پارلامەنت ءماجىلىسىنىڭ دەپۋتاتتارى شاۆحات وتەمىسوۆ, كەڭەس ءابساتيروۆ جانە سنەجانا يماشەۆا ورال ساۋدا-ونەركاسىپ كومپانياسى ۇجىمىمەن كەزدەستى.
پارلامەنتشىلەر تاڭداۋى وزگە ەمەس, ناق وسى وتاندىق كومپانياعا ءتۇسۋى نەلىكتەن؟ ارينە, مۇنىڭ وزىندىك سىرى مەن سەبەبى جوق ەمەس. راس, بۇگىندە ورال وڭىرىندە مەملەكەتتىك باعدارلامالاردىڭ كومەگىمەن ءوز ىستەرىنىڭ ءورىسىن ءوسىرىپ وتىرعان كاسىپورىندار جەتكىلىكتى. سونىڭ كوش باسىندا «ورال ساۋدا-ونەركاسىپ كومپانياسى» جشس كەلەدى. پارلامەنت دەپۋتاتتارى, اسىرەسە, مۇندا «بيزنەستىڭ جول كارتاسى-2020» مەملەكەتتىك باعدارلاماسىنا ساي تىندىرىلعان ىستەر قوماقتى ەكەنىنە كوز جەتكىزدى.
مۇندا باعدارلامادا بەلگىلەنگەن قارجىلاي قولداۋ كوزدەرىنىڭ ارقاسىندا ءوندىرىس اۋقىمى ودان ءارى كەڭەيە ءتۇسىپتى. ءارى بولىنگەن قاراجات تولىقتاي يگەرىلگەن. كومپانيا نەگىزىنەن سۋ, گاز جانە مۇناي قۇبىرلارىن شىعارۋمەن اينالىسادى. ونىڭ ىشىندە ديامەترى 1 600 ميلليمەترلىك قۇبىرلاردىڭ ەلىمىزدە ەشقانداي بالاماسى جوق. كەزدەسۋ كەزىندە وسىنداي باسەكەلەستىككە توتەپ بەرە الاتىن ستراتەگيالىق سيپاتتاعى ونىمدەردى رەسەيگە ەكسپورتتاۋ مۇمكىندىكتەرى تۋرالى جانە بۇعان ەۋرازيالىق ەكونوميكالىق وداق شەڭبەرىندە جۇرگىزىلىپ وتىرعان كەڭ اۋقىمدى شارالار دا وڭ سەپتىگىن تيگىزگەنى جان-جاقتى ءسوز بولدى.
بۇگىنگىدەي كۇردەلى قارجى-ەكونوميكالىق جاعدايدا داعدارىستى اۋىزدىقتاۋ, كاسىپورىن قىزمەتكەرلەرىن قىسقارتۋدىڭ قامىتىنا كيلىكتىرمەۋ جانە جالاقىنى ۋاقتىندا تولەۋ ءىسىنىڭ ورنى ايرىقشا. بۇل تۇرعىدا ورال ساۋدا-ونەركاسىپ كومپانياسىنىڭ ءباسى مەن مارتەبەسى دە بيىك تۇر. سونداي-اق, پارلامەنتشىلەر كاسىپورىن باسشىسى ۆالەري كرىلوۆتىڭ تاراپىنان ءوندىرىستىڭ بولاشاعىنا قاتىستى كەڭ اۋقىمدى باعدارلاما بەلگىلەنگەنىنە دە ريزاشىلىعىن ءبىلدىردى. اسىرەسە, مۇندا كادرلاردى تاربيەلەۋگە جانە ىرىكتەۋ مەن ورنالاستىرۋعا كونتسەپتۋالدى كوزقاراس تۇرعىسىنان جان-جاقتى كوڭىل ءبولىنىپ وتىرعانى قۋانتادى. وسى ورايدا, اتالمىش كومپانيادان وزگە ارىپتەستەرىنىڭ ۇيرەنەتىن تۇستارى دا از ەمەستىگى بايقالادى. اتاپ ايتقاندا, كومپانيا باسشىسىنىڭ بولاشاق كادرلاردى جوعارى جانە ارناۋلى وقۋ ورىندارىنان ءوزى ىزدەپ ءجۇرىپ تاڭدايتىنى, ولارعا ءوندىرىس پەن ونەركاسىپ تاقىرىبىندا لەكتسيالار وقيتىنى, ستۋدەنتتەردىڭ وندىرىستىك تاجىريبەدەن وتۋىنە جان-جاقتى كوڭىل بولەتىنى ايتۋعا تۇرارلىقتاي. سونىمەن بىرگە, كومپانيا قاراجاتى ەسەبىنەن شەتەلدە وقىپ جۇرگەن جاستار دا بار ەكەن.
تەمىر قۇسايىن,
«ەگەمەن قازاقستان»
باتىس قازاقستان وبلىسى