ءماجىلىس توراعاسى ورال مۇحامەدجانوۆتىڭ جەتەكشىلىگىمەن وتكەن پالاتانىڭ سارسەنبى كۇنگى جالپى وتىرىسىنىڭ كۇن ءتارتىبىندە ون ءبىر ماسەلە قارالدى. سونداي-اق دەپۋتاتتار ءار ءتۇرلى ءتۇيتكىلدەر بويىنشا ءبىر ساعاتتان استام ۋاقىت ءوز ساۋالدارىن جولدادى. ولاردا ءتۇرلى جاعدايلارعا قاتىستى ماسەلەلەر كوتەرىلدى.
ۇكىمەت باسشىسىنىڭ اتىنا جولداعان ساۋالىندا امانگەلدى مومىشەۆ داڭقتى گەنەرال سابىر راحيموۆتىڭ بيىكتىگى ءتورت مەترلىك ەسكەرتكىشىن وزبەكستان تارابى الىپ تاستاعاندىقتان, ونىڭ ەسكەرتكىشتەرىن الماتى جانە استانا قالالارىندا اشىپ, بىرقاتار الەۋمەتتىك نىساندارعا ەسىمىن بەرۋ قاجەتتىگىن كولدەنەڭ تارتتى. دەپۋتات سونداي-اق اتالعان ۆاندالدىق ارەكەتتەرى ءۇشىن كورشى ەلگە نە ۇكىمەت, نە ەلىمىزدىڭ سىرتقى ساياسات ۆەدومستۆوسى تاراپىنان قارسىلىق نوتاسى جولدانباعانىنا قىنجىلىسىن ءبىلدىردى. وسى رەتتە حالىق قالاۋلىسى وزبەكستاندا 2 ميلليوننان استام ەتنوستىق قازاقتىڭ تۇراتىنىن, بۇل ارەكەت ۇلتتىڭ ار-نامىسىنا قاياۋ تۇسىرەتىنىن اشىنا جەتكىزدى.
نۇرلان ونەرباەۆ ءوزىنىڭ دەپۋتاتتىق ساۋالىندا «ەير استانا» اۋە كومپانياسىن سىن تەزىنە الدى. دەپۋتات اتالعان كومپانيا ۇشاقتارىندا ەلىمىزدى تانىستىرۋ الماتىداعى شىركەۋدەن باستالىپ, سونىمەن اياقتالاتىنىنا, 70 پايىزى مۇسىلماندار بولىپ تابىلاتىن قازاقستان تۋرالى اقپارات وسىلايشا بەرىلىپ جاتاتىنىنا نارازىلىعىن جاسىرمادى. ال ارال تۇزى پروبلەماسىن كوتەرگەن مۇرات ابەنوۆ وسى ورايدا ۇكىمەت نازارىن قازىرگى تاڭدا قازاقستان رىنوگىن ارزان رەسەيلىك تۇزدىڭ جاۋلاپ العانى ءجونسىز ءجايت ەكەنىنە اۋداردى. ونىڭ ايتۋىنشا, رەسەيلىك تۇز وندىرۋشىلەرگە مەملەكەت تاراپىنان قولداۋ بولعاندىقتان, ولاردىڭ تاۋارلارى ءوتىمدى.
قازاقستان ۇكىمەتى مەن قىرعىزستان ۇكىمەتى اراسىنداعى ەكى ەل ەلشىلىكتەرى قاجەتتەرى ءۇشىن استانا مەن بىشكەك قالالارىندا عيماراتتار مەن جەر ۋچاسكەلەرىن وتەمسىز پايدالانۋعا ءوزارا بەرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن قاراعان دەپۋتاتتار ونى قولداۋ كەرەك دەپ شەشتى. ديپلوماتيالىق قالاشىق اۋماعىنداعى 556 شارشى مەتر عيمارات پەن 0,247 گەكتار جەر قىرعىزدارعا 49 جىلدىق جالمەن وتەمسىز بەرىلسە, بىشكەكتەگى 532 شارشى مەترلىك عيمارات پەن 0,17 گەكتار جەر ۋچاسكەسى قازاقستانعا وسىنداي شارتپەن بەرىلەتىن بولىپ كەلىسىلگەن.
تاعى ءبىر حالىقارالىق قۇجات – ۆەنادا 1968 جىلعى 8 قاراشادا قول قويۋ ءۇشىن اشىق جول بەلگىلەرى مەن سيگنالدارى تۋرالى كونۆەنتسيانى تولىقتىراتىن ەۋروپالىق كەلىسىمدى راتيفيكاتسيالاۋ تۋرالى زاڭ جوباسى مەن وسى جوباعا جاپسارلاس جول تاڭبالارى تۋرالى حاتتامانى راتيفيكاتسيالاۋ تۋرالى زاڭ جوباسىن دا دەپۋتاتتار ءبىراۋىزدان قولدادى. كەلىسىمدە بەلگىلەنگەن جۇيەگە سايكەس كەلمەيتىن بارلىق سيگنالدىق بەلگىلەر, بەلگىلەۋلەر, قۇرىلعىلار مەن تاڭبالار كەلىسىم كۇشىنە ەنگەن كۇننەن باستاپ ون جىل ىشىندە اۋىستىرىلۋى ءتيىس. ىشكى ىستەر ءمينيسترىنىڭ ورىنباسارى امانتاي كۇرەڭبەكوۆتىڭ مالىمدەۋىنشە, قازاقستان ءوز بەلگىلەرىن 90-شى جىلدارى-اق اۋىستىرىپ تاستاعان, سوندىقتان قوسىمشا قارجىنى تالاپ ەتپەيدى.
سونداي-اق 2009 جىلعى 11 جەلتوقسانداعى كەدەن وداعىنىڭ ۆەتەرينارلىق-سانيتارلىق شارالار ءجونىندەگى كەلىسىمىنە وزگەرىستەر ەنگىزۋ تۋرالى حاتتامانى راتيفيكاتسيالاۋعا قاتىستى زاڭ جوباسى دا ماقۇلدانعانىن ايتا كەتۋ كەرەك. بۇل جەردە ماسەلە تاۋارلاردى ءوندىرۋدى, وڭدەۋدى جانە ساقتاۋدى جۇزەگە اسىراتىن ۇيىمدار مەن ادامدارعا بىرلەسكەن تەكسەرىستەر (ينسپەكتسيالار) جۇرگىزە الۋ قۇقى بەرىلەتىندىگىندە بولىپ وتىر. سونىمەن بىرگە, وزگە ەلدىڭ ۋاكىلەتتى ورگاندارى ءبىر-بىرىنە سەنىم ءبىلدىرۋ ارقىلى وزدەرى تەكسەرۋ جۇرگىزە بەرەتىن نورما دا زاڭدىق قۇجاتتا قاراستىرىلىپتى.
اسقار تۇراپباي ۇلى.