كايردە تەلەفون بايلانىسى ناشارلادى
كەشە كوتەرىلىستەن كوز اشپاي تۇرعان ەگيپەتتىڭ استاناسى – كاير قالاسىندا تەلەفون بايلانىسى ناشارلادى. كەيبىر دەرەككوزدەرىنە قاراعاندا, بۇل جاعدايدى ۇكىمەت ادەيى تۋىنداتىپ وتىرعان سەكىلدى.
دەگەنمەن, سوعان قاراماستان, «مۇسىلمان اعايىندار» قوزعالىسى جاڭا شەرۋگە شىعاتىندارىن مالىمدەۋدە. ولار حابار تاراتۋدا Facebook حالىقارالىق الەۋمەتتىك بايلانىس جۇيەسى مەن Twitter ىقشام بلوگىنىڭ قىزمەتىن پايدالاندى. كەشە تۇندە بىرقاتار ەگيپەتتىك سايتتاردى اشۋ مۇمكىندىگى پايدا بولعانىنا قاراماستان, بارلىق پوشتا سەرۆەرلەرى جابىق بولىپ شىقتى.
ليۋكسەمبۋرگ ازاماتتىعىن قابىلداۋدا
بەلگيانىڭ وڭتۇستىگىندە ليۋكسەمبۋرگپەن شەكتەسەتىن ءوڭىرلەردە تۇرىپ جاتقان جۇزدەگەن بەلگيالىق ليۋكسەمبۋرگ ازاماتتىعىن قابىلداۋدا. وسىعان قاراعاندا, ولار ءوز ەلدەرىنىڭ بولاشاعىنان قاۋىپتەنەتىن سەكىلدى.
قازىرگى كۇنى بەلگيادا ەكونوميكالىق جاعدايدىڭ ناشارلاپ, وسىنىڭ نەگىزىندە ساياسي شيەلەنىستىڭ كۇشەيە تۇسكەندىگى بەلگىلى. ەلدىڭ كوپتەگەن تۇرعىندارى وسىعان بايلانىستى ءوز الاڭداۋشىلىقتارىن اشىق ءبىلدىرىپ وتىر. ال بەلگيا مەن ليۋكسەمبۋرگتىڭ ورتاسىندا قوس ازاماتتىق تۋرالى كەلىسىم جاسالعان. قازىرگى كۇنى بەلگيادا ءحىح عاسىردا وسى ەلگە كەلگەن ليۋكسەمبۋرگتىكتەردىڭ ۇرپاقتارى كوپتەپ تۇرىپ جاتىر.
كۇيەۋ بالاسى دا جازىقتى بولعانى ما؟
تۋنيس ۇكىمەتى بيلىكتەن تايدىرىلعان پرەزيدەنت زين ءال-ءابيدين بەن ءاليدىڭ كانادادا تۇراتىن كۇيەۋ بالاسى بەلحاسسان ترابەلسيدى تۇتقىنداۋدى وسى ەلدىڭ ۇكىمەتىنەن تالاپ ەتۋدە كورىنەدى.
كانادا ۇكىمەتى بۇل تالاپقا ءالى جاۋاپ بەرە قويعان جوق. الايدا كانادادا تۇراتىن ءتۋنيستىڭ بۇرىنعى پرەزيدەنتىنىڭ تۋىستارىنا بەرىلگەن ەلدە تۇرۋ جونىندەگى رۇقساتتىڭ كۇشىن جويعاندىعى ءمالىم بولدى. قاڭتاردىڭ ورتاسىندا ەلدە پايدا بولعان جاپپاي نارازىلىقتىڭ ىقپالىمەن مەملەكەتتىك توڭكەرىستىڭ جۇزەگە اسىپ, پرەزيدەنت زين ءال-ءابيدين بەن ءاليدىڭ ساۋد ارابياسىنا قاشقاندىعى بەلگىلى. ال مۇندا ءالى ۇكىمەت جاساقتالماي وتىر.
ەكونوميكا وسسە, التىن قۇنى تومەندەيدى
امەريكا مەن ەۋروپاداعى قارجى كورسەتكىشتەرىنىڭ نىعايۋىنا بايلانىستى جانە اقش ەكونوميكاسىندا دامۋدىڭ بايقالۋىنا وراي وسى اپتادا التىن باعاسىنىڭ ودان ءارى تومەندەي تۇسكەندىگى كورىنىس بەردى. بىرقاتار ساراپشىلار وتكەن جىلدىڭ قازانى مەن جەلتوقسانى ارالىعىندا اقش ەكونوميكاسىنىڭ ءوسىمى 3,5 پايىزدى قۇرايدى دەپ مالىمدەدى.
داعدارىس كەزىندە التىن باعاسىنىڭ ەداۋىر وسكەندىگى بەلگىلى. ماسەلەن, 2010 جىلى الەمدە ونىڭ باعاسى 30 پايىزعا كوتەرىلدى. وعان حالىقتىڭ حالىقارالىق ۆاليۋتالارعا, سونىڭ ىشىندە, اسىرەسە, دوللارعا دەگەن سەنىمىنىڭ تومەندەگەندىگى اسەر ەتتى. وسىعان بايلانىستى ادامدار التىن ساتىپ الۋدى كۇشەيتتى. ەندى داعدارىستىڭ ەڭسەرىلىپ, الەمدە ەكونوميكانىڭ تۇراقتانا باستاۋىنا بايلانىستى التىن باعاسى تومەندەپ كەلە جاتقان سياقتى.
سوڭعى كەزدە Microsoft تابىسى وراسان
2010 جىلدىڭ قازانى مەن جەلتوقسانى ارالىعىندا Microsoft كورپوراتسياسى 19,95 ميلليارد دوللاردىڭ كىرىسىن كىرگىزگەن. سونىڭ ىشىندە كومپانيا 6,6 ميلليارد دوللاردىڭ تازا پايداسىن قاراتقان. ال جىل ىشىندەگى ونىڭ تابىسى بۇرىنعى كەزەڭمەن سالىستىرعاندا, 5 پايىزعا كوتەرىلىپ وتىر ەكەن.
كەيبىر ساراپشىلاردىڭ مالىمدەۋى بويىنشا, Microsoft كورپوراتسياسى رىنوكتاعى نەگىزگى باسەكەلەستەرىنىڭ ءبىرى بولىپ تابىلاتىن Apple-گە قاراعاندا, جاقسى جۇمىس ىستەگەن. تازا پايدا قاراتۋ جاعىنان ودان 600 ميلليون دوللارعا اسىپ تۇسكەن. ال 2010 جىلدىڭ شىلدەسى مەن قىركۇيەگى ارالىعىندا Microsoft 16,2 ميلليارد دوللاردىڭ كىرىسىن الىپ, ءوز تاريحىندا رەكوردتىق كورسەتكىشكە قول جەتكىزگەن كورىنەدى.
داۆوس فورۋمىنا قاتىسۋشىلار قاۋپى
داۆوس قالاسىندا ءوتىپ جاتقان بۇكىلالەمدىك ەكونوميكالىق فورۋمعا قاتىسۋشىلار الەمدىك ەكونوميكانى داعدارىستىڭ ەكىنشى تولقىنى شارپيدى دەگەن قاۋىپتەرىن بىلدىرۋدە. ولار بۇل جاعدايدى قىتاي ەكونوميكاسىنداعى قارجىنىڭ ۇلكەن بولىگى قور نارىقتارىنا اۋىپ, بانكتەردىڭ كاسىپورىندارعا بەرىلەتىن نەسيەنى ازايتا تۇسكەندىگىمەن بايلانىستىرىپ وتىر.
قازىرگى كۇنى داعدارىس كەزىندە ءوز تۇراقتىلىعىن ساقتاي العان قىتاي ەكونوميكاسىنا حالىقارالىق ينۆەستورلار قارجىنى كوپتەپ قۇيا باستادى. وسىنى پايدالانعان قور رىنوگىنىڭ ويىنشىلارى اتالعان جاعدايدان مول پايدا تاۋىپ قالۋعا ۇمتىلىس تانىتىپ وتىر. ول, تۇپتەپ كەلگەندە, جاڭا قارجى داعدارىسىن تۋىنداتۋى مۇمكىن ەكەن. الايدا داۆوسقا كەلگەن قىتاي حالىق بانكىنىڭ وكىلى لي داوكۋي بۇكىلالەمدىك فورۋمعا قاتىسۋشىلاردى قىتاي باسشىلىعىنىڭ مۇنداي جاعدايعا جول بەرمەيتىندىگىنە سەندىرىپ باعۋدا.
قىسقا قايىرىپ ايتقاندا:
*كورەيا حالىقتىق-دەموكراتيالىق رەسپۋبليكاسى باسشىسىنىڭ ماكاو قالاسىندا (قىتاي) تۇراتىن ۇلكەن ۇلى كيم چەن نام جاپوننىڭ «توكيو سيمبۋن» گازەتىنە بەرگەن سۇحباتىندا سولتۇستىك كورەيا مەن اقش اراسىنداعى كيكىلجىڭ باسەڭسىمەسە, سولتۇستىك كورەيانىڭ يادرولىق قارۋدان ەش ۋاقىتتا باس تارتپايتىندىعىن مالىمدەگەن.
*اقش اكىمشىلىگىنىڭ رەسمي وكىلى روبەرت گيببس ەگيپەت پرەزيدەنتى حوسني مۇباراكتىڭ اقش-تىڭ سەنىمدى ارىپتەسى سانالاتىندىعىنا قاراماستان, ۆاشينگتوننىڭ ەگيپەتتە بولىپ جاتقان ۇكىمەتكە قارسى شەرۋلەرگە قاتىستى ەشبىر ارەكەت جاسامايتىندىعىن اتاپ كورسەتكەن.
ينتەرنەت ماتەريالدارى نەگىزىندە ازىرلەندى.