قىزىلوردا اۆتوبۋس پاركى تاعى دا جاڭا 40 قوعامدىق كولىك الدى. كەلەسى ايدا تاعى 42-ءسى كەلەدى. وسىلايشا, قالاداعى حالىق كوپ قاتىنايتىن مارشرۋتتاردىڭ اۆتوبۋستارى تۇگەلدەي جاڭارماق.
بارلىق اۆتوبۋستار گازبەن جۇرەدى, GPS, بەينەباقىلاۋ كامەرالارى مەن مۇمكىندىگى شەكتەۋلى ازاماتتار ءۇشىن ءمىنىپ-ءتۇسۋگە ارنالعان اپپارەلمەن جابدىقتالعان. ولار 78 جولاۋشىعا دەيىن تاسىمالداي الادى. كولىك ءجۇرگىزۋشىلەرى مەن كوندۋكتورلار ارنايى دايىندىقتان وتكەن. جاڭا اۆتوبۋستاردىڭ ىسكە قوسىلۋىمەن 160 ادام تۇراقتى جۇمىسقا ورنالاستى.
قازىر ارنايى بەلگىلەنگەن ايماقتا سىيىمدىلىعى 200 اۆتوبۋسقا ارنالعان اۆتوبۋس پاركىنىڭ قۇرىلىسى جۇرگىزىلۋدە. اۆتوبۋس پاركىندە كولىك جوندەۋ, جۋ تسەحى مەن GPS ارقىلى بارلىق اۆتوبۋستاردىڭ باعىتىن باقىلاپ وتىراتىن ورتالىق بولادى.
وبلىس اكىمى قىرىمبەك كوشەرباەۆ تۇرعىنداردى جاڭا اۆتوبۋستاردىڭ ىسكە قوسىلۋىمەن قۇتتىقتادى.
– كوپتەگەن جىلدار بويى حالىقتى ابىگەرگە سالعان وسى قوعامدىق كولىك ماسەلەسىن شەشۋ ماقساتىندا ءبىز 2014 جىلى «بايقوڭىر» الەۋمەتتىك كاسىپكەرلىك كورپوراتسياسى جانىنان قىزىلوردا اۆتوبۋس پاركىن قۇرىپ, ەۋروپا قايتا قۇرۋ جانە دامۋ بانكىمەن ءبىرلەسىپ جۇمىس جاسادىق. سونىڭ ءناتيجەسىندە بانك 21 ميلليون اقش دوللارى كولەمىندە نەسيە بەردى. بۇگىن قىزىلوردالىقتار ءۇشىن ايرىقشا كۇن, سالتاناتتى ءسات. قالا حالقىنىڭ كوپتەن كۇتكەن قۋانىشى ورىندالىپ, سۋ جاڭا ۇلكەن سىيىمدىلىقتاعى زاماناۋي اۆتوبۋستار ەل يگىلىگىنە پايدالانۋعا بەرىلىپ وتىر, – دەدى وبلىس اكىمى.
شاراعا ەۋروپا قايتا قۇرۋ جانە دامۋ بانكىنىڭ قازاقستان بويىنشا ديرەكتورى دجانەت حەكمان ارنايى كەلىپ قاتىسىپ, اۆتوبۋس ءجۇرگىزۋشىلەرىنە كىلتتەردى تابىستادى.
ال بۇعان دەيىن ەلگە قىزمەت ەتكەن اۆتوبۋستار قالانىڭ شەت ايماقتارىنان جولاۋشى تاسىمالدايتىن بولدى.
ەرجان بايتىلەس,
«ەگەمەن قازاقستان»
قىزىلوردا