ەلىمىزگە العاش رەت جۇزۋدەن وليمپيادانىڭ التىن مەدالىن جەڭىپ العان دميتري بالاندين ءالى دە ءوزىنىڭ چەمپيون بولعانىن سەزىنە الماي جۇرگەنىن ايتادى. وسىنى ريو-دە-جانەيرودا وليمپيادا چەمپيوندارى مەن جۇلدەگەرلەرىنە ارنالعان ءباسپاسوز ءماسليحاتىنا قاتىسقان «ەگەمەن قازاقستان» گازەتىنىڭ ارناۋلى ءتىلشىسى باقتيار تايجان ايتتى.
-مەن قارسىلاستارىمنىڭ قالاي ءجۇزىپ بارا جاتقانىن كورمەدىم. وزىمە ءالى دە تاڭقالىپ وتىرمىن. ماعان وليمپيادا چەمپيونى بولعانىمدى سەزىنۋ ءۇشىن 10 كۇن ۋاقىت كەرەك شىعار. ال قازىر ءوزىمدى شارشاڭقى سەزىنىپ ءجۇرمىن. قۋانىشىم قوينىما سىيماي ءجۇر. وليمپيادا وڭاي بولعان جوق. تاڭعى ساعات 6-دا ءبارى ۇيىقتاپ جاتقاندا ءبىز مۇزداي سۋدا ءجۇزىپ جۇردىك. بىراق, تاڭنىڭ اتىسىنان كۇننىڭ باتىسىنا دەيىن جاتتىعىپ, دايىندالعانىمىز تۇبىندە ناتيجە بەردى. مۇنىڭ ءبارى ەلىمىز ءۇشىن بولدى. ەڭ باستىسى, ەلىمىزدىڭ ءانۇرانى وينالىپ, اسپان ءتۇستى كوك بايراعىمىز وليمپيادا تورىنە شىعىپ, قالىقتادى, – دەدى ول.
وليمپيادا چەمپيونىمەن اڭگىمەنى گازەتىمىزدىڭ بۇگىنگى نومەرىنەن وقي الاسىزدار. ال ءبىزدىڭ وليمپياداعا العاش رەت قاتىسىپ, چەمپيون اتانعان دميتري بالاندين تۋرالى ايتارىمىز, بۇل سپورتشىمەن 2014 جىلى وڭتۇستىك كورەيانىڭ ينچحون قالاسىندا وتكەن جازعى ازيا ويىندارى كەزىندە اڭگىمەلەسەن ەدىك. سول كەزدە ول ازيادا چەمپيونى اتانىپ, سارىقۇرلىقتىڭ مىقتى دەگەن جۇزگىشتەرىن مويىنداتقان بولاتىن. 19 جاستاعى جاس جىگىتتىڭ جارىسىن ازيا قۇرلىعىندا الدىنا قارا سالدىرمايتىن جاپون جۇزگىشتەرىنىڭ جاتتىقتىرۋشىلارى دا باس بارماقپەن باعالاعانى ەسىمدە. كۇنشىعىس ەلىنىڭ سۋدا جۇزۋدەن باس جاتتىقتىرۋشىسىنىڭ ءبىر ءسوزى دە ءالى ەسىمنەن كەتپەيدى. ول ءبالانديننىڭ كەزەكتى جارىسى كەزىندە ءبىزدىڭ جانىمىزعا كەلىپ, «وسى جىگىتتىڭ بولاشاعى بار. ول وليمپيادا چەمپيونى بولادى. ءالى ءبارىن مويىنداتادى», دەگەن ەدى. سول كەزدە ىشىمىزدەن «ءامين» دەدىك. ەندى سول تىلەگىمىز ورىندالىپ, بالاندين وليمپيادا چەمپيونى اتانىپ وتىر.
داستان كەنجالين
فوتو: twitter