بۇگىن, 13 تامىز كۇنى قازاقستان قۇراماسىنا ريو-دە-جانەيروداعى وليمپيالىق ويىنداردا العاشقى التىن مەدالدى الىپ بەرگەن اۋىر اتلەت نيدجات راحيموۆ 23 جاسقا تولىپ وتىر. وسى ريودا كۇندەلىكتى بولىپ جاتقان بار جاڭالىقتى «ەگەمەن قازاقستانعا» جولداپ تۇرعان ارناۋلى ءتىلشىمىز باقتيار تايجان دا بۇگىن سول جاقتا تۋعان كۇنىن تويلاپ جاتىر.
ەسكە سالا كەتەيىك, نيدجات راگيموۆ تامىزدىڭ 11-ىنە قاراعان ءتۇنى ويىنداردىڭ اۋىر اتلەتيكا تۋرنيرىندە 77 كگ سالماقتا سىنعا ءتۇسىپ, قوسسايىستا 379 كيلو الۋىمەن چەمپيون اتانعان ەدى. ول جۇلقا كوتەرۋدە 165 كگ سالماقپەن ءۇشىنشى ورىن السا, سەرپە كوتەرۋدە 214 كگ سالماقپەن وزىنەن كەيىنگى قىتاي اتلەتى ليۋي سياوتسزياننان 12 كگ العا كەتىپ قالدى. بۇل سپورتشى دا جيىنتىعىندا 379 ۇپاي جينادى. بىراق جەكە سالماعى قازاقستاندىقتان اۋىر بولعاندىقتان, ەكىنشى ساتىدا قالىپ قويدى.
نيدجاتتىڭ وسى التىن مەدالى شىنىندا قازاقستان ءۇشىن ناعىز اقجولتاي تابىس بولدى. وسىنىڭ ارتىنشا قۇراما قورجىنىنا ەكىنشى «التىن» ءتۇستى. ونى ءجۇزۋشى دميتري بالاندين اكەلدى.
نيدجاتتىڭ وسى تولاعاي تابىسىن ەلگە العاشقىلاردىڭ قاتارىندا قۋانا حابارلاعانداردىڭ ءبىرى دە ءبىزدىڭ ارناۋلى ءتىلشىمىز باقتيار تايجان بولدى. ەندى ونىڭ وزىنە كەلسەك, 2000 جىلدان بەرى «ەگەمەن قازاقستان» گازەتى ساربازدارىنىڭ قاتارىندا ەڭبەك ەتەدى. اراسىندا بىرەر جىل وبلىستىق «وڭتۇستىك قازاقستان» گازەتىن باسقارعانى بولماسا, نەگىزىنەن تابان اۋدارماي, ۇزاق جىلداردان بەرى باس باسىلىمنىڭ وڭتۇستىك قازاقستان وبلىسىنداعى مەنشىكتى ءتىلشىسى بولىپ كەلەدى. ول 2006 جىلى دوحادا وتكەن ازيا ويىندارىنان باستاپ, باسىلىم اتىنان لوندون, بەيجىڭ وليمپيادالارىنا بارىپ قايتتى. ەندى, مىنە, اللا تاعالا وعان كەزەكتى تۋعان كۇنىن الىستاعى برازيليا جەرىندە قارسى الۋدى ءناسىپ ەتىپتى.
ءبىز ەكى تۋعان كۇن يەسىن دە ومىرلەرىندەگى وسى ايرىقشا كەزەڭمەن شىن جۇرەكتەن قۇتتىقتايمىز. ەكەۋىنە دە وزدەرى قىزمەت اتقارىپ جۇرگەن سالادا تابىسقا جەتە بەرۋگە تىلەكتەستىك بىلدىرەمىز. ەڭ باستىسى, قاشاندا باستارى امان, باۋىرلارى ءبۇتىن بولا بەرسىن.
رۋسلان يگىلىك