ۇمىتشاق پا, ۇيالشاق پا؟

مەملەكەتتىك قىزمەتكەرلەرگە تالاپ كۇشەيدى. ولاردى ىرىكتەۋدىڭ جاڭا جۇيەسى جاسالدى. سوعان وراي ءار مەملەكەتتىك قىزمەتكەرگە, اسىرەسە, باسقارما باسشىلارىنا جۇكتەلەر جاۋاپكەرشىلىك جۇگى دە ارتتى. الايدا, جاۋاپكەرشىلىكتى جەتە سەزىنۋ ءالى دە ولقى ءتۇسىپ جاتا­تىنىن قايتەرسىز؟ وسى سوزىمىزگە دالەل كەرەك پە؟ ونى وبلىس اكىمىنىڭ ءوزى العاشقى جارتى­جىل­دىق قورىتىندىلارىنا ارنالعان وتىرىستا كەلتىردى. سوندا كەي باسقارما باسشىلارى ءوز سالالارى بويىنشا قانشا جۇمىس ورنى اشىلعانىن دايەكتى دەرەكتەرمەن ايتا الماعان ەدى. – اشىلعان جۇمىس ورنى تۋرالى اقپاراتتى ءبارىڭىز ءبىلىپ وتىرۋىڭىز كەرەك, – دەدى وبلىس  اكىمى نۇرلان نوعاەۆ. – جاۋاپكەرشىلىكتەن قاشىپ, جۇمىستارىڭىزدىڭ اياسىن شەكتەپ وتىرسىزدار. ءاربىر باسقارما بولەك الەمدە ءومىر ءسۇرىپ جاتقانداي. بيۋدجەتتەن بولىنگەن اقشانىڭ باستى ماقساتى – جۇمىس ورىندارىن اشۋ. كاسىپكەرلىك باسقارماسى اقشانىڭ قالاي جۇمسالىپ جاتقانىن بىلمەسە, جۇمىس ورنىمەن قامتۋ باسقارماسى قانشا جۇمىس ورنىنىڭ اشىلىپ جاتقانىن بىلمەسە, اۋىل­شا­رۋاشىلىق باسقارماسى ءوز الدىنا حابارسىز بولسا, نە ءۇشىن جۇمىس ىستەپ جاتىرمىز؟ ءبىزدىڭ ماقساتىمىز – اقشا ءبولۋ ەمەس, جۇمىس ورنىن اشۋ, ەكونوميكانى دامىتۋ. بولىنگەن اقشانىڭ قالاي پايدالانىلىپ جاتقانىن قاداعالاۋ كەرەك. باسقارمالار اراسىندا بايلانىس بولسىن... مىنە, وسىنىڭ وزىنەن اتالعان باس­قارمالاردىڭ باسشىلارى ءوز مىندەتتەرىن نەمقۇرايلى اتقارا­تىنىن بايقاۋعا بولاتىنداي. ارينە, ءار باسقارمانىڭ ءوز جوس­پارى, سوعان وراي اتقاراتىن جۇ­مىسى ارقيلى بولار. بىراق, ءبارى­نىڭ مۇددەسى ءبىر, ياعني ءوڭىردىڭ الەۋمەتتىك-ەكونوميكالىق دامۋىنا ۇلەس قوسۋ ەمەس پە؟ ەندەشە, باس­قارما باسشىلارى ءبىر-بىرىمەن ءوزارا بايلانىس ورناتۋدى كوزدەۋى ءتيىس قوي. الايدا, ءدال قازىر ولاي بولماي تۇرعانى وكىنىشتى. باس-باسىنا بي بولۋدى كوزدەي مە, الدە ورتاق ماقسات جولىنداعى دەرەك­تەردى ءبىر-بىرىنەن قىزعانا ما؟ ات­قارىپ وتىرعان جۇمىستارى ءجونىن­دەگى دەرەكتەردى ايتۋعا كەلگەندە نەگە ۇمىتشاق بولا قالادى؟ بالكىم, باسقارمالار باسشىلارى تىم ۇيالشاق پا؟ قالاي بولعاندا دا, باس­قار­ما باسشىلارى اشىقتىق قا­عيداتىمەن ەشتەڭەنى بۇركە­مە­لەمەگەنىن قالار ەدىك... جولداسبەك شوپەعۇل, «ەگەمەن قازاقستان» اتىراۋ