ازيادا الاۋى قاڭتاردىڭ 26-سى كۇنى تالدىقورعانعا دا جەتتى. ۇشاقتان وبلىس اكىمى سەرىك ءۇمبەتوۆ باستاعان جانكۇيەرلەر قارسى الىپ, ءباسپاسوز ءماسليحاتى ءوتتى. الاۋ ەستافەتاسىن وتكىزۋ ءجونىندەگى ۇيلەستىرۋ كەڭەسىنىڭ جەتەكشىسى سارسەن قۇرانبەك ءوڭىرلەردەگى كەزدەسۋلەر جايىنا توقتالدى. ونىڭ ايتۋىنشا, جەتىسۋ جەرى سپورتتى دامىتۋ مەن سالاماتتى ءومىر سالتىن قالىپتاستىرۋدا وزگەلەرگە ۇلگى بولىپ, العى شەپتەن كورىنگەن.
سپورت الاڭىنا 27 قاڭتار كۇنى جينالعان جانكۇيەرلەر الدىندا ءسويلەگەن وبلىس باسشىسى سپورتشىلاردىڭ تەك جەڭىستەرگە جەتىپ, بيىكتەردەن كورىنۋلەرىنە تىلەكتەستىگىن ءبىلدىردى. بۇدان سوڭ سەرىك ءابىكەن ۇلى الاۋ قۇتىسىن العاشقى بولىپ الىپ ءجۇرۋ قۇرمەتىنە يە بولدى.
الاۋدى الىپ ءجۇرۋدى ەلىمىزدىڭ كوكبايراعىن وزگە مەملەكەتتەردە بيىككە كوتەرىپ, ءانۇراندى شىرقاتقان وليمپيادا چەمپيوندارى جالعاستىردى. ولاردىڭ قاتارىندا دزيۋدو كۇرەسىنەن وليمپيا ويىندارىنىڭ قولا ءجۇلدەگەرى ايدىن سماعۇلوۆ, وليمپيادانىڭ قولا ءجۇلدەگەرى ماۋلەن مامىروۆ, گرەك-ريم كۇرەسىنەن الەم كۋبوگىنىڭ قولا ءجۇلدەگەرى نۇرماحان ءتىناليەۆ, حالىق كاھارمانى ازامات جۇمادىلوۆ, سپورت مەتسەناتى جانايدار ەگىنباەۆ, گرەك-ريم كۇرەسىنەن وليمپيادا چەمپيونى يۋري مەلنيچەنكو, وليمپيا ويىندارىنىڭ كۇمىس جۇلدەگەرى اسحات جىتكەەۆ, گرەك-ريم كۇرەسىنەن وليمپيادانىڭ قولا ءجۇلدەگەرى نۇرباقىت تەڭىزباەۆ, اۋىر اتلەتيكادان الەم چەمپيونى ۆلاديمير سەدوۆ جانە ءونەر مەن ەڭبەكتە الدا جۇرگەن جەتىسۋلىقتار بولدى.
ەستافەتا سالتاناتىندا ەجەلگى ۇلتتىق سپورت ءتۇرى – ساياتشىلىقپەن اينالىسقان جەتى ازامات ءبۇركىتتەرىمەن, قوس وركەشتى ارۋانالار مەن سايگ ۇلىك مىنگەن شاباندوزدار قوشەمەتتەپ ساپ تۇزەپ, بىرگە ءجۇردى. تاۋەلسىزدىك سيمۆولى «بارىس تا» الاۋشىلار قاتارىنان تابىلدى.
الاۋگەرلەر ورتالىق الاڭنان تاۋەلسىزدىك, ءىلياس جانسۇگىروۆ, قاراتال شاعىن اۋداندارىنداعى كوشە بويلارىمەن قىسقى ازيادا لوگوتيپىمەن بەزەندىرىلگەن ۆەلوسيپەد, اۆتوكولىك سەكىلدى قوزعالىس قۇرالدارىمەن قاتار ءجۇرىپ وتىردى. وسى ساتتەردە وڭىردەگى شەشەن, ۇيعىر, ورىس جانە باسقا دا ءمادەني ورتالىق ونەرپازدارى سىرنايلاتىپ, اندەتسە, ستۋدەنتتەر «قارا- جورعانى» مىڭ بۇرالا بيلەپ, قوشەمەتتەدى.
وليمپيادا ويىندارىنىڭ سالتاناتى تۇستەن كەيىن «جاستار» سپورت سارايىندا جالعاسىپ, الاۋ وسىندا جەتكىزىلدى. وسى كۇنى سالتاناتقا الپىس مىڭنان استام شاھارلىقتار قاتىسىپ, الاۋگەرلەر مەن سپورت جەڭىمپازدارىنا قوشەمەت كورسەتىپ, ىزگى تىلەكتەرىن ءوربىتتى.
قاسيەتتى الاۋ كەشكىسىن قاراعاندىعا جول تارتتى.
كۇمىسجان بايجان, الماتى وبلىسى.