ريو-دە-جانەيرودا ءوتىپ جاتقان وليمپيالىق ويىنداردىڭ دزيۋدوشىلار ءتۋرنيرىنىڭ 1/8 فينالىندا چەح لۋكاش كرپالەكتەن ۇتىلعان 100 كگ سالماقتاعى ماكسيم راكوۆ جارىس جولىنان شىعىپ قالدى.
قازاقستاندىق سپورتشىنىڭ بۇل جولعى قارسىلاسى الەمنىڭ 2014 جىلعى چەمپيونى بولىپ كەزىكتى. ول ءبىزدىڭ اتلەتتىڭ ەكى شيدو, ياعني ەسكەرتۋ الۋى ارقىلى جەڭىسكە جەتتى.
وسىمەن قازاقستاننىڭ ويىندارداعى ەڭ سوڭعى دزيۋدوشىسى دا تۋرنيردەن كەتتى.
راكوۆ ءوزىنىڭ ءبىرىنشى جەكپە-جەگىندە ەستونيالىق گريگوري ميناشكيندى ەسكەرتۋىنىڭ كوپتىگى ارقاسىندا ۇتىپ ەدى.
بۇعان دەيىن رەسپۋبليكا دزيۋدوشىلارى قازاقستان قورجىنىنا تۇسكەن العاشقى ەكى مەدالدىڭ يەلەرى بولعان ەدى. اتاپ ايتقاندا, وتگونتسەتسەگ گالبادراح – قولا, ال ەلدوس سمەتوۆ كۇمىس مەدال جەڭىپ العان بولاتىن.
دامير قوجامقۇل