ريو-دە-جانەيرودا ءوتىپ جاتقان وليمپيالىق ويىندار بوكس ءتۋرنيرىنىڭ 56 كيلوعا دەيىنگى سالماعى 1/16 فينالىندا قازاقستاندىق قايرات ەراليەۆتەن جەڭىلىپ العان الەمنىڭ 2013 جىلعى چەمپيونى, ازەربايجان سپورتشىسى دجاۆيد چەلەبيەۆ قارسىلاسىنىڭ تورەشىلەر كومەگىمەن ۇتقانىن ايتىپ, داۋ شىعارىپ جاتىر.
ەستەرىڭىزگە سالا كەتەيىك, بۇل جەكپە-جەك 2:1 ەسەبىمەن قايراتتىڭ پايداسىنا شەشىلگەن بولاتىن. بوكس جانكۇيەرلەرى ۇرىستىڭ سوڭىندا ەراليەۆتىڭ باياعى موحاممەد ءاليدىڭ ستيلىنە سالىپ, باسەكەلەسى سوققىلارىنان قالاي جالتارىپ كەتكەنىن كورىپ, قاتتى ريزالىق ءبىلدىردى.
ال ءدجاۆيدتىڭ مالىمدەمەسىنە وراي قازاقستان قۇراماسىنىڭ باس جاتتىقتىرۋشىسى مىرزاعالي ايتجانوۆ وتە ادەمى ءۋاج كەلتىردى.
-ازەربايجان جاعى, سونىڭ ىشىندە چەلەبيەۆ ءوزىنىڭ قايرات ەراليەۆتەن ۇتىلماعانىن ايتىپ جاتىر.
-مۇندايلار بولادى. بوكسشىلار, كەيدە ءتىپتى جاتتىقتىرۋشىلار دا ءوز جەڭىلىستەرىن مويىنداي قويمايدى. ايتالىق, كەيدە قازاقستاندىق بوكسشى دا تاپ وسىلاي تەڭ شايقاسقا ءتۇسىپ جاتادى, بىراق تورەشىلەر قارسىلاسىنىڭ قولىن كوتەرىپ كەتەدى... مەن قاشاندا اربيتر كىمنىڭ قولىن كوتەرسە, سونىڭ جەڭىسكە جەتكەنىن ايتامىن. قالعانىنىڭ ءبارى – بوس ءسوز, - دەدى ول.
دامير قوجامقۇل