ريو-دە-جانەيرودا ءوتىپ جاتقان وليمپيالىق ويىنداردا وزبەكستاندىق گرەك-ريم پالۋانى ەلمۇرات تاسمۇراتوۆ قولا مەدال جەڭىپ الدى.
قازاقستاندىق المات كەبىسباەۆپەن ءبىر سالماقتا, 59 كيلوعا دەيىنگىلەر قاتارىندا كۇرەسكەن ول اقتىق سىندا قىرعىزستاندىق ارسەن ەراليەۆتى 3:1 ەتىپ تىزە بۇكتىرىپ, جۇلدەگە قولىن جەتكىزدى. ەكىنشى قولا مەدال جۇبانىش راۋندىندا كەبىسباەۆتى 2:0 ەتىپ ۇتقان نورۆەگ ستيگ اندرە بەرگەگە بۇيىردى.
اتاپ ءوتۋىمىز كەرەك, 25 جاستاعى ەلمۇرات تاسمۇراتوۆتىڭ ۇلتى قازاق. ول تاشكەنت وبلىسىندا تۋىپ-وسكەن. 2004 جىلى جاسى 13-كە تولعان كەزىندە اتا-اناسى ونى ارنايى قازاقستانعا جىبەرەدى. ءجاسوسپىرىم سول كەزدەن باستاپ تۇركىستانداعى بەكزات ساتتارحانوۆ اتىنداعى سپورت ينتەرناتىندا ءتورت جىل وقيدى.
ينتەرناتتى بىتىرگەننەن كەيىن ەلمۇرات قازاقستان قۇراماسى ساپىنا ەنۋگە ارەكەتتەر جاسايدى. بىراق 2008 جىلى داۋلەت تۇرلىحانوۆتىڭ جۇلدەسى ءۇشىن وتكىزىلگەن تۋرنيردە جەڭىلىپ قالۋىنا بايلانىستى وعان مۇنداي مۇمكىندىك بەرىلمەيدى. سوندىقتان كوپ ۇزاماي ەلىنە قايتادى. سول ۋاقىتتان بەرى وزبەكستان تۋى استىندا ونەر كورسەتىپ, ازيانىڭ ءۇش دۇركىن چەمپيونى, الەمنىڭ ەكى مارتە قولا جۇلدەگەرى اتاندى.
قازىر وزبەكستاننىڭ وليمپيالىق قۇراماسى قورجىنىندا 1 التىن, 4 قولا مەدال بار. سونىڭ التىن جۇلدەسىن بوكسشى حاسانبوي دۋسماتوۆ اكەلسە, قولا مەدالدىڭ ءبىرى وسى ەلمۇراتتىڭ ەنشىسىندە.
دامير قوجامقۇل