ريو-دە-جانەيرو قالاسىنداعى ءحححى جازعى وليمپيادا ويىندارىنىڭ ۇزىندىققا ءۇش قارعىپ سەكىرۋدەن قولا جۇلدەگەرى اتانعان ولگا رىپاكوۆانى قۇتتىقتادى.
«قۇرمەتتى ولگا سەرگەەۆنا, ءسىزدى وليمپيالىق ويىنداردىڭ كەزەكتى مەدالىن جەڭىپ الۋىڭىزبەن قۇتتىقتايمىن! بۇل – قازاقستاننىڭ حالىقارالىق سپورت ارەناسىنداعى ماڭىزدى تابىسى بولدى. ال جانكۇيەرلەر ءۇشىن ۇمىتىلماس اسەر مەن سەزىم سىيلادى. ءسىزدىڭ جوعارى ناتيجەلەرىڭىز وتاندىق سپورتشىلاردىڭ جاس بۋىنىنا جارقىن ۇلگى بولادى. ءبىز سىزبەن ماقتانامىز!», دەلىنگەن ءوڭىر باسشىسى جولداعان قۇتتىقتاۋ جەدەلحاتىندا. سونداي-اق ايماق باسشىسى سپورتشىعا جاڭا شىڭداردى باعىندىرۋدا ساتتىلىك پەن جارقىن جەڭىستەر تىلەدى.
ولگا رىپاكوۆانىڭ ريو تورىندەگى ۇزدىك ناتيجەسى 14,74 مەتردى قۇراپ, ەل قۇراماسىنىڭ قورجىنىنا سەگىزىنشى وليمپيادالىق مەدالدى سالعان بولاتىن. ايتا كەتەلىك, لوندون وليمپياداسىنداعى تريۋمفتى جەڭىستەن كەيىن سپورتشى اتىندا وسكەمەن قالاسىندا جەڭىل اتلەتيكا مانەجى سالىنعان بولاتىن. اتالعان ايدىك سپورت نىسانىنىڭ ديرەكتورى – ولگانىڭ كۇيەۋى ءارى جاتتىقتىرۋشىسى دەنيس رىپاكوۆ. بۇگىندە ەرلى-زايىپتى سپورتشىلار جاڭا نىساندا جەڭىل اتلەتيكادان جاس بۋىندى تاربيەلەۋدە. سونىمەن بىرگە ولگا دا ءوزىنىڭ سپورتتىق جولىن تابىستى تۇردە جالعاستىرىپ كەلەدى. ولگا رىپاكوۆا ريو وليمپياداسىنان كەيىن بىردەن كەلەسى جارىسقا, اتاپ ايتقاندا لوزاننادا وتەتىن دايموند ليگاسىنا اتتانباق. ەلگە وسى جارىستان كەيىن ورالاتىن بولادى.
دۋمان اناش
فوتو: egemen.kz
وسكەمەن