24 قاڭتاردا ماسكەۋ ۋاقىتى بويىنشا 16 ساعات 32 مينوتتە دومودەدوۆو اۋەجايىندا تەررورلىق ارەكەت جاسالدى. سوڭعى مالىمەتتەرگە قاراعاندا, جانكەشتى دەنەسىنە جاسىرىلعان جارىلعىش قۇرىلعىلاردىڭ سالماعى 7 كيلو تروتيلگە جۋىق. جارىلىس سالدارىنان 35 ادام قازا تاۋىپ, 180-نەن استام ادام جاراقات الدى. ولاردىڭ 110-عا جۋىعى اۋرۋحاناعا جاتقىزىلدى. قازا تاپقانداردىڭ اراسىندا شەتەلدىك ازاماتتار دا بار. وسىعان بايلانىستى رەسەي پرەزيدەنتى دميتري مەدۆەدەۆ داۆوستا وتەتىن فورۋمعا ساپارىن دوعاردى.
ورتالىق افريكا رەسپۋبليكاسىندا پرەزيدەنتتىك جانە پارلامەنتتىك سايلاۋ اياقتالدى. سايلاۋدىڭ الدىن الا قورىتىندىسى سەگىز كۇننەن كەيىن جاريا ەتىلەدى. كەيبىر مالىمەتتەر بويىنشا, ەلدىڭ قازىرگى پرەزيدەنتى فرانسۋا بوزيزە جەڭىسكە جەتۋى مۇمكىن.
يزرايل سىرتقى ىستەر مينيسترلىگىنىڭ قىزمەتكەرلەرى ەرەۋىلدى توقتاتتى. ديپلوماتتاردىڭ بىرنەشە اپتاعا سوزىلعان بۇل اكتسياسىنا نەگىزىنەن ولاردىڭ جالاقىلارىنىڭ ءتومەندىگى سەبەپ بولعان. ويتكەنى, ديپلوماتتاردىڭ جالاقىسى 17 جىلدان بەرى كوبەيتىلمەگەن كورىنەدى.
برازيلياداعى سۋ تاسقىنى مەن جەر كوشۋىنەن قۇربان بولعانداردىڭ سانى 806 ادامعا جەتتى. رەيتەر اگەنتتىگىنىڭ اقپاراتتارى بويىنشا, ءىز-ءتۇزسىز كەتكەندەردىڭ قاتارى 300-گە جۋىقتايدى. وپات بولعانداردىڭ اراسىندا بالالار مەن جاسوسپىرىمدەر كوپ.
گرۋزيانىڭ ەكس-پرەزيدەنتى ەدۋارد شەۆاردنادزە كەشە ءوزىنىڭ 83 جاسقا تولۋىن اتاپ ءوتتى. ەكس-پرەزيدەنت كومەكشىسىنىڭ ءمالىمدەۋىنشە, ە.شەۆاردنادزە تۋعان كۇنىن ءوز وتباسى مەن جاقىن تۋىستارىنىڭ ورتاسىندا تويلاعان.
شانحاي قالاسىندا الەمدە بالاماسى جوق كورمە ورتالىعى سالىناتىن بولادى. ونىڭ قۇنى – 3,5 ميلليارد دوللار. ورتالىقتىڭ قۇرىلىسى 2011 جىلدىڭ سوڭىندا باستالىپ, 2014 جىلى پايدالانۋعا بەرىلەدى. كورمە ورتالىعىنىڭ جالپى الاڭى 500 مىڭ شارشى مەتردى قۇرايدى.
وپەك-كە قاتىسۋشى ەلدەر سۇرانىستىڭ وسۋىنە بايلانىستى بيىلعى جىلى مۇناي جەتكىزۋدى ارتتىرۋى مۇمكىن. ساۋد ارابياسى ءمينيسترىنىڭ حابارلاۋىنشا, وپەك-كە مۇشە ەلدەردىڭ كۇندەلىكتى وندىرەتىن مۇنايى 6 ميلليون باررەل دەڭگەيىنەن اسپاۋى ءتيىس.
ءفيليپپيننىڭ استاناسى – مانيلا قالاسىندا جولاۋشىلار اۆتوبۋسىندا جارىلىس بولدى. جارىلىس سالدارىنان ەكى ادام قازا تاۋىپ, 15-كە جۋىعى جارالاندى. ەلدىڭ قۇقىق قورعاۋ ورگاندارى جارىلىستى بەلگىلى تەررورشى ۇيىمدار جاسادى دەگەن بولجام جاساپ وتىر.
گرەكيا ۇكىمەتى گەرمانيانىڭ Siemens كونتسەرنىن سوتقا بەرمەك. كونتسەرن باسشىلارى گرەكيانىڭ شەنەۋنىكتەرىن «ساتىپ العان» دەگەن كۇدىك بار. اقپارات كوزدەرىنە قاراعاندا, وسىعان بايلانىستى گرەكيا پارلامەنتى 11 ايعا جۋىق تەكسەرىس جۇرگىزگەن. وسىنىڭ سالدارىنان ەل قازىناسىنا 2 ميلليارد ەۋرو كەم تۇسكەن.
ينتەرنەت ماتەريالدارى نەگىزىندە ازىرلەندى.