بۇگىن ريو-دە-جانەيرودا ءوتىپ جاتقان وليمپيالىق ويىنداردىڭ توعىزىنشى جارىس كۇنىنەن ءبىز قانداي جۇلدە كۇتە الامىز؟ ءبىزدىڭ بۇگىنگى نازارىمىز اۋاتىن جارىستاردىڭ اراسىندا ءۇش قارعىپ سەكىرۋدەن فينالدىق سايىس, گرەك-ريم كۇرەسى شەبەرلەرىنىڭ جاڭا باستالاتىن سورەسى, ەرلەر مەن ايەلدەر بوكسى بار.
وسىلاردىڭ اراسىندا پالۋان الماس كەبىسباەۆ, جەڭىل اتلەت, لوندون وليمپياداسىنىڭ چەمپيونى ولگا رىپاكوۆا بار.
داڭقتى جەڭىل اتلەتىمىز كەشە وتكەن ىرىكتەۋ سىنىندا 14,39 مەترگە سەكىرىپ, ءۇشىنشى ناتيجە كورسەتتى. ال ءبىرىنشى بولعان كولۋمبيالىق كاترين يبارگۋەن 14,52 مەترگە سەكىردى.
فينال بۇگىن تاڭ الدىندا, 15 تامىز كۇنى استانا ۋاقىتىمەن 06:00 ساعاتتا باستالادى.
ەسكە تۇسىرە كەتەيىك, ولگا رىپاكوۆا لوندوندا 14,79 مەترلىك كورسەتكىشپەن ىرىكتەۋ كەزەڭىندە ءبىرىنشى بولعان ەدى. ال فينالدا 17,98 مەترلىك دەڭگەيمەن چەمپيون اتانعان بولاتىن.
پالۋان الماس كەبىسباەۆ (59 كگ) مەدال ءۇشىن بارىن سالۋعا ءتيىس. بۇدان قالدى, دوسجان قارپىقوۆ تا وسى جولدان تابىلادى دەپ ۇمىتتەنەمىز.
قىزدارىمىز دا بوكستاسۋلارىن باستايدى. 75 كيلوعا دەيىنگى سالماقتاعى داريعا شاكىموۆا 1/8 فينالدىق شايقاستى ساعات 20:15-تە كانادالىق اريان فورتينمەن وتكىزەدى. ەگەر بۇدان اسسا, 17 تامىز كۇنى ساعات 23:45-تە وينالاتىن 1/4 فينالدا ماروككولىق حاديدجا مارديمەن قولعاپ ءتۇيىستىرىپ, مەدالدار اۋىلىنا كىرۋ ءۇشىن كۇرەسەدى.
بۇگىن بوكسشى جىگىتتەرىمىز اراسىنان قايرات ەراليەۆ پەن ادىلبەك نيازىمبەتوۆتى دە كورەتىن بولامىز. 56 كگ سالماقتاعى قايرات 1/8 فينالدا وزبەك مۋرودجون احماداليەۆپەن كۇش سىناسادى. ال 81 كگ سالماقتاعى ادىلبەك نيازىمبەتوۆ 1/4 فينالدا ازەربايجان تەيمۋر مامەدوۆپەن ايقاسادى. بۇلاردىڭ قاي جەڭىسكە جەتكەنى مەدالدار اۋلاسىنا ەنەدى. ال جارتىلاي فينالدا ۇلىبريتانيالىق دجوشۋا بۋاتسي مەن الجيرلىك ابدەلحافيد بەنچابلا جۇبىنىڭ جەڭگەنىمەن كەزدەسەدى. مۇنداعى بۋاتسي وسىنىڭ الدىندا وزبەك ەلشود راسۋلوۆتى ءۇش رەت ۇرىپ قۇلاتىپ, سوڭعىسىندا نوكاۋتقا جىبەرگەن ەدى. ەگەر قايرات جەڭىسكە جەتەر بولسا, 1/4 فينالدا الجيرلىك ەزەكۋەل البەرتو مەليان مەن تۋنيستىك بيلەل ءمحامديدىڭ اراسىنداعى جەكپە-جەكتە ۇتقانىمەن ۇشىراسادى.
مىنە, بۇگىنگى كۇننىڭ بىزگە ۇسىناتىن سايىستارى وسىنداي.
دامير قوجامقۇل
سونىمەن, بۇگىنگى كۇننىڭ جارىستار كەستەسىمەن تانىس بولىڭىزدار:
نىسانا كوزدەۋ. ەرلەر. ۆينتوۆكامەن ءۇش سيپاتتان كوزدەۋ (50 مەتر). كۆاليفيكاتسيا
سپورتشى: يۋري يۋركوۆ
باستالار ۋاقىتى: ساعات 18:00
جەڭىل اتلەتيكا. مارافون. ايەلدەر
سپورتشىلار: گۇلجانات جاناتبەك, يرينا سمولنيكوۆا
باستالار ۋاقىتى: ساعات 18:30
گرەك-ريم كۇرەسى. ەرلەر. 59 كگ
سپورتشى: المات كەبىسباەۆ
باستالار ۋاقىتى: كۆاليفيكاتسيا – ساعات 19:00. تىكەلەي ەفير (KazSport)
گرەك-ريم كۇرەسى. ەرلەر. 75 كگ
سپورتشى: دوسجان قارتىقوۆ
باستالار ۋاقىتى: كۆاليفيكاتسيا - ساعات 19:06. تىكەلەي ەفير (KazSport)
سينحروندى ءجۇزۋ. دۋەت. ەركىن باعدارلاما
سپورتشىلار: الەكساندرا نەميچ, ەكاتەرينا نەميچ
باستالار ۋاقىتى: ساعات 20:00
بوكس. ايەلدەر. 75 كگ. 1/8 فينال
سپورتشى: داريعا شاكىموۆا
باستالار ۋاقىتى: ساعات 20:15. تىكەلەي ەفير («قازاقستان»)
ۆەلوترەك. ومنيۋم. سكرەتچ
سپورتشى: ارتەم زاحاروۆ
باستالار ۋاقىتى: ساعات 01:40
بوكس. ەرلەر. 56 كگ. 1/8 فينال
سپورتشى: قايرات ەراليەۆ
باستالار ۋاقىتى: ساعات 03:15. تىكەلەي ەفير («حابار»)
بوكس. ەرلەر. 81 كگ. 1/4 فينال
سپورتشى: ادىلبەك نيازىمبەتوۆ
باستالار ۋاقىتى: ساعات 05:00. تىكەلەي ەفير («حابار»)
جەڭىل اتلەتيكا. ءۇش قارعىپ سەكىرۋ. ايەلدەر. فينال
سپورتشى: ولگا رىپاكوۆا
باستالار ۋاقىتى: ساعات 05:55. تىكەلەي ەفير («قازاقستان»)