استانا قالالىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى سوفيا قىلىشبەكوۆانىڭ حابارلاۋىنشا, لومبارد توناماق بولعان كۇدىكتى ۇستالعان.
«كۇدىكتىنىڭ استانا قالاسىنىڭ تۇرعىنى ەكەنى انىقتالدى. ول 1979 جىلى تۋعان. ونىڭ مۇنداي قادامدارعا نە ءۇشىن بارعانىن ناقتى ايتا المايمىز, تەرگەۋ امالدارى كەزىندە ءبارى بەلگىلى بولادى. قازىرگى تاڭدا لومباردتىڭ ەكى قىزمەتكەرى قاراقشىنىڭ قولىنان امان-ەسەن بوساتىلدى. كەلىسسوزدەردىڭ بارىسىندا كۇدىكتى ءوز ەركىمەن پوليتسياعا بەرىلدى. ەڭ باستىسى ەشكىم دە زارداپ شەككەن جوق», – دەدى سوفيا قىلىشبەكوۆا. سونىمەن قاتار, ول لومباردقا م ۇلىكتىك زاقىم كەلمەگەنىن, كۇدىكتىمەن اراداعى كەلىسسوزدەر تەلەفون ارقىلى جۇرگىزىلگەن ايتتى.
ايتا كەتەيىك, بۇگىن كەنەسارى كوشەسىندە ورنالاسقان م-لومباردتى توناۋعا ارەكەت جاسالعان بولاتىن. قاراقشى عيمارات ىشىنە باسىپ كىرۋ كەزىندە دابىل تەتىگى ىسكە قوسىلىپ, ەسىك اۆتوماتتى تۇردە ق ۇلىپتالىپ, ىشتە كۇدىكتى جانە ەكى لومبارد قىزمەتكەرى قامالىپ قالعان-دى. پوليتسەيلەر بۇل ەشقانداي لاڭكەستىك ارەكەتكە قاتىسى جوق, تەك توناۋ وقيعاسى ەكەنىن مالىمدەدى.
تالعات رايىمبەك